యువ నటుడు సుహాస్ హీరోగా నటించిన 'రైటర్ పద్మభూషణ్' ఇటీవల విడుదలై పాజిటివ్ టాక్ తెచ్చుకుంది. చిన్న సినిమాగా వచ్చి మంచి వసూళ్లను రాబడుతూ ఘన విజయం దిశగా దూసుకుపోతోంది. ఇలాంటి తరుణంలో ఈ చిత్రం కాపీ వివాదంలో చిక్కుకున్నట్లు తెలుస్తోంది.

'రైటర్ పద్మభూషణ్'లోని పలు సన్నివేశాలు 2017లో వచ్చిన హిందీ సినిమా 'బ‌రేలీ కీ బ‌ర్ఫీ'ని పోలి ఉన్నాయట. దీంతో ఆ సినిమా తెలుగు రైట్స్ ని ఎప్పుడో కొన్న ఓ నిర్మాత.. 'రైటర్ పద్మభూషణ్' టీమ్ పై చర్యలు తీసుకోవడానికి సిద్ధమవుతున్నట్లు సమాచారం. ప్రస్తుతం ఈ వార్త ఇండస్ట్రీ వర్గాల్లో హాట్ టాపిక్ గా మారింది. మరి ఈ వివాదం ముదురుతుందో లేక చర్చలతో స‌ద్దుమ‌ణుగుతుందో చూడాలి.