 |
 |
సూపర్ స్టార్ మహేష్ బాబు (Mahesh Babu), దర్శకధీరుడు ఎస్.ఎస్. రాజమౌళి (SS Rajamouli) కాంబినేషన్లో వస్తున్న 'వారణాసి' (Varanasi) సినిమాపై అంచనాలు ఆకాశాన్ని తాకుతున్నాయి. ప్రస్తుతం ఈ సినిమా షూటింగ్ దశలో ఉంది. అయితే, ఎన్ని జాగ్రత్తలు తీసుకున్నప్పటికీ 'వారణాసి' సెట్స్ నుండి లీకులు మాత్రం ఆగడం లేదు. తాజాగా గంగా నది నేపథ్యంలో చిత్రీకరించిన ఒక కీలకమైన యాక్షన్ సన్నివేశానికి సంబంధించిన వీడియో క్లిప్ సోషల్ మీడియాలో వైరల్గా మారింది.
లీక్ అయిన వీడియో క్లిప్ను పరిశీలిస్తే.. గంగా నది అలల మీద ఒక హై-వోల్టేజ్ యాక్షన్ సీక్వెన్స్ను రాజమౌళి ప్లాన్ చేసినట్లు అర్థమవుతోంది. నది మధ్యలో ఒక పెద్ద పడవ ఉండగా, దాని చుట్టూ స్పీడ్ బోట్లు సుడులు తిరుగుతూ విన్యాసాలు చేస్తున్నాయి. మధ్యలో ఉన్న బోటులో మహేష్ బాబు యాక్షన్ మోడ్లో కనిపిస్తున్నారని సమాచారం.
గంగా నదిలో తీసిన ఈ వాటర్ యాక్షన్ సీక్వెన్స్ సినిమాకే హైలైట్ కానుందని టాక్. నీటి మధ్యలో సాగే ఈ పోరాట దృశ్యాలు హాలీవుడ్ స్థాయిని తలపిస్తున్నాయని, థియేటర్లలో ఈ ఎపిసోడ్ ప్రేక్షకులకు కళ్లు చెదిరే అనుభూతిని ఇస్తుందని చెబుతున్నారు.
సాధారణంగా రాజమౌళి తన సినిమాల విషయంలో ఎంతో పకడ్బందీగా వ్యవహరిస్తారు. సెట్స్లోకి సెల్ ఫోన్లకు అనుమతి ఇవ్వరు. కానీ, వారణాసి సినిమాను మొదటి షెడ్యూల్ నుంచే లీకులు వెంటాడుతుండటం చిత్ర యూనిట్కు తలనొప్పిగా మారింది. గతంలో కూడా మహేష్ బాబు లుక్, కొన్ని ఫోటోలు బయటకు వచ్చాయి. ఇప్పుడు ఏకంగా యాక్షన్ ఎపిసోడ్ వీడియోనే బయటకు రావడంతో రాజమౌళి సీరియస్ అయినట్లు తెలుస్తోంది. ఇకపై మరింత భద్రతా చర్యలు తీసుకునే అవకాశం ఉంది.
సోషల్ మీడియాలో ఈ లీక్డ్ వీడియో చూసిన అభిమానులు పండగ చేసుకుంటున్నారు. జక్కన్న ఏదో పెద్ద ప్లాన్ చేస్తున్నాడని, మహేష్ బాబును గతంలో ఎన్నడూ చూడని రీతిలో చూడబోతున్నామని సంబరపడుతున్నారు. 'వారణాసి' సినిమా బాక్సాఫీస్ వద్ద రికార్డులు తిరగరాయడం ఖాయమని కామెంట్స్ చేస్తున్నారు.
ఈ సినిమాలో మహేష్ బాబు విభిన్న గెటప్స్ లో కనిపించనున్నారు. ఇప్పటికే ఆయన పోషిస్తున్న 'రుద్ర' పాత్రకు సంబంధించిన లుక్ విడుదలై ఆకట్టుకుంది. అలాగే ఇందులో ఆయన శ్రీరాముడి పాత్రలో కనిపించనున్నారు. రాముడిగా మహేష్ లుక్ అద్భుతంగా ఉంటుందని అంటున్నారు. కాగా, 'వారణాసి' మూవీ వచ్చే ఏడాది ఏప్రిల్ 7న ప్రేక్షకుల ముందుకు రానుంది.
|
|
