నటీనటులు: జీవా, రాశి ఖన్నా, అర్జున్‌ సర్జా, ఎడ్వర్డ్‌ సోన్నెన్‌బ్లిక్‌, మటిల్డా, చార్లే, రోహిణి, రెడిన్‌ కింగ్స్‌లీ తదితరులు
సంగీతం: యువన్‌ శంకర్‌ రాజా 
ఎడిటింగ్‌: శాన్‌ లోకేష్‌ 
సినిమాటోగ్రఫీ: దీపక్‌కుమార్‌ పాడి 
నిర్మాతలు: ఇషారి కె.గణేష్‌, అనీష్‌ అర్జున్‌దేవ్‌
బ్యానర్స్‌: వేల్స్‌ ఫిల్మ్‌ ఇంటర్నేషనల్‌ లిమిటెడ్‌, వామ్‌ ఇండియా
రచన, దర్శకత్వం: పా.విజయ్‌
విడుదల తేదీ: 28.02.2025

కె.వి.ఆనంద్‌ దర్శకత్వంలో తమిళ్‌లో రూపొందిన ‘కొ’ చిత్రం తెలుగులో ‘రంగం’ పేరుతో విడుదలై ఘనవిజయం సాధించింది. జీవాకు ఈ సినిమా తెలుగులో మంచి పాపులారిటీ తెచ్చిపెట్టింది. కానీ, ఆ తర్వాత విడుదలైన చాలా సినిమాలు పరాజయాన్ని చవిచూడడంతో ఆశించిన ఇమేజ్‌ సంపాదించుకోలేకపోయాడు. తాజాగా అర్జున్‌ సర్జా, రాశీ ఖన్నా, రోహిణి ప్రధాన తారాగణంగా రూపొందిన ‘అగత్యా’ చిత్రంతో మరోసారి ప్రేక్షకుల ముందుకు వచ్చాడు జీవా. స్క్రిప్ట్‌ మీద ఉన్న నమ్మకంతో ఇషారి కె.గణేష్‌ భారీ బడ్జెట్‌తో ఈ చిత్రాన్ని నిర్మించారు. పా.విజయ్‌ దర్శకత్వం వహించిన ఈ సినిమాకు యువన్‌ శంకర్‌రాజా సంగీతాన్ని అందించారు. మరి ఈ సినిమా ప్రేక్షకుల్ని ఏమేరకు మెప్పించగలిగింది? ఎంతో రిస్క్‌తో కూడుకున్న ఈ చిత్రం నిర్మాతకు లాభాల్ని తెచ్చిపెడుతుందా? హీరో జీవాకు ఈ సినిమా ఎంతవరకు ప్లస్‌ అవుతుంది అనే విషయాల గురించి ఈ సమీక్షలో తెలుసుకుందాం. 

కథ: 

అగత్యా (జీవా) లక్‌ స్పెక్ట్రమ్‌లోని నెగెటివ్‌ ఎండ్స్‌ని కనుగొంటాడు. ఒక మంచి ఉద్దేశంతో అతను ఏ పని చేసినా ఏదోరకమైన వైఫల్యాలు ఎదురవుతుంటాయి. అతను ఒక చిత్రానికి ఆర్ట్‌ డైరెక్టర్‌గా మారి పాత ఫ్రెంచ్‌ ప్యాలెస్‌ని సినిమా సెట్‌గా మార్చడానికి 30 లక్షలు పెట్టుబడి పెడతాడు. కానీ, ఆ ప్రాజెక్ట్‌ నుంచి నిర్మాత తప్పుకుంటాడు. అంతేకాదు, అగత్యా డబ్బును కూడా డిఫాల్ట్‌ చేస్తాడు. అగత్యా స్నేహితురాలు వీణా(రాశి ఖన్నా) అతనికి ప్యాలెస్‌ని పుదుచ్చేరిలో భయానక గృహంగా మార్చగల పరిష్కారాన్ని అందిస్తుంది. ఆ ఆలోచనను ఇష్టపడి వ్యాపారం ప్రారంభిస్తాడు. ప్యాలెస్‌లోని నిజమైన దయ్యాలు తమ ఉనికిని ప్రదర్శించడం ప్రారంభిస్తాయి. ఆ సమయంలోనే ప్యాలెస్‌లో ఒక కార్పొరేటర్‌ కొడుకు తప్పిపోతాడు. దాంతో అలాంటి భయానకమైన ఇంటిని ప్రభుత్వం స్వాధీనం చేసుకుంటుంది. దీంతో అగత్యా మరోసారి తను వైఫల్యం చెందడంతో తనని తాను నిందించుకుంటాడు. ఆ సమయంలోనే దెయ్యం జాక్వెలిన్‌ (మటిల్డా) వారిని విడిచిపెట్టమని హెచ్చరించడం ప్రారంభించడంతో ఆ ప్యాలెస్‌ చరిత్రను తెలుసుకోవాలని నిర్ణయించుకుంటాడు. జాక్వెలిన్‌ మరియు సిద్ధార్థ్‌ (అర్జున్‌) ప్రేమలో ఉన్నారని, అతను సిద్ధ వైద్య పరిశోధకుడని అగత్యా తెలుసుకుంటాడు. రెండవ ప్రపంచ యుద్ధ సైనికులను చంపే ఎముక క్యాన్సర్‌కు నివారణ కోసం పరిశోధన చేయడానికి ఫ్రెంచ్‌ ప్రధాని అతన్ని నియమిస్తారు. అతను ఫ్రెంచ్‌ కాలనీ పుదుచ్చేరికి వస్తాడు. గవర్నర్‌ (ఎడ్వర్డ్‌ సోన్నెన్‌బ్లిక్‌) ఆ స్థలాన్ని నియంతగా పరిపాలిస్తున్నాడని తెలుసుకుంటాడు. వెన్నెముక సమస్యతో పక్షవాతానికి గురైన జాక్వెలిన్‌ను సిద్ధా మెడిసిన్‌తో నయం చేస్తాడు సిద్ధార్థ్‌. మెల్లగా, గవర్నర్‌ కూడా సిద్ధార్థ్‌ ప్రతిభను చూసి అతనితో స్నేహం చేయడం ప్రారంభిస్తాడు. అప్పుడు ఔషధం ఏమైంది? అగత్యా, సిద్ధార్థ్‌ మధ్య సంబంధం ఏమిటి? వంటి ఆసక్తికరమైన విషయాలు తెలుసుకోవాలంటే సినిమా చూడాల్సిందే. 

విశ్లేషణ: 

అగత్యా పాత్రలో జీవా బాగా నటించాడు. అంతేకాదు, సినిమాను తన భుజంపై వేసుకొని మోసుకెళ్లాడు. రాశిఖన్నా అందంగా కనిపించింది తప్ప నటన పరంగా ఆమె గురించి చెప్పుకోవడానికి ఏమీ లేదు. మాటిల్డా, ఎడ్వర్డ్‌ అతిగా నటించే ప్రయత్నం చేశారు. తమ క్యారెక్టర్ల ద్వారా ఎలాంటి భయాన్ని, థ్రిల్‌ని కలిగించలేకపోయారు. అర్జున్‌ పెర్‌ఫార్మెన్స్‌ మాత్రం బాగుంది. కథలో అనేక అంశాలు ఉన్నప్పటికీ, స్క్రీన్‌ప్లే, కథనం తక్కువగా ఉన్నాయి. సినిమాలో నెక్స్‌ట్‌ జరగబోయే సన్నివేశం ఏమిటి అనేది ఊహించే విధంగానే ఉంది. సినిమాలో థ్రిల్లింగ్‌ అంశాలు కూడా పేలవంగా ఉన్నాయి. కథనంలో అనేక అంశాలు ఉన్నప్పటికీ అవి అంత ప్రభావాన్ని చూపలేకపోయాయి. దర్శకుడు విజయ్‌ తను రాసుకున్న కథలోనే అన్ని విషయాలు చర్చించాలని ప్రయత్నించాడు. ఇక సినిమాని కూడా సడన్‌గా ముగించినట్టు అనిపిస్తుంది. కొంతసేపు 1940లో, మరికొంత సేపు 2024లో కథ నడుస్తుంటుంది. కానీ, అది అంతగా ఆకట్టుకోలేదు. ఒక హారర్‌ మూవీకి ఉండాల్సి థ్రిల్లింగ్‌ ఎలిమెంట్స్‌, ఎంగేజింగ్‌ బ్యాక్‌స్టోరీ లేదు. దాంతో ప్రేక్షకుల్ని ఆకట్టుకోవడంలో దర్శకుడు విజయ్‌ విఫలమయ్యాడు. ప్రొడక్షన్‌ వేల్యూస్‌ బాగానే ఉన్నప్పటికీ సినిమాటోగ్రఫీ, ఎడిటింగ్‌ విషయంలో మరికొంత జాగ్రత్త తీసుకొని ఉంటే బాగుండేది. క్లైమాక్స్‌లో వచ్చే యానిమేషన్‌ పార్ట్‌ మనల్ని కథ నుంచి దూరంగా తీసుకెళ్తుంది. అంతేకాదు, కొంత ఫన్నీగా కూడా ఉంటుంది. 

ఫైనల్‌గా చెప్పాలంటే..

అగత్యా చిత్రంలో ప్రేక్షకుల్ని ఆకట్టుకునే అంశాలు చాలా తక్కువగా ఉన్నాయి. ఒక కథలా కాకుండా సినిమాలో ఎన్నో అంశాలను జొప్పించడం వల్ల కలగూర గంపలా తయారై ప్రేక్షకుల సహనాన్ని పరీక్షిస్తుంది

రేటింగ్‌: 1.75/5