Home  »  News  »  రామ్ చరణ్, రాజమౌళిల సంచలనం 'మగధీర'కి 15 ఏళ్ళు!

Updated : Jul 30, 2024

హీరోగా నటించిన రెండో సినిమాతోనే ఇండస్ట్రీ హిట్ కొట్టడం ఆషామాషీ విషయం కాదు. అలాంటి అరుదైన ఘనతను మెగా పవర్ స్టార్ రామ్ చరణ్ (Ram Charan) కి సొంతం అయ్యేలా చేశాడు దర్శకధీరుడు ఎస్.ఎస్. రాజమౌళి (SS Rajamouli). వీరి కాంబినేషన్ లో వచ్చిన మొదటి సినిమా 'మగధీర' (Magadheera) 2009 జులై 30న విడుదలై, తెలుగు సినీ రికార్డులను తిరగరాసి ఇండస్ట్రీ హిట్ గా నిలిచింది. రూ.100 కోట్ల గ్రాస్ క్లబ్ లో చేరిన మొదటి తెలుగు సినిమా ఇదే కావడం విశేషం. ఈ సంచలన చిత్రం విడుదలై నేటితో 15 వసంతాలు పూర్తయ్యాయి.

'మగధీర' చిత్రం పునర్జన్మల నేపథ్యంలో తెరకెక్కింది. 17వ శతాబ్దంలో ఒక్కటి కాలేకపోయిన జంట.. 21వ శతాబ్దంలో మళ్ళీ జన్మించి ఎలా ఒక్కటయ్యారు అనే ఆసక్తికర పాయింట్ తో రూపొందింది. ఈ చిత్రం ప్రేక్షకులకు వెండితెర మీద ఓ కొత్త అనుభూతిని పంచింది. ముఖ్యంగా ఫ్లాష్ బ్యాక్ లో వచ్చే 17వ శతాబ్దపు సన్నివేశాలు కట్టిపడేశాయి. వందమందితో రామ్ చరణ్ తలపడే సన్నివేశం టాలీవుడ్ చరిత్రలోనే బెస్ట్ సీన్స్ లో ఒకటిగా పేరు తెచ్చుకుంది. కాలభైరవగా రామ్ చరణ్ నటవిశ్వరూపం చూపించాడు. రాజమౌళి దర్శకత్వ ప్రతిభకు, చరణ్ నటన తోడై.. ఈ సినిమా బాక్సాఫీస్ దగ్గర కాసుల వర్షం కురిపించింది.

'మగధీర' చిత్రాన్ని గీతా ఆర్ట్స్ బానర్ లో అల్లు అరవింద్ నిర్మించారు. కాజల్ అగర్వాల్ హీరోయిన్ గా నటించిన ఈ సినిమాలో దేవ్ గిల్, శ్రీహరి, సునీల్, శరత్ బాబు, రావు రమేష్ తదితరులు ముఖ్య పాత్రలు పోషించారు. ఎం.ఎం. కీరవాణి సంగీతం అందించిన ఈ చిత్రంలో పాటలన్నీ పెద్ద హిట్ అయ్యాయి. చిత్ర విజయంలో సంగీతం కీలక పాత్ర పోషించింది. కె.కె.సెంథిల్ కుమార్ సినిమాటోగ్రాఫర్ గా వ్యవహరించిన ఈ చిత్రానికి ఎడిటింగ్ గా కోటగిరి వెంకటేశ్వరరావు, ఆర్ట్ డైరెక్టర్ గా ఎస్.రవీందర్ వర్క్ చేశారు. ఉత్తమ నృత్య దర్శకుడు, ఉత్తమ స్పెషల్ ఎఫెక్ట్స్ విభాగాల్లో ఈ చిత్రం జాతీయ అవార్డులను గెలుచుకుంది. అలాగే తొమ్మిది నంది అవార్డులను ఖాతాలో వేసుకుంది.






Disclaimer:
All content included on this TeluguOne.com Portal including text, graphics, images, videos and audio clips, is the property of ObjectOne Information Systems Ltd. or our associates, and protected by copyright laws. The collection, arrangement and assembly of all content on this portal/ related channels is the exclusive property of ObjectOne Information Systems Ltd. or our associates and protected copyright laws.
You may not copy, reproduce, distribute, publish, display, perform, modify, create derivative works, transmit, or in any other way exploit any part of copyrighted material without permission from ObjectOne Information Systems Ltd or our associates.