సెన్సార్ నిబంధనలకు విరుద్ధంగా సెన్సార్ సర్టిఫికేట్ రాకముందే సినిమా టికెట్స్ బుకింగ్స్ ఓపెన్ చేయడంపై నిర్మాత, తెలుగు ఫిల్మ్ ప్రొడ్యూసర్స్ కౌన్సిల్ జాయింట్ సెక్రటరీ నట్టి కుమార్ గళం విప్పుతున్నారు. అలాగే చిన్న నిర్మాతలు తమ సినిమాల సెన్సార్ కోసం రోజుల తరబడి ఎదురు చూడాల్సిన పరిస్థితి ఉంటే.. పెద్ద నిర్మాతలు మాత్రం తమ సినిమాలకు అప్లై చేసిన వెంటనే సెన్సార్ సర్టిఫికెట్లు పొందుతుండటాన్ని ఆయన తప్పుపడుతున్నారు. ఈ మేరకు హైదరాబాద్ రీజినల్ సెన్సార్ బోర్డు అనుసరిస్తున్న ద్వంద్వ విధానాలను ఖండిస్తూ తాజాగా సెంట్రల్ బోర్డ్ ఆఫ్ ఫిల్మ్ సర్టిఫికేషన్ చైర్మన్ కి నట్టి కుమార్ లేఖ రాశారు.

"గౌరవనీయులైన సెంట్రల్ బోర్డ్ ఆఫ్ ఫిల్మ్ సర్టిఫికేషన్ ఛైర్మన్ గారికి,

విషయం: అభ్యర్థన.. సీబీఎఫ్‌సీ, హైదరాబాద్‌ ప్రాంతీయ కార్యాలయంపై ఫిర్యాదు. "ఊరు పేరు భైరవకోన" సినిమా సెన్సార్ సర్టిఫికెట్ ఆపండి. తక్షణమే విచారణ నిర్వహించండి. 

'ఊరు పేరు భైరవకోన' సినిమా టిక్కెట్లు సెన్సార్ సర్టిఫికేట్ జారీ చేయడానికి ముందే బుక్ మై షోలో తెరవబడ్డాయి. నిజానికి సెన్సార్ నిబంధనల ప్రకారం సర్టిఫికెట్ ఇవ్వకుండా సినిమా విడుదల తేదీని ప్రచారం చేయకూడదు. కానీ పైన పేర్కొన్న సినిమాను ఫిబ్రవరి 16న సినిమాను విడుదల చేస్తున్నట్లు ప్రచారం చేస్తున్నారు. అంతేకాదు సెన్సార్ నిబంధనలకు విరుద్ధంగా బుక్ మై షోలో టిక్కెట్లు తెరిచారు. మా ఫిర్యాదులోని ఈ రెండు అంశాలపై చర్య తీసుకోవాలని నేను మిమ్మల్ని అభ్యర్థిస్తున్నాను. అలాగే ఈ సినిమాకి సంబంధించి నిర్మాతలు ఏ తేదీన సెన్సార్‌కి దరఖాస్తు చేసుకున్నారు, వారికి అప్లై చేసిన ఆర్డర్ లిస్ట్‌లో చాలా సినిమాలు సెన్సార్ స్క్రీనింగ్ కోసం పెండింగ్‌లో ఉండగా ఈ సినిమాని ముందుగా ఎందుకు సెన్సార్ చేయాల్సి వచ్చింది? హైదరాబాద్ రీజినల్ సెన్సార్ బోర్డ్ వారు దీనికి బాధ్యులని తేలితే విచారణ జరిపి వారిపై చర్యలు తీసుకోవాలని కోరుతున్నాను. ఏ రకమైన సర్టిఫికేట్ జారీ చేయబడుతుందో తెలియకుండా నిబంధనలకు విరుద్ధంగా బుక్ మై షో టిక్కెట్లను ఎలా తెరవవచ్చు? పిల్లలు చూడకూడదని సర్టిఫికేట్ జారీ చేస్తే, టిక్కెట్లు ముందుగానే జారీ చేయబడినందున దానికి ఎవరు బాధ్యత వహిస్తారు. వెంటనే సెన్సార్ సర్టిఫికెట్, సినిమాను ఆపేయాలని కోరుతున్నాను.

రీసెంట్ గా “యాత్ర-2” సినిమా విషయంలో కూడా సెన్సార్ సర్టిఫికేట్ రాకముందే రిలీజ్ డేట్ గురించి విపరీతంగా ప్రచారం జరిగింది. అలాగే, సర్టిఫికేట్ జారీ చేయడానికి ముందు బుక్ మై షోలో టిక్కెట్లను తెరిచారు. ఇలా వరుస సమస్యలు వస్తున్నా.. సెన్సార్ అధికారులకు ఫిర్యాదు చేసినా పట్టించుకోవడం లేదు. అలాగే ఇటీవల విడుదలైన తెలుగు భారీ బడ్జెట్ సినిమాలకు సంబంధించి పెద్ద నిర్మాతలు సెన్సార్ కు అప్లై చేసిన వెంటనే సెన్సార్ సర్టిఫికెట్లు పొందుతున్నారు. చిన్న సినిమా నిర్మాతలు తమ సినిమాల సెన్సార్ కోసం దరఖాస్తు చేసుకుని రోజుల తరబడి వేచి ఉండాల్సిందే. నిర్మాతగా ఎన్నో చిన్న, మధ్యతరహా బడ్జెట్ సినిమాలు చేశాను, ఈ పరిణామాలు చాలా బాధగా ఉన్నాయి. ప్రస్తుతం హైదరాబాద్ ప్రాంతీయ సెన్సార్ బోర్డు అనుసరిస్తున్న ద్వంద్వ విధానాలు విమర్శనాత్మకంగా మారాయి. గతంలో సెన్సార్ ఆఫీసర్లుగా పనిచేసిన కైలాష్ ప్రసాద్, రత్నమాల, శ్యాంప్రసాద్ తదితరులు స్ట్రిక్ట్ ఆఫీసర్లుగా, నిజాయితీపరులుగా సెన్సార్ బోర్డ్ హైదరాబాద్ రీజనల్ ఆఫీసర్లుగా పేరు తెచ్చుకున్నారు. కచ్చితమైన నిబంధనలు పాటిస్తూ పెద్ద నిర్మాతలపై కూడా వారి హయాంలో కేసులు పెట్టిన ఉదాహరణలు చాలానే ఉన్నాయి. కానీ ఇప్పుడున్న హైదరాబాద్ రీజనల్ సెన్సార్ బోర్డ్ విధానాలు, తీరు విమర్శలకు తావిస్తోంది. ఈ క్రమంలో సినిమాలకు ఆర్డర్ లో కాకుండా నిబంధనలకు వ్యతిరేకంగా సెన్సార్ జరగడంపై విచారణ జరిపి చర్యలు తీసుకోవాలని కోరుతున్నాను.

సెన్సార్ ఏజెంట్ సురేష్, సెన్సార్ బోర్డ్ ఉద్యోగి కరుణాకర్‌లను విచారించి వారి ఫోన్ నంబర్లు, గూగుల్ పే, బ్యాంకు అకౌంట్ నంబర్లను పరిశీలిస్తే వాస్తవాలు బయటకు వస్తాయి. నేను పైన పేర్కొన్న అన్ని ఫిర్యాదులపై చర్యలు తీసుకుంటారని ఆశిస్తున్నాను." అని నట్టి కుమార్ లేఖలో పేర్కొన్నారు.