'క‌థానాయ‌కుడు' లాంటి హిట్ ఫిల్మ్ త‌ర్వాత సురేశ్ ప్రొడ‌క్ష‌న్స్‌లో బాల‌కృష్ణ న‌టించిన రెండో చిత్రం 'రాము'. ఈ సినిమా ద్వారా వై. నాగేశ్వ‌ర‌రావు ద‌ర్శ‌కునిగా ప‌రిచ‌య‌మ‌య్యారు. అదివ‌ర‌కు ఆయ‌న 'క‌థానాయ‌కుడు', 'సంఘ‌ర్ష‌ణ‌', 'ప్ర‌తిధ్వ‌ని' చిత్రాల‌కు అసోసియేట్ డైరెక్ట‌ర్‌గా ప‌నిచేశారు. 'క‌థానాయ‌కుడు' షూటింగ్ టైమ్‌లో నాగేశ్వ‌ర‌రావు ప‌నితీరును గ‌మ‌నించిన బాల‌య్య ఆయ‌న‌తో "నిన్ను డైరెక్ట‌ర్‌గా ప‌రిచ‌యం చేస్తాన‌య్యా" అని ఓ మాట అన్నారు. నిజంగానే బాల‌కృష్ణ సినిమాతోనే ఆయ‌న డైరెక్ట‌ర్‌గా ప‌రిచ‌యమ‌య్యారు.

అప్ప‌టికే మాస్ హీరోగా ఎస్టాబ్లిష్ అయిన బాల‌కృష్ణ‌తో 'రాము' లాంటి సాఫ్ట్ టైటిల్‌తో సినిమాను త‌ల‌పెట్ట‌డం ఓ ర‌కంగా సాహ‌స‌మే. అయినా క‌థ‌కు, పాత్ర‌కు ప్రాధాన్యం ఇచ్చి రామానాయుడు ఈ సినిమాని త‌ల‌పెట్టారు. ఎన్టీ రామారావు సినిమా 'ఆత్మ‌బంధువు' ప్రేర‌ణ‌తో 'రాము' క‌థ‌ను త‌మిళ ర‌చ‌యిత గుహ‌నాథ‌న్ అల్లారు. ఆ టైటిల్‌ను సూచించింది జంధ్యాల‌. బాల‌య్య‌కూ క‌థ న‌చ్చ‌డంతో, ఈ సినిమా ద‌ర్శ‌క‌త్వ బాధ్య‌త‌ను నాగేశ్వ‌ర‌రావుకు అప్ప‌గించారు రామానాయుడు. 1987 ఫిబ్ర‌వ‌రి 1న ఊటీలో 'రాము' షూటింగ్ ప్రారంభ‌మైంది. అక్క‌డ పాట‌లు చిత్రీక‌రించి, హైద‌రాబాద్ ఫిల్మ్‌న‌గ‌ర్‌లో అప్పుడే రామానాయుడు కొత్త‌గా క‌ట్టుకున్న ఇంట్లో 50 రోజుల పాటు టాకీ పార్ట్ తీశారు.

ఈ సినిమా చిన్న‌త‌నంలో మూగ‌వాడిగా ఉండి, ఒక విష‌ప్ర‌యోగం బారి నుంచి లాయ‌ర్ రామేశం కుటుంబాన్ని కాపాడి, ఆయ‌న చేయించిన ఆప‌రేష‌న్‌తో మాట‌లు వ‌చ్చి, చివ‌ర‌కు ఓ దుర్మార్గుడి బారినుంచి ఆ కుటుంబాన్ని కాపాడిన రాముగా ఈ సినిమాలో బాల‌య్య చ‌క్క‌ని న‌ట‌న ప్ర‌ద‌ర్శించాడు. ఆయ‌న స‌ర‌స‌న నాయిక‌గా అందాల తార ర‌జ‌ని న‌టించింది. లాయ‌ర్ రామేశంగా జ‌గ్గ‌య్య‌, విల‌న్ భూప‌తిగా స‌త్య‌నారాయ‌ణ న‌టించిన ఈ సినిమాలో సుత్తివేలు, సుధాక‌ర్‌, హ‌రిప్ర‌సాద్‌, భాస్క‌ర్‌బాబు, శార‌ద‌, దీప‌, శ్రీ‌ల‌క్ష్మి, మాలాశ్రీ (శ్రీ‌దుర్గ‌), అనిత కీల‌క పాత్ర‌ధారులు.

జంధ్యాల మాట‌లు, వేటూరి పాట‌లు రాసిన ఈ సినిమా 1987 జూలై 31 విడుద‌లై స‌క్సెస్‌ఫుల్‌గా 100 రోజులు ఆడింది. ఈ సినిమాకు ఎస్పీ బాల‌సుబ్ర‌హ్మ‌ణ్యం సంగీతం స‌మ‌కూర్చారు. సురేశ్ సంస్థ‌లో మ్యూజిక్ డైరెక్ట‌ర్‌గా ఆయ‌న ప‌నిచేసిన ఏకైక సినిమా ఇదే. "ఇది ఒక ఇంటి క‌థ‌.. ఇది ఒక రామక‌థా సుధ" పాట సినిమాకు హైలైట్‌గా నిల‌వ‌డ‌మే కాకుండా, సూప‌ర్ పాపుల‌ర్ అయ్యింది.