నేచురల్ స్టార్ నానికి మినిమం గ్యారెంటీ హీరోగా పేరుంది. ఆయన సినిమాలకు పరవాలేదు అనే టాక్ అయినా వస్తుందేమో కానీ, అసలు బాలేదు అని టాక్ వచ్చిన సందర్భాలు చాలా తక్కువ. అయినప్పటికీ కొన్నేళ్లుగా నాని సినిమాల పట్ల నిర్మాతలు, డిస్ట్రిబ్యూటర్లు అంతగా హ్యాపీగా లేరనే టాక్ ఇండస్ట్రీ వర్గాల్లో వినిపిస్తోంది. వాళ్ళు అంతగా హ్యాపీగా లేకపోవడానికి కారణమేంటి? అసలు నాని గురించి ఇండస్ట్రీలో జరుగుతున్న చర్చ ఏంటి? అనేది తెలుసుకునే ప్రయత్నం చేద్దాం. (Nani)

టైర్-2 హీరోలలో నానికి మంచి ఫాలోయింగ్ ఉంది. ముఖ్యంగా ఫ్యామిలీ ఆడియన్స్ లో నానికి మంచి పేరు ఉంది. టీవీలు, ఓటీటీలలో ఆయన సినిమాలకు విశేష ఆదరణ ఉంటుంది. కానీ థియేటర్లలో.. అందరినీ ఆనందపెట్టేలా నాని ఒక సాలిడ్ సక్సెస్ చూసి చాలా కాలమైంది. కొన్ని సినిమాలు మంచి పేరు తెచ్చుకుంటున్నాయి. కానీ ట్రేడ్ లెక్కల ప్రకారం, కొన్ని ఏరియాలలో బ్రేక్ ఈవెన్ అవ్వట్లేదు. హిట్ అయిన సినిమాలు కూడా.. కొన్ని చోట్ల బయ్యర్లకు కొంత నష్టాలను మిగుల్చుతున్నాయని అంటున్నారు. నాని సినిమాలలో భాగమైన నిర్మాతలు, డిస్ట్రిబ్యూటర్లు.. భారీ లాభాలను చూడటంలేదు, అలా అని భారీ నష్టాలను కూడా చూడటం లేదట. అయితే స్వల్ప లాభాలతో, లేదంటే స్వల్ప నష్టాలతో బయటపడుతున్నారని టాక్.

నాని చివరగా 2017 లో వచ్చిన 'MCA' తో సాలిడ్ సక్సెస్ చూశాడు. ఆ సినిమా ఓవరాల్ బ్రేక్ ఈవెన్ అవ్వడంతో పాటు, అన్ని ఏరియాల్లో బయ్యర్లకు లాభాలను తెచ్చిపెట్టింది. ఆ తర్వాత, బయ్యర్లు అందరికీ లాభాలను తెచ్చి పెట్టిన సినిమా నాని నుంచి రాలేదని ట్రేడ్ వర్గాలు చెబుతున్న మాట. 'MCA' తర్వాత నాని చేసిన 'కృష్ణార్జున యుద్ధం', 'దేవదాస్' సినిమాలు నిరాశపరిచాయి. 'జెర్సీ'కి గొప్ప పేరు వచ్చింది.. కానీ కలెక్షన్స్ మాత్రం గొప్పగా రాలేదు. దాంతో కొన్ని ఏరియాలలో నష్టాలు తప్పలేదు. 'గ్యాంగ్ లీడర్' సినిమాకి పాజిటివ్ టాక్ వచ్చినా కూడా.. ఓవరాల్ గా బ్రేక్ ఈవెన్ అవ్వలేదు. 'వి', 'టక్ జగదీష్' సినిమాలు నేరుగా ఓటీటీలో విడుదలయ్యాయి. 'శ్యామ్ సింగ రాయ్' మంచి పేరు తెచ్చుకొని, ఓవరాల్ బ్రేక్ ఈవెన్ అయినప్పటికీ.. కొన్ని చోట్ల స్వల్ప నష్టాలను చూసింది. ఇక, పరవాలేదు అనే టాక్ తెచ్చుకున్న 'అంటే సుందరానికీ' కలెక్షన్స్ పరంగా ఫ్లాప్ గానే నిలిచింది. 'దసరా' సినిమా నాని కెరీర్ లోనే హైయెస్ట్ గ్రాసర్ గా నిలిచింది. ఈ సినిమా తెలంగాణలో భారీ లాభాలను పొందింది కానీ, ఆంధ్రప్రదేశ్ లో నష్టాలను చూసింది. 'హాయ్ నాన్న' సినిమాకి కూడా అంతే. పాజిటివ్ టాక్ తో ఓవరాల్ బ్రేక్ అయినప్పటికీ, ఏపీలో నష్టాలు వచ్చాయి. ఇక నాని గత చిత్రం 'సరిపోదా శనివారం' కూడా 'దసరా' బాటలోనే పయనించింది. నాని కెరీర్ లో హైయెస్ట్ గ్రాసర్స్ లో ఒకటిగా నిలిచింది కానీ, ఆంధ్రప్రదేశ్ లో ఈ సినిమాకి నష్టాలు తప్పలేదని ట్రేడ్ లెక్కలు చెబుతున్నాయి.

ఇలా కొన్నేళ్లుగా నాని కెరీర్ ని గమనిస్తే.. భారీ నష్టాలను మిగిల్చే దారుణమైన సినిమాలు రావట్లేదు, అలా అని బయ్యర్లు అందరికీ భారీ లాభాలు తెచ్చి పెట్టే సాలిడ్ సినిమాలు కూడా రావట్లేదు. దీనికి ప్రధాన కారణం.. నాని తన మార్కెట్ కి మించి బడ్జెట్ పెట్టించడం అనే అభిప్రాయాలు సినీ సర్కిల్స్ లో ఉన్నాయి. నాని మంచి సినిమాలు చేస్తున్నాడు. కానీ ఆ సినిమాలు అందరికీ లాభాలు తెచ్చిపెట్టేవిగా మారాలంటే.. నాని కొన్ని జాగ్రత్తలు తీసుకోవాలని నిర్మాతలు, డిస్ట్రిబ్యూటర్లు చర్చించుకుంటున్నారట. అన్ని సినిమాలకు ఒకే రకమైన రీచ్ ఉండదు. కాబట్టి, చేస్తున్న కంటెంట్ కి తగ్గట్టుగా.. తన రెమ్యూనరేషన్, సినిమా భారీతనం విషయంలో కొంత కాంప్రమైజ్ అయితే బాగుంటుందని అభిప్రాయపడుతున్నారట. అప్పుడు నిర్మాతకు బడ్జెట్ తగ్గి, థియేట్రికల్ బిజినెస్ రీజనబుల్ గా చేస్తారు. దాంతో బయ్యర్లు మంచి లాభాలను చూస్తారు. ఈ విషయం మీద నాని దృష్టి పెడితే బాగుంటుందని అటు నిర్మాతలు, డిస్ట్రిబ్యూటర్లు కోరుతున్నారట.

ఇక నాని విషయంలో అభిమానుల నుంచి కూడా ఒక కంప్లైంట్ ఉంది. సోషల్ మీడియా ఫాలో అయ్యే వారికి ఇది తెలిసే ఉంటుంది. నానికి అన్ని వర్గాల ప్రేక్షకుల్లో మంచి పేరుంది. కానీ అన్ని వర్గాల ప్రేక్షకులను మెప్పించే అదిరిపోయే సినిమా మాత్రం నాని నుంచి రావడంలేదని ఆయన అభిమానుల ఆవేదన. అయితే పూర్తి క్లాస్ లేదంటే, పూర్తి మాస్ సినిమా చేస్తున్నాడు. దీంతో ఏదో ఒక వర్గానికే ఆ సినిమా పరిమితమై, వైడ్ రీచ్ రావట్లేదు అని అభిప్రాయపడుతున్నారు. అలాగే సినిమాల మ్యూజిక్, ప్రమోషన్స్ విషయంలోనూ నాని మరింత కేర్ తీసుకోవాలని చెబుతున్నారు. 'MCA' సినిమాని గమనిస్తే కంటెంట్ మరీ గొప్పది కాకపోవచ్చు. కానీ యూత్, ఫ్యామిలీ, మాస్ ఇలా అన్ని వర్గాల ప్రేక్షకులు మెచ్చే ఎలిమెంట్స్ అందులో ఉన్నాయి. అలాగే పాటలు కూడా పెద్ద హిట్ అయ్యాయి. అందుకే 'MCA' ఆ స్థాయి వసూళ్లను రాబట్టింది. ఈ విషయాన్ని దృష్టిలో పెట్టుకొని.. సినిమాల ఎంపిక, ప్రమోషన్స్ విషయంలో నాని స్పెషల్ కేర్ తీసుకుంటే బాగుంటుందని ఫ్యాన్స్ కోరుతున్నారు. 

బడ్జెట్ ని లిమిట్ లో ఉంచడంతో పాటు.. అన్ని వర్గాల ప్రేక్షకులకు రీచ్ అయ్యే కంటెంట్ ని సెలెక్ట్ చేసుకోవాలి. అలాగే ఆ కంటెంట్ ని ఎక్కువ మందికి చేరువయ్యేలా చేయడంలో కీలక పాత్ర పోషించే పాటల మీద ప్రత్యేక దృష్టి పెట్టాలి. అప్పుడు మినిమం గ్యారెంటీ హీరో అనే పేరుని న్యాయం చేసిన వాడవుతాడు నాని. మరి ఇకనైనా నాని ఈ విషయాలపై దృష్టి పెట్టి.. నిర్మాతలు, బయ్యర్లతో పాటు అభిమానులను కూడా ఆనందపరుస్తాడేమో చూడాలి.