మంచి అవుట్ పుట్ ఇవ్వలేనప్పుడు వీఎఫ్ఎక్స్ జోలికి వెళ్ళకూడదు. లేదంటే అనవసరంగా ట్రోల్స్ కి గురి అవ్వాల్సి ఉంటుంది. ఆమధ్య ప్రభాస్ నటించిన మైథలాజికల్ ఫిల్మ్ 'ఆదిపురుష్' ఎంతటి ట్రోల్స్ ఎదుర్కొందో తెలిసిందే. ఇటీవల పవన్ కళ్యాణ్ పీరియాడిక్ ఫిల్మ్ 'హరి హర వీరమల్లు'ది కూడా అదే పరిస్థితి. దీంతో వీఎఫ్ఎక్స్ తో ముడిపడిన సినిమాలంటే.. స్టార్స్ తో పాటు, వారి అభిమానులు కూడా భయపడే పరిస్థితి ఏర్పడింది. ఇప్పుడు ఆ భయాన్ని 'మిరాయ్' రెట్టింపు చేస్తోంది. (Mirai Movie)

'హనుమాన్' వంటి పాన్ ఇండియా సక్సెస్ తర్వాత తేజ సజ్జా హీరోగా నటించిన మూవీ 'మిరాయ్'. కార్తీక్ ఘట్టమనేని దర్శకత్వంలో పీపుల్ మీడియా ఫ్యాక్టరీ నిర్మించిన ఈ సినిమాలో మంచు మనోజ్ నెగటివ్ రోల్ చేయడం విశేషం. నేడు(సెప్టెంబర్ 12) థియేటర్లలో అడుగుపెట్టిన ఈ యాక్షన్ అడ్వెంచర్.. పాజిటివ్ టాక్ ని సొంతం చేసుకుంది. ముఖ్యంగా తక్కువ బడ్జెట్ లో అదిరిపోయే అవుట్ పుట్ ఇచ్చారని, వీఎఫ్ఎక్స్ నెక్స్ట్ లెవెల్ అని అందరూ ప్రశంసిస్తున్నారు.

స్టార్ హీరోల సినిమాలు వందల కోట్ల బడ్జెట్ తో రూపొందుతున్నాయి. పైగా, వీఎఫ్ఎక్స్ కోసం ఫారెన్ కంపెనీలను రంగంలోకి దింపామని.. గొప్పగా ప్రచారం చేసుకుంటున్నారు. కానీ, అవుట్ పుట్ మాత్రం ఆ స్థాయిలో ఉండట్లేదు. అలాంటిది 'మిరాయ్' మూవీ రూ.60 కోట్ల బడ్జెట్ లోనే రూపొందినట్లు తెలుస్తోంది. వీఎఫ్ఎక్స్ వర్క్ కూడా పీపుల్ మీడియాకి చెందిన సొంత టీమ్ చేయడం విశేషం. 

ఇటీవల ఎన్నో సినిమాలను చూస్తున్నాం. వందల కోట్ల బడ్జెట్ పెడుతూ, ఫారెన్ కంపెనీలను తీసుకొచ్చి కూడా మెరుగైన వీఎఫ్ఎక్స్ అవుట్ పుట్ ఇవ్వలేకపోతున్నారు. అలాంటిది 'మిరాయ్' టీమ్ రీజనబుల్ బడ్జెట్ లో అదిరిపోయే అవుట్ పుట్ ఇవ్వడంతో పెద్దఎత్తున ప్రశంసలు దక్కుతున్నాయి. ఈ రేంజ్ అవుట్ పుట్ రావడానికి ప్రధాన కారణం.. దర్శకుడి విజన్ కూడా అని పలువురు అభిప్రాయడుతున్నారు.

అయితే 'మిరాయ్' వీఎఫ్ఎక్స్ కి వస్తున్న రెస్పాన్స్.. కొందరు స్టార్ హీరోలకు ఆందోళన కలిగించే అవకాశముంది. టాలీవుడ్ నుంచి రాబోతున్న నెక్స్ట్ భారీ వీఎఫ్ఎక్స్ సినిమాలను గమనిస్తే.. ప్రభాస్ 'ది రాజా సాబ్', చిరంజీవి 'విశ్వంభర' ముందు వరుసలో ఉన్నాయి. 'రాజా సాబ్' కూడా పీపుల్ మీడియా ఫ్యాక్టరీ బ్యానర్ లోనే రూపొందుతుండటంతో.. వీఎఫ్ఎక్స్ పరంగా 'మిరాయ్'ని మించిన అవుట్ పుట్ ఉంటుందని ఫ్యాన్స్ బలంగా నమ్ముతున్నారు. మరి అది నిజామా కాదా? డైరెక్టర్ మారుతి విజన్ ఏ రేంజ్ లో ఉంది? అనేది త్వరలో తేలిపోనుంది. ఇక 'విశ్వంభర' విషయానికొస్తే.. ఇప్పటికే టీజర్ లో వీఎఫ్ఎక్స్ షాట్స్ కి ట్రోల్స్ ఎదుర్కొంది. అందుకే ఈ సినిమాని వచ్చే ఏడాది వేసవికి వాయిదా వేసి.. వీఎఫ్ఎక్స్ పై మరింత వర్క్ చేస్తుంది టీమ్. మరి అవుట్ పుట్ ఎలా వస్తుందో చూడాలి. 

'ది రాజా సాబ్', 'విశ్వంభర' మాత్రమే కాదు.. టాలీవుడ్ నుంచి వచ్చే భారీ వీఎఫ్ఎక్స్ సినిమాలు అన్నింటిపైనా 'మిరాయ్' ప్రభావం పడే అవకాశముంది. ఎందుకంటే, వీఎఫ్ఎక్స్ ఏ మాత్రం తేడా కొట్టినా 'మిరాయ్'తో పోల్చి ట్రోల్ చేస్తారు. మరి వీఎఫ్ఎక్స్ సినిమాల విషయంలో ఇక నుంచి అందరూ మరింత శ్రద్ధ తీసుకుంటారేమో చూద్దాం.