మూవీ: వివేకానందన్ వైరల్
నటీనటులు: షైన్ టామ్ చాకో, శ్వాసిక విజయ్, గ్రేస్ ఆంటోని, మెరీనా మైఖేల్, రమ్య సురేష్, మంజు పిళ్ళై, పార్వతీ మలా, నీనా కురుప్ తదితరులు
ఎడిటింగ్: రంజన్ అబ్రహం
సినిమాటోగ్రఫీ: ప్రకాష్ వేలాయుదన్
మ్యూజిక్: బిజ్బల్
నిర్మాతలు: :నెడియత్ నసీబ్, పిఎస్ షెల్లీరాజ్
రచన, దర్శకత్వం: కమల్ 

దసరా మూవీలో తన విలనిజంతో తెలుగు ప్రేక్షకులలో స్ట్రాంగ్ ఇంపాక్ట్ తెచ్చుకున్న షైన్ టామ్ చాకోకి మలయాళంలో మంచి క్రేజ్ ఉంది. గతేడాది మలయాళంలో రిలీజై అక్కడ విజయం అందుకున్న మూవీ ' వివేకానందన్ వైరల్'. ఈ మూవీని ప్రస్తుతం ఆహాలో స్ట్రీమింగ్ అవుతోంది. మరి ఈ మూవీ కథేంటో ఓసారి చూసేద్దాం...

కథ:

వివేకనందన్(షైన్ టామ్ చాకో) కేరళలోని ఓ ఊర్లో భార్య సితార, తల్లితో కలిసి ఉంటాడు. అక్కడ ఒక గవర్నమెంట్ ఆఫీస్ లో జాబ్ చేస్తుంటాడు. అయితే వివేకానందన్ కి డయానా అనే మరో అమ్మాయితో వివాహేతర సంబంధం కూడా ఉంటుంది. ఇలా ఇద్దరు భార్యలను చేసుకొని వాళ్లను వేధిస్తూ లైఫ్ ని ఎంజాయ్ చేస్తుంటాడు. ఇంకా అతను బలానికి లేహ్యం తింటుంటాడు. దానివల్ల ఇద్దరి భార్యలని శారీరకంగా హింసిస్తుంటాడు. ఇక అతని బాధని తట్టుకోలేక డయాన తన ఫ్రెండ్ సాయం కోరగా, వివేకానందన్ వాళ్ళ భార్యని కలవమని చెప్తుంది. అతని నిజస్వరూపం తెలుసుకున్న వాళ్లంతా కలిసి ఏం చేశారు? వివేకానందన్ ఎలాంటి చిక్కుల్లో పడతాడనేది మిగతా కథ.

విశ్లేషణ:

ఈ కథ కామెడీ జానర్ లో తెరకెక్కించినప్పటికి ఒక సీరియస్ మెసెజ్ ని ఇస్తుంది. అయితే ఇది ఫ్యామిలీతో కలిసి చూడలేని సినిమా. భార్యాభర్తల మధ్య సాగే కొన్ని సీన్లని చూపించారు. అది కాస్త ఇబ్బందికరంగా ఉంటుంది. వివేకానందన్ కి కనపడిన ప్రతీ అమ్మాయితో వివాహేతర సంబంధం పెట్టుకోవాలని చూడటం, దానివల్ల అతనికి ఎదుర్కొన్న ప్రాబ్లమ్స్ ని చక్కగా చూపించారు. అయితే ఈ సినిమాలో కామెడీ లోపించింది.

డ్రామా అనేది రెండు గంటల పాటు సాగుతుంది. అయితే ఇలా అంతసేపు ఒకే కంటెంట్ పై సాగడం కాస్త ఇబ్బందిగానే ఉంటుంది. తన భార్య శరీరంపై భర్తకి సర్వ హక్కులు ఉన్నాయనే ధోరణిలో అతని పైశాచికత్వాన్ని చూపించిన దర్శకుడు... ముగ్గురు అమ్మాయిలు కలిసి అతనికి స్వేచ్ఛ లేకుండా చేయడాన్ని ఎలా యాక్సెప్ట్ చేశారో తెలియదు. ఇది వన్ సైడెడ్ గా సాగే కథ. భార్యాభర్తల మధ్య మరో వ్యక్తి రావడం దానిని పదేపదే చూపించడం.. ఎంతమాత్రం కథ ముందుకు సాగకుండా అక్కడిక్కడే తిరుగుతూ ఉంటుంది. 

భార్యాభర్తల మధ్య సాగే ఓ సీరియస్ ఇష్యూని ఏకంగా లైవ్ ఇవ్వడం.. అతడిని బ్యాడ్ అంటూ వైరల్ చేయడం కాస్త లాజిక్ లెస్ గా ఉంటుంది. అశ్లీల దృశ్యాలు ఎక్కువగా ఉండటంతో అడల్ట్స్ మాత్రమే దీనిని చూడొచ్చు. కామెడీ, ఎంటర్టైన్మెంట్ ఉంటుందనుకొని చూస్తే పొరపాటే అవుతుంది. అంతలా ఏం లేదు. సినిమాటోగ్రఫీ ఒకే. మ్యూజిక్ పర్వాలేదు . నిర్మాణ విలువలు బాగున్నాయి.

నటీనటుల పనితీరు: 

వివేకానందన్ గా షైన్ టామ్ చాకో నటన ఆకట్టుకుంది. ఇక మిగతా వారంతా వారి పాత్రలకి పూర్తి న్యాయం చేశారు.

ఫైనల్ గా : బోరింగ్ వివేకానందన్ వైరల్... పెద్దవాళ్ళలకి మాత్రమే.

రేటింగ్ : 2. / 5

✍️. దాసరి మల్లేష్