విభిన్న పాత్రలతో ప్రేక్షకులను అలరిస్తున్న సీనియర్ నటుడు నరేష్ కు అరుదైన గౌరవం లభించింది. ఫిలిప్పీన్స్ రాజధాని మనీలాలో ఇటీవల 5వ ప్రపంచ కాంగ్రెస్ సమావేశాలు జరిగాయి. నేషనల్ అకాడమీ ఆఫ్ సెక్యూరిటీ అండ్ డిఫెన్స్ ప్లానింగ్ (NASDP),  ఇంటర్నేషనల్ స్పెషల్ కోర్ట్ ఆఫ్ ఆర్బిట్రేషన్ & హ్యూమన్ రైట్స్ (ISCAHR) కలిసి నిర్వహించిన ఈ సమావేశాలకు ఫిలిప్పీన్స్ కి చెందిన పలువురు ప్రముఖులతో పాటు ఇతర దేశాల నుంచి ప్రతినిధులు, ఇండియా నుంచి నరేష్ హాజరయ్యారు.

పోలీస్, డిఫెన్స్ జాతీయ ప్రధాన కార్యాలయంలో ఉగ్రవాదంపై డాక్టర్ నరేష్ చేసిన ఉపన్యాసాలు ప్రశంసలు అందుకున్నాయి. నరేష్ కు నైట్ హుడ్, అత్యున్నత బిరుదు 'సర్' ను ప్రదానం చేశారు. మిలిటరీ ఆర్ట్స్,  హ్యూమన్ సర్వీస్‌లో గౌరవ డాక్టరేట్, పిహెచ్‌డితో సత్కరించారు. ఆర్బిట్రేషన్ & శాంతి మధ్యవర్తిత్వానికి సహచరుడిగా గుర్తించారు. పౌర హక్కుల సంరక్షకుడు బిరుదుతో గౌరవించారు.  

అంతర్జాతీయంగా పూర్తి దౌత్య నిరోధక శక్తితో NASDP ఇంటర్నేషనల్ కౌంటర్ టెర్రరిజం సెంటర్‌లో మిలిటరీ ఆర్ట్స్ గుడ్ విల్ అంబాసిడర్, లెఫ్టినెంట్ కల్నల్, సూపరింటెండెంట్ ఆఫ్ ఇండియన్ కమాండ్‌గా నరేష్ నియమించబడ్డాడు.

నరేష్ తన స్వాగత ప్రసంగంలో.. ప్రభుత్వాలు, ఐక్యరాజ్యసమితి సంస్థలతో పాటు ఉగ్రవాదాన్ని నిర్వీర్యం చేయడం, అరికట్టడంలో మీడియాకు గొప్ప బాధ్యత వుందని చెప్పారు. ఈ కాంపెయిన్ ని ఒక సెలబ్రిటీ, దౌత్యవేత్తగా ముందుకు తీసుకెళ్తానని పేర్కొన్నారు.
ప్రతి విద్యార్థిని జాతీయ క్యాడెట్ కార్ప్స్(భారతదేశంలోని సాయుధ దళాల విద్యార్థి విభాగాలు), ఇతర దేశాలలో దేశం పట్ల బాధ్యత భావాన్ని తీసుకురావడానికి నియమించాలని అన్నారు.

AMB లెఫ్టినెంట్ కల్నల్ సర్ Ph.D గౌరవం అందుకున్న నరేష్ ను ప్రముఖులు అభినందించారు. దేశంలో ఇలాంటి గౌరవాలు, పోస్టింగ్‌లు అందుకున్న మొదటి నటుడు నరేష్. ప్రముఖ నటి పవిత్రా లోకేష్ సైతం సమావేశానికి హాజరై కళారంగంలో అందించిన సేవలకుగాను మెడల్ అందుకోవడం విశేషం.