'దేవర' (Devara) విడుదల వేళ కడపలో విషాదం చోటుచేసుకుంది. దేవర సినిమా చూస్తూ.. జూనియర్ ఎన్టీఆర్ (Jr NTR) అభిమాని మృతి చెందాడు. ఎన్టీఆర్ హీరోగా కొరటాల శివ దర్శకత్వంలో రూపొందిన దేవర చిత్రం నేడు థియేటర్లలో అడుగుపెట్టింది. రిలీజ్ సందర్భంగా కడపలోని అప్సర థియేటర్ లో అభిమానుల కోసం స్పెషల్ షో చేశారు. ఎన్టీఆర్ లాంటి మాస్ హీరో నుంచి వచ్చిన పక్కా మాస్ సినిమా కావడంతో.. అభిమానులు ఈలలు, కేకలతో ఫుల్ గా ఎంజాయ్ చేస్తూ సినిమా చూస్తున్నారు. సీకే దిన్నె మండలం జమాల్‌పల్లికి చెందిన ఎన్టీఆర్ అభిమాని మస్తాన్ వలీ కూడా అదే ఉత్సాహంతో కేకలు వేస్తూ సినిమా చూస్తున్నాడు. కానీ ఊహించనివిధంగా ఒక్కసారిగా కుప్పకూలిపోయాడు. తోటి అభిమానులు వెంటనే దగ్గరలోని ఆసుపత్రికి తరలించగా.. అప్పటికే అతను మృతి చెందినట్లు వైద్యులు తెలిపారు. సినిమాకి చూడటానికి వెళ్లిన వ్యక్తి ఇలా హఠాత్తుగా కన్నుమూయడంతో కుటుంబసభ్యులు కన్నీరుమున్నీరవుతున్నారు.