వేసవిలో సిమ్లా, ఊటీ, కశ్మీర్ వంటి హిల్ స్టేష‌న్స్‌కు టూర్ వేయాలని చాలా మంది అనుకుంటారు. ఎందుకంటే.. అక్కడ చల్లగా ఉంటుంది కాబట్టి. ఆంధ్రాలోనూ అటువంటి హిల్ స్టేషన్ ఒకటి ఉంది. ఆంధ్రా కశ్మీర్‌గా పాపులర్ అయ్యింది. అదే ‘లంబసింగి’. ఇప్పుడీ ఊరి పేరుతో ఓ సినిమా రూపొందుతోంది.

నవీన్ గాంధీ దర్శకత్వం వహిస్తున్న ‘లంబసింగి’ చిత్రానికి ప్రముఖ దర్శకుడు కళ్యాణ్ కృష్ణ కురసాల సమర్పకులు. భరత్‌ రాజ్ ను హీరోగా పరిచయం చేస్తూ.. ‘బిగ్ బాస్’ ఫేమ్ దివి హీరోయిన్ గా కాన్సెప్ట్ ఫిల్మ్స్ పతాకంపై ఆనంద్.టి నిర్మిస్తున్నారు. ఈ చిత్రానికి ‘ఎ ప్యూర్ లవ్ స్టోరీ’ అనేది ఉపశీర్షిక. 

పోస్ట్ ప్రొడక్షన్ కార్యక్రమాలు పూర్తిచేసుకున్న 'లంబసింగి' చిత్రం మార్చి 15న ప్రేక్షకుల ముందుకు రాబోతోంది. ఇటీవల విడుదల చేసిన ఈ సినిమా మొదటిపాట ‘నచ్చేసిందే నచ్చేసిందే…’ కు ప్రేక్షకుల నుండి మంచి స్పందన లభించింది. 

తాజాగా ఈ సినిమా నుండి 'వయ్యారి గోదారి' సాంగ్ ను చిత్ర యూనిట్ విడుదల చేసింది. జవేద్ అలీ ఆలపించిన ఈ సాంగ్ ను కాసర్ల శ్యామ్ సాహిత్యం అందించారు. ఆర్ఆర్ ధ్రువన్ సంగీతం అందించారు. ఈ  మెలోడీ సాంగ్ కు మ్యూజిక్ లవర్స్ నుండి మంచి రెస్పాన్స్ లభిస్తోంది.

అన్ని వర్గాల ప్రేక్షకులను అలరించే విధంగా సినిమా ఉంటుందని చిత్ర బృందం చెబుతోంది. మరి మార్చి 15న విడుదలవుతున్న ఈ లంబసింగి చిత్రం వెచ్చని వేసవిలో చల్లని వినోదాన్ని పంచుతుందేమో చూడాలి.

వంశీ రాజ్, కిట్టయ్య, నిఖిల్ రాజ్, జనార్దన్, అనురాధ, మాధవి, నవీన్ రాజ్, ప్రమోద్, రమణ, పరమేష్ తదితరులు నటిస్తున్న ఈ చిత్రానికి సినిమాటోగ్రాఫర్ గా కె.బుజ్జి, ఎడిటర్ గా కె.విజయ్ వర్ధన్ వ్యవహరిస్తున్నారు.