- మరో సంచలనానికి సిద్ధమవుతున్న బోయపాటి శ్రీను
- కోలీవుడ్ స్టార్ తో భారీ పాన్ ఇండియా ప్రాజెక్ట్

టాలీవుడ్‌ మాస్ డైరెక్టర్ బోయపాటి శ్రీను (Boyapati Srinu) తదుపరి ప్రాజెక్టుపై గత కొన్ని రోజులుగా సినీ వర్గాల్లో రకరకాల చర్చలు నడుస్తున్నాయి. 'అఖండ-2' తర్వాత ఆయన ఏ హీరోతో సినిమా చేస్తారనే ఆసక్తి అందరిలోనూ నెలకొంది. తాజాగా అందుతున్న సమాచారం ప్రకారం, బోయపాటి ఈసారి ఒక క్రేజీ కోలీవుడ్ స్టార్‌తో చేతులు కలపబోతున్నట్లు తెలుస్తోంది. ఆ స్టార్ ఎవరో కాదు.. కార్తీ (Karthi).

డైరెక్టర్ బోయపాటి శ్రీను తన తర్వాతి సినిమాను కార్తీతో చేయబోతున్నట్లు ఇండస్ట్రీ వర్గాల్లో బలంగా వార్తలు వస్తున్నాయి. తమిళ హీరో కార్తీకి తెలుగులో కూడా మంచి మార్కెట్ ఉండటంతో.. ఈ కాంబినేషన్ న్యూస్ రాగానే ఇరు భాషల ప్రేక్షకుల్లో భారీ అంచనాలు ఏర్పడ్డాయి. ఇది ఒక హై-వోల్టేజ్ యాక్షన్ ఎంటర్‌టైనర్‌గా తెరకెక్కనుందని సమాచారం.

బోయపాటి శ్రీను సినిమాలు అంటేనే భారీ యాక్షన్ సీక్వెన్స్‌లు, పవర్‌ఫుల్ డైలాగులకు కేరాఫ్ అడ్రస్. మరోవైపు హీరో కార్తీ విభిన్నమైన పాత్రలను ఎంచుకుంటూ తనకంటూ ఒక ప్రత్యేక గుర్తింపు తెచ్చుకున్నారు. ఈ ఇద్దరి కలయికలో సినిమా అంటే వెండితెరపై మాస్ విస్ఫోటనమే అని ఫ్యాన్స్ భావిస్తున్నారు. ఇప్పటికే స్క్రిప్ట్ పనులు తుది దశకు చేరుకున్నాయని, త్వరలోనే ఈ ప్రాజెక్టుకు సంబంధించిన అధికారిక ప్రకటన వచ్చే అవకాశం ఉందని తెలుస్తోంది.

ప్రస్తుతం టాలీవుడ్ నుంచి వస్తున్న దాదాపు అన్ని పెద్ద సినిమాలు పాన్ ఇండియా స్థాయిలో విడుదలవుతున్నాయి. ఈ క్రమంలోనే బోయపాటి - కార్తీ సినిమాను కూడా తెలుగు, తమిళంతో పాటు ఇతర భాషల్లోనూ భారీ ఎత్తున విడుదల చేసేందుకు నిర్మాతలు ప్లాన్ చేస్తున్నారట. ఈ చిత్రాన్ని ఒక ప్రముఖ నిర్మాణ సంస్థ భారీ బడ్జెట్‌తో నిర్మించనున్నట్లు సమాచారం.

కార్తీ లాంటి 'పెర్ఫార్మర్‌'కు బోయపాటి శ్రీను మార్క్ 'మాస్ ఎలిమెంట్స్' తోడైతే బాక్సాఫీస్ వద్ద రికార్డులు తిరగరాయడం ఖాయం. 'ఖైదీ', 'సర్దార్' వంటి సినిమాలతో మెప్పించిన కార్తీ, బోయపాటి విజన్‌లో ఎలా కనిపిస్తారో చూడాలని అభిమానులు ఆసక్తిగా ఎదురుచూస్తున్నారు.