టాలీవుడ్ సంగీత ప్రపంచంలో ఒకప్పుడు తనదైన ప్రత్యేకమైన గొంతుతో, ఊపు ఊపేసే పాటలతో ప్రేక్షకులను ఉర్రూతలూగించిన అలనాటి మేటి గాయని ఎల్.ఆర్. ఈశ్వరి (L.R. Eswari). ఆమె పాడితే థియేటర్లలో ఈలలు, గోలలు ఖాయం. క్లబ్ సాంగ్స్ అన్నా, మాస్ బీట్స్ అన్నా అప్పట్లో కేవలం ఈశ్వరి పేరు మాత్రమే వినిపించేది.ఇటీవల ఒక ఇంటర్వ్యూలో మాట్లాడిన ఈ సీనియర్ సింగర్ తన కెరీర్ పీక్స్ లో ఉన్నప్పుడు తనకు ఎలాంటి క్రేజ్ ఉండేదో గుర్తుచేసుకుంటూ ఆసక్తికరమైన వ్యాఖ్యలు చేశారు. 

ఆ రోజుల్లో లెజెండరీ సింగర్స్ అయిన ఎస్.పి. బాలసుబ్రహ్మణ్యం, పి. సుశీల, ఎస్. జానకి వంటి మహామహుల కంటే కూడా తనకే ఎక్కువ క్రేజ్ ఉండేదని ఆమె గర్వంగా చెప్పుకొచ్చారు.నేను ఒకసారి స్టేజ్ ఎక్కానంటే చాలు, అక్కడ వాతావరణమే మారిపోయేది అని ఎల్.ఆర్. ఈశ్వరి అన్నారు. బాలు, సుశీల, జానకి వంటి వారు ఎంతో అద్భుతమైన మెలోడీ పాటలు పాడేవారని, కానీ వారు స్టేజ్ పైన పాడుతున్నప్పుడు ప్రేక్షకులు ఎంతో ప్రశాంతంగా, నిశ్శబ్దంగా కూర్చుని వినేవారని తెలిపారు. కానీ, తాను స్టేజ్ పైకి వచ్చి మైక్ పట్టుకుని ఒక్కసారి పాడటం మొదలుపెడితే, జనాలు కుర్చీల్లో కూర్చోలేకపోయేవారని, థియేటర్లలో మరియు ఆడిటోరియమ్స్‌లో క్లాస్, మాస్ అనే తేడా లేకుండా అందరూ లేచి డాన్సులు చేసేవారని ఆమె ఆనాటి జ్ఞాపకాలను నెమరువేసుకున్నారు.ఆ సమయంలో తనకు వచ్చిన పాపులారిటీ మరియు క్రేజ్ ఇండస్ట్రీలో ఎవరికీ రాలేదని ఆమె స్పష్టం చేశారు. 

అప్పట్లో వందలాది సూపర్ హిట్ సినిమాలలో వందకు పైగా మరుపురాని ఐటెం సాంగ్స్, హై-ఎనర్జీ నంబర్లను ఆమె పాడారు. తన పాట వినపడితే చాలు సినిమా 100 రోజులు ఆడటం గ్యారెంటీ అనే నమ్మకం అప్పటి దర్శకుల్లో, నిర్మాతల్లో ఉండేదని ఆమె పేర్కొన్నారు. ఆ క్రేజ్ వల్లే తనను స్టేజ్ షోల కోసం విదేశాల నుండి సైతం భారీ ఆఫర్లతో ఆహ్వానించేవారని తెలిపారు. ఇప్పటికీ తన పాటల సృష్టించిన వైబ్ టాలీవుడ్‌లో ప్రత్యేకమైనదని, ఆనాటి రోజులు మళ్లీ రావని ఎల్.ఆర్. ఈశ్వరి ఎమోషనల్ అయ్యారు.