బాలీవుడ్ యంగ్ సెన్సేషన్ శనయా కపూర్ (Shanaya Kapoor) తన కెరీర్లో మరో భారీ అవకాశాన్ని దక్కించుకుంది. 'వైవిధ్యమైన కథలను ఎంచుకుంటూ దూసుకుపోతున్న ఈ బ్యూటీ, తాజాగా బాలీవుడ్ యాక్షన్ స్టార్ టైగర్ ష్రాఫ్తో జతకట్టేందుకు సిద్ధమైంది. వీరిద్దరి కలయికలో రాబోతున్న ఈ సినిమా 'జాంబీ కామెడీ' (Zombie Comedy) జోనర్లో తెరకెక్కనుంది.
అహ్మద్ ఖాన్ దర్శకత్వంలో..
ప్రముఖ నిర్మాత ఫిరోజ్ నడియాద్వాలా నిర్మిస్తున్న ఈ భారీ ప్రాజెక్టుకు అహ్మద్ ఖాన్ దర్శకత్వం వహించనున్నారు. అహ్మద్ ఖాన్ గతంలో టైగర్ ష్రాఫ్తో కలిసి 'బాఘీ 2', 'బాఘీ 3', 'హీరోపంతి 2' వంటి యాక్షన్ చిత్రాలను రూపొందించారు. అయితే, ఈసారి వీరిద్దరూ యాక్షన్కు తోడుగా ఫుల్ లెంగ్త్ కామెడీని కూడా జోడించి ప్రేక్షకులను అలరించబోతున్నారు. టైగర్ ష్రాఫ్ ఇప్పటివరకు ఎక్కువగా యాక్షన్ సినిమాలకే పరిమితం కాగా, ఈ సినిమాతో తనలోని కామెడీ యాంగిల్ను కూడా బయటకు తీయనున్నారు.
శనయా కపూర్ జోరు..
సంజయ్ కపూర్ తనయ శనయా కపూర్ ఇదివరకే 'ఆంఖోన్ కి గుస్తాఖియాన్', సర్వైవల్ థ్రిల్లర్ 'తూ యా మైన్' (Tu Yaa Main) వంటి చిత్రాలతో తన అదృష్టాన్ని పరీక్షించుకుంది. ఇప్పుడు ఒక టైగర్ ష్రాఫ్తో కలిసి, బాలీవుడ్లో చాలా అరుదుగా వచ్చే జాంబీ కామెడీ నేపథ్యంలో రాబోతున్న మూవీలో నటించడం ఆమె కెరీర్కు ప్లస్ కానుంది. హిందీలో గతంలో వచ్చిన 'గో గోవా గాన్' తర్వాత సరైన జాంబీ కామెడీ చిత్రం రాలేదు, కాబట్టి ఈ మూవీపై మంచి అంచనాలు ఉన్నాయి.
షూటింగ్ అప్డేట్..
ప్రస్తుతం టైగర్ ష్రాఫ్ 'లగ్ జా గలే' సినిమాతో, దర్శకుడు అహ్మద్ ఖాన్ 'వెల్కమ్ టు ద జంగిల్' పనులతో బిజీగా ఉన్నారు. ఈ కమిట్మెంట్స్ పూర్తి కాగానే, ఈ జాంబీ కామెడీ సినిమా సెట్స్పైకి వెళ్లే అవకాశం ఉంది. టైగర్ యాక్షన్ స్టైల్, శనయా ఫ్రెష్ లుక్స్ ఈ సినిమాకు ప్రధాన ఆకర్షణగా నిలవనున్నాయి. మొత్తానికి, ఒక విభిన్నమైన జోనర్లో వస్తున్న ఈ సినిమా బాక్సాఫీస్ వద్ద ఎలాంటి సంచలనం సృష్టిస్తుందో చూడాలి.
