Top Stories

రైతు బిడ్డగా మరోసారి నిరూపించిన మంత్రి నిమ్మల రామానాయుడు

బెంగాల్‌లో తీవ్ర ఉద్రిక్తత...టీఎంసీ ఎంపీపై దాడి తలకు తీవ్ర గాయం!

నకిలీ జీఓలతో ప్రభుత్వ భూమి కాజేసే కుట్ర భగ్నం

ముగ్గురిని కాపాడి...తాను ప్రాణాలు కోల్పోయిన తెలుగు విద్యార్థి

బాసర టూ భద్రాచలం.. ఆలయాల కోసం రూ.1000 కోట్లు : మంత్రి పొంగులేటి

అభిషేక్ బెనర్జీపై దాడి...సీఈవోకు మమత వార్నింగ్

చార్‌ధామ్‌ యాత్రలో భారీ ట్రాఫిక్‌ జామ్‌.. భక్తుల నరక యాతన

తెలంగాణ ఉద్యోగులకు గుడ్ న్యూస్...ఈహెచ్ఎస్ హెల్త్ కార్డులపై కీలక నిర్ణయం!

హిమాచల్‌ప్రదేశ్‌లో ఘోర ప్రమాదం...8 మంది దుర్మరణం

రైతు బిడ్డగా మరోసారి నిరూపించిన మంత్రి నిమ్మల రామానాయుడు

7 కిలోమీటర్ల సైకిల్‌పై ప్రయాణించి స్వగ్రామానికి చేరుకున్నారు.. రొయ్యలకు మేత వేసి, పొలంలో దుక్కి దున్ని.. సైకిల్‌పై ప్రయాణించి, తన పొలంలో ట్రాక్టర్‌తో దుక్కి.. ఏపీ జలవనరుల శాఖ మంత్రి నిమ్మల రామానాయుడు మరోసారి తన రైతు మనసును చాటుకున్నారు. అధికార హోదా, ప్రోటోకాల్‌ను పక్కనపెట్టి స్వగ్రామం అగర్తిపాలెంలో వ్యవసాయ పనుల్లో పాల్గొన్నారు. ఇవాళ ప్రభుత్వ కార్యక్రమాలకు విరామం ఉండటంతో పాలకొల్లు నుంచి సుమారు 7 కిలోమీటర్ల దూరాన్ని సైకిల్‌పై ప్రయాణించి స్వగ్రామానికి చేరుకున్నారు. మార్గమధ్యంలో ప్రజలను కలుసుకుని వారి యోగక్షేమాలు తెలుసుకున్నారు. గ్రామానికి చేరుకున్న అనంతరం తన సొంత రొయ్యల చెరువును సందర్శించిన మంత్రి, మేత వేసి రొయ్యల ఎదుగుదలను పరిశీలించారు. అనంతరం పొలంలోకి వెళ్లి కూలీలతో కలిసి ట్రాక్టర్‌పై దుక్కి దున్నారు. వ్యవసాయ పనుల్లో నేరుగా పాల్గొని రైతులతో మమేకమయ్యారు.మంత్రి నిమ్మల రామానాయుడు సాధారణ రైతులా వ్యవహరించడం స్థానికులను ఆకట్టుకుంది. ప్రజల మధ్య కలిసిమెలిసి వ్యవసాయ పనులు చేయడాన్ని పలువురు అభినందిస్తున్నారు. సాధారణంగా మంత్రులు, ప్రజాప్రతినిధులు పర్యటనలకు వచ్చినప్పుడు కాన్వాయ్‌లు, భారీ భద్రతతో హడావుడి కనిపిస్తుంది. కానీ, రామానాయుడు మాత్రం వీటన్నింటికీ భిన్నంగా చాలా సాధారణంగా వ్యవసాయ క్షేత్రానికి చేరుకున్నారు. తన సొంత ఊరి మట్టితో ఉన్న అనుబంధాన్ని చాటుకుంటూ ఆయన చేసిన ఈ పని స్థానికులను ఎంతగానో ఆకట్టుకుంది. పొలంలో పనులు చేస్తున్న సమయంలో స్థానిక రైతులు, కూలీలతో మంత్రి ఎంతో ఆప్యాయంగా మాట్లాడారు. ప్రస్తుతం వ్యవసాయ రంగంలో ఎదురవుతున్న సవాళ్లు, సాగునీటి లభ్యత, విత్తనాలు, ఎరువుల సరఫరా వంటి పలు కీలక అంశాలపై వారితో చర్చించారు. క్షేత్రస్థాయిలో సమస్యలను స్వయంగా తెలుసుకోవడానికే తాను ఇలా వచ్చానని ఆయన పేర్కొన్నారు. మంత్రి నిమ్మల రామానాయుడు తీసుకున్న ఈ వినూత్న నిర్ణయంపై సోషల్ మీడియాలోనూ, రాజకీయ వర్గాల్లోనూ పెద్ద ఎత్తున ప్రశంసలు వ్యక్తమవుతున్నాయి. పదవులు వస్తుంటాయి, పోతుంటాయి కానీ మాతృభూమిని, వ్యవసాయాన్ని మరువకూడదనే సందేశాన్ని ఆయన ఈ చర్య ద్వారా ఇచ్చారని నెటిజన్లు కొనియాడుతున్నారు. మరోవైపు సొంత ఊరి ప్రజలు సైతం తమ ప్రాంతానికి చెందిన వ్యక్తి మంత్రి అయినప్పటికీ, పాత రోజులను గుర్తుచేసుకుంటూ తమతో కలిసిపోవడం ఆనందంగా ఉందని హర్షం వ్యక్తం చేస్తున్నారు. నిమ్మల రామానాయుడు ఎప్పుడూ ప్రజల్లో ఉండేందుకే ఇష్టపడతారని ఈ ఘటనతో మరోసారి రుజువైందని స్థానిక నేతలు అంటున్నారు. రైతు సంక్షేమమే ధ్యేయంగా కూటమి ప్రభుత్వం పనిచేస్తోందని, సాగునీటి రంగాన్ని బలోపేతం చేసేందుకు ప్రణాళికలు సిద్ధం చేస్తున్నామని మంత్రి ఈ సందర్భంగా భరోసా ఇచ్చారు. రాబోయే రోజుల్లో క్షేత్రస్థాయి పర్యటనల ద్వారా మరిన్ని సమస్యలను పరిష్కరించి, అన్నదాతలకు అండగా ఉంటామని ప్రజలు ఆశిస్తున్నారు.

Publish Date: May 31, 2026 4:06PM

బెంగాల్‌లో తీవ్ర ఉద్రిక్తత...టీఎంసీ ఎంపీపై దాడి తలకు తీవ్ర గాయం!

పశ్చిమ బెంగాల్ రాజకీయాలు మరోసారి తీవ్రమైన ఉద్రిక్తతలకు వేదికగా మారాయి. రాష్ట్రంలో అధికార భారతీయ జనతా పార్టీ (బీజేపీ) ప్రతిపక్ష తృణమూల్ కాంగ్రెస్ (టీఎంసీ) కార్యకర్తల మధ్య జరిగిన ఘర్షణలు తీవ్ర హింసాత్మకంగా మారాయి. ఆదివారం (మే 31) హుగ్లీ జిల్లాలోని చండితాల పోలీస్ స్టేషన్ పరిసర ప్రాంతం ఒక్కసారిగా రణరంగమైంది. టీఎంసీ నాయకులు, కార్యకర్తల అరెస్టులను నిరసిస్తూ పోలీస్ స్టేషన్ ఎదుట టీఎంసీ శ్రేణులు భారీ ధర్నాకు దిగాయి. ఈ క్రమంలో అక్కడికి చేరుకున్న బీజేపీ కార్యకర్తలు ఒక్కసారిగా వ్యతిరేక నినాదాలు చేయడంతో ఇరు వర్గాల మధ్య తీవ్ర వాగ్వాదం మొదలైంది. ఈ వాగ్వాదం కాస్తా కొద్దిసేపట్లోనే పరస్పర దాడులకు దారితీసింది. ఇరు పార్టీల నాయకులు, కార్యకర్తలు ఒకరిపై ఒకరు దాడులు చేసుకుంటున్న క్రమంలో అక్కడే ఉన్న టీఎంసీ సీనియర్ ఎంపీ కల్యాణ్ బెనర్జీకి తీవ్ర గాయాలయ్యాయి. ఈ ఘర్షణల్లో ఆయన తలకు బలమైన గాయం కావడంతో ఒక్కసారిగా కలకలం రేగింది. పశ్చిమ బెంగాల్ వ్యాప్తంగా ఈ ఘటన సంచలనంగా మారింది. బెంగాల్ రాజకీయాల్లో కేవలం 24 గంటల వ్యవధిలోనే ఇద్దరు కీలకమైన టీఎంసీ ఎంపీలపై వరుస దాడులు జరగడం ఇక్కడి శాంతిభద్రతల పరిస్థితిని కళ్ళకు కడుతోంది. శనివారం నాడే టీఎంసీ ఎంపీ, పశ్చిమ బెంగాల్ మాజీ ముఖ్యమంత్రి మమతా బెనర్జీ మేనల్లుడు అయిన అభిషేక్ బెనర్జీపై సోనాపూర్‌లో కొందరు దుండగులు కోడిగుడ్లు, టమాటాలతో దాడికి తెగబడ్డారు. ఎన్నికల అనంతరం జరిగిన అల్లర్లలో బాధితులను పరామర్శించేందుకు వెళ్లిన సమయంలో అభిషేక్ బెనర్జీకి ఈ చేదు అనుభవం ఎదురైంది. ఈ దాడికి సంబంధించిన విజువల్స్, వీడియోలు సోషల్ మీడియాలో విపరీతంగా వైరల్ అయ్యాయి. ఈ ఘోర పరాభవం జరిగి 24 గంటలు కూడా గడవక ముందే, ఆదివారం నాడు మరో ఎంపీ కల్యాణ్ బెనర్జీపై దాడి జరగడం, ఆయన రక్తం చిందించేలా తలకు గాయం కావడం రాజకీయ వర్గాలను తీవ్ర ఆందోళనకు గురిచేస్తోంది. తనపై జరిగిన దాడిపై ఎంపీ అభిషేక్ బెనర్జీ తీవ్రంగా స్పందించారు. ఈ దాడి పూర్తిగా ముందస్తు ప్రణాళికతో, పక్కా స్కెచ్ ప్రకారం జరిగిందని ఆయన ఆరోపించారు. ఘటన జరిగిన సమయంలో అక్కడ కనీసం పోలీసులు కూడా లేకపోవడంపై ఆయన తీవ్ర విమర్శలు గుప్పించారు. స్థానిక యంత్రాంగం ఉద్దేశపూర్వకంగానే నిర్లక్ష్యం వహించిందని మండిపడ్డారు. ఈ దాడి అనంతరం ఆయన కోల్‌కతాలో అత్యవసర చికిత్స పొందాల్సి వచ్చింది. అయితే, చికిత్స ముగిసిన వెంటనే ఆయన వెనక్కి తగ్గకుండా తన పర్యటనను యథావిధిగా కొనసాగించారు. ఇదిలా ఉండగా, రాజకీయంగా దాడులు ఎదుర్కొంటున్న అభిషేక్ బెనర్జీకి చట్టపరమైన చిక్కులు కూడా తోడయ్యాయి. అదే రోజున నకిలీ సంతకాల కేసుకు సంబంధించి పశ్చిమ బెంగాల్ సీఐడీ విభాగం నుంచి ఆయనకు కీలకమైన నోటీసులు అందడం గమనార్హం. వరుసగా జరుగుతున్న ఈ రాజకీయ దాడులు పశ్చిమ బెంగాల్‌లో రాబోయే రోజుల్లో ఎలాంటి పరిణామాలకు దారితీస్తాయోనన్న భయాందోళనలు రేకెత్తిస్తున్నాయి. చండితాల పోలీస్ స్టేషన్ పరిధిలో పరిస్థితిని అదుపు చేయడానికి పోలీసులు అదనపు బలగాలను రంగంలోకి దించారు. ఒకవైపు దాడులు, మరోవైపు సీఐడీ నోటీసులతో బెంగాల్ రాజకీయ వాతావరణం పూర్తిగా వేడెక్కింది. ఈ వరుస దాడులపై టీఎంసీ అధిష్ఠానం తీవ్ర ఆగ్రహం వ్యక్తం చేస్తోంది. ప్రతిపక్షాల కుట్రలను ప్రజల్లోకి తీసుకెళ్తామని స్పష్టం చేస్తోంది.

Publish Date: May 31, 2026 3:26PM

నకిలీ జీఓలతో ప్రభుత్వ భూమి కాజేసే కుట్ర భగ్నం

హైదరాబాద్ శివారులోని గండిపేట ప్రాంతంలో కోట్ల రూపాయల విలువైన ప్రభుత్వ భూమిని నకిలీ పత్రాలతో కాజేసి విక్రయించేందుకు ప్రయత్నించిన భారీ భూ మోసాన్ని షేర్ లింగంపల్లి పోలీసులు ఛేదించారు. ఈ కేసులో ప్రధాన నిందితులుగా ఉన్న నిమ్మల కుటుంబ సభ్యులతో పాటు పలువురిపై కేసులు నమోదు చేసి, ముగ్గురిని అరెస్ట్ చేశారు. మరోవైపు మాజీ ఎమ్మెల్యేతో సహా పలువురు నిందితులు పరారీలో ఉన్నట్లు పోలీసులు వెల్లడించారు. షేర్ లింగంపల్లి డీసీపీ శ్రీనివాస్ మీడియా సమావేశంలో వెల్లడించిన వివరాల ప్రకారం.. వెల్లి రాధాకృష్ణ అనే వ్యక్తి అడ్వకేట్ అయినప్పటికీ తాను సచివాలయంలో ఉద్యోగిగా, అసిస్టెంట్ కలెక్టర్‌గా పనిచేస్తున్నట్లు ప్రజలను నమ్మించే ప్రయత్నం చేశాడు. తన పేరుకు చివర "డాక్టర్" అనే పదాన్ని కూడా జోడించుకొని పలువురిని మోసం చేసినట్లు గుర్తించారు.గండిపేట పరిధిలోని సర్వే నెంబర్ 18లో ఉన్న ప్రభుత్వ పోరంబోకు భూమిపై హక్కులు ఉన్నట్లు చూపిస్తూ నిమ్మల కుటుంబ సభ్యులు చాలా కాలంగా క్లెయిమ్ చేస్తున్నారు. ఇందుకోసం నకిలీ జీఓలు, ఫోర్జరీ పత్రాలు సృష్టించి భూమి తమ పేరుపై క్రమబద్ధీకరించబడిందని ప్రచారం చేశారు. ఐదు నకిలీ ప్రభుత్వ ఉత్తర్వులు (జీఓలు) తయారు చేసి వాటిని వాట్సాప్, సోషల్ మీడియా వేదికల ద్వారా వైరల్ చేశారు. భూమి యాజమాన్య హక్కుల కోసం నిందితులు హైకోర్టును ఆశ్రయించినప్పటికీ, 2025 అక్టోబర్‌లో వారి పిటిషన్లను కోర్టు కొట్టివేసింది. అయినప్పటికీ చట్టబద్ధమైన హక్కులు లేకుండానే ఎకరాకు రూ.3.5 కోట్ల చొప్పున భూమిని విక్రయించేందుకు కుట్ర పన్నినట్లు దర్యాప్తులో బయటపడింది. ఈ అక్రమ భూ డీల్‌లో వినుకొండకు చెందిన వైసీపీ మాజీ ఎమ్మెల్యే బొల్లా బ్రహ్మనాయుడు పేరు కూడా వెలుగులోకి వచ్చింది. నిందితులు బొల్లా బ్రహ్మనాయుడు, బొల్లా రమేష్‌లతో భూమి అమ్మకానికి ఒప్పందాలు కుదుర్చుకున్నట్లు పోలీసులు గుర్తించారు. బ్రహ్మనాయుడు నుంచి నిమ్మల కుటుంబ సభ్యుల ఖాతాలకు రెండు విడతల్లో రూ.1 కోటి, రూ.25 లక్షలు బదిలీ అయినట్లు ఆధారాలు లభించాయి. మొత్తంగా ఈ అక్రమ భూ వ్యవహారంలో రూ.1500 కోట్లకు పైగా చేతులు మారినట్లు పోలీసులు అనుమానిస్తున్నారు. తహసీల్దార్ ఫిర్యాదు మేరకు కేసు నమోదు చేసిన పోలీసులు కోర్టు అనుమతితో నిందితుల ఇళ్లలో సోదాలు నిర్వహించారు. ఈ సందర్భంగా బ్యాంక్ పాస్‌బుక్స్, మొబైల్ ఫోన్లు, ల్యాప్‌టాప్‌లు సహా కీలక ఆధారాలను స్వాధీనం చేసుకున్నారు. ఈ కేసులో నిమ్మల రాజేష్ గౌడ్, నిమ్మల వేణుగోపాల్, నిమ్మల సాయికిరణ్‌లను అరెస్ట్ చేసినట్లు పోలీసులు తెలిపారు. బొల్లా రమేష్, మాజీ ఎమ్మెల్యే బొల్లా బ్రహ్మనాయుడు, సునీల్ ప్రస్తుతం పరారీలో ఉన్నారని, వారి కోసం గాలింపు చర్యలు కొనసాగుతున్నాయని వెల్లడించారు. ప్రభుత్వ భూములను నకిలీ పత్రాలతో కాజేసే ప్రయత్నాలపై కఠిన చర్యలు తీసుకుంటామని, ఈ కేసులో మరిన్ని వివరాలు వెలుగులోకి వచ్చే అవకాశం ఉందని డీసీపీ శ్రీనివాస్ తెలిపారు.

Publish Date: May 31, 2026 3:06PM

ముగ్గురిని కాపాడి...తాను ప్రాణాలు కోల్పోయిన తెలుగు విద్యార్థి

ఉన్నత చదువులు, కుటుంబ ఆశయాలు, భవిష్యత్తుపై ఎన్నో కలలతో అమెరికా వెళ్లిన ఓ తెలుగు యువకుడు.. ముగ్గురు స్నేహితుల ప్రాణాలను కాపాడి తన ప్రాణాలను త్యాగం చేసిన ఘటన హృదయాలను కలచివే స్తోంది. అతను మృతి చెందడంతో స్వగ్రామంలో విషాద ఛాయలు అలుముకున్నాయి. రంగారెడ్డి జిల్లా అబ్దుల్లాపూర్‌మెట్ మండలం కవాడిపల్లి గ్రామానికి చెందిన అనూప్ రెడ్డి కోటి ఆశలతో అమెరికాకు వెళ్ళాడు. అనూప్ రెడ్డి అమెరికాలోని University of North Texas లో కంప్యూటర్ సైన్స్‌లో ఉన్నత విద్య అభ్యసిస్తున్నాడు. అమెరికాలోని లూసియాలో ఉన్న టోరోడో పార్క్ సమీపంలోని సెబాన్ రివర్‌కు తన ముగ్గురు స్నేహితులతో కలిసి విహారయాత్రకు వెళ్లాడు. వేసవి వేడి నుంచి ఉపశమనం పొందేందుకు నదిలో ఈతకు దిగిన వారు కొంతసేపటికే ప్రమాదంలో చిక్కుకున్నారు. నీటి ప్రవాహం తీవ్రంగా ఉండటంతో ముగ్గురు స్నేహితులు ఆందోళనకు గురయ్యారు.ఆ క్లిష్ట సమయంలో ఏమాత్రం వెనుకాడకుండా అనూప్ రెడ్డి వారిని ఒక్కొక్కరిని సురక్షితంగా ఒడ్డుకు చేర్చేందుకు ప్రయత్నించాడు. తన ప్రాణాలను సైతం లెక్కచేయకుండా ముగ్గురు స్నేహితులను రక్షించడంలో విజయం సాధించాడు. అయితే వారిని కాపాడి తాను ఒడ్డుకు చేరుకునే క్రమంలో ఊహించని విషాదం చోటుచేసుకుంది. నదిలో ఉన్న ఫిషింగ్ వైరు అనూప్ కాలుకు చుట్టుకోవడంతో అతడు నీటిలో చిక్కుకుపోయాడు. బయటపడేందుకు ఎంత ప్రయత్నించినా సాధ్యంకాకపోవడంతో చివరకు నీటిలోనే మునిగి ప్రాణాలు కోల్పోయాడు. తన స్నేహితుల ప్రాణాలను కాపాడిన హీరోగా నిలిచిన అనూప్, అదే సమయంలో మృత్యువు బారిన పడటం అందరినీ కంటతడి పెట్టిస్తోంది. చదువులో ప్రతిభ కనబరుస్తూ కుటుంబ సభ్యుల ఆశలను నెరవేర్చేందుకు కృషి చేస్తున్న అతని అకాల మరణం తల్లిదండ్రులు, బంధువులు, స్నేహితులను తీవ్ర విషాదంలోకి నెట్టింది. ఈ విషాద వార్త కవాడిపల్లి గ్రామానికి చేరుకోవడంతో గ్రామమంతా శోకసంద్రంగా మారింది. విదేశాల్లో ఉన్న తమ కుమారుడు గొప్ప స్థాయికి చేరుకుంటాడని కలలు కన్న తల్లిదండ్రులు కన్నీరుమున్నీరవుతున్నారు. గ్రామస్థులు, బంధువులు అనూప్ ధైర్యసాహసాలను కొనియాడుతూ ఆయనకు నివాళులర్పిస్తున్నారు. ముగ్గురు ప్రాణాలను కాపాడి.. తన ప్రాణాన్ని అర్పించిన అనూప్ రెడ్డి త్యాగం ఎన్నటికీ మరువలేనిదిగా నిలిచిపోనుంది. ఆయన మరణం విషాదాన్ని మిగిల్చినా, స్నేహితుల కోసం ప్రాణాలను సైతం లెక్కచేయని ధైర్యవంతుడిగా అందరి హృదయాల్లో చిరస్థాయిగా నిలిచిపోతాడు.

Publish Date: May 31, 2026 1:39PM

బాసర టూ భద్రాచలం.. ఆలయాల కోసం రూ.1000 కోట్లు : మంత్రి పొంగులేటి

తెలంగాణ సంస్కృతి, సంప్రదాయాలకు ప్రతీకలైన ఆధ్యాత్మిక క్షేత్రాల రూపురేఖలను మార్చేందుకు రాష్ట్ర ప్రభుత్వం చారిత్రాత్మక నిర్ణయం తీసుకుంది. బాసర నుంచి భద్రాచలం వరకు ఉన్న ప్రముఖ పుణ్యక్షేత్రాలు, దేవాలయాల సర్వాంగ సుందర అభివృద్ధి కోసం మొదటి విడత కింద ఏకంగా రూ.1000 కోట్ల భారీ నిధులను విడుదల చేసినట్లు రాష్ట్ర రెవెన్యూ, సమాచార శాఖ మంత్రి పొంగులేటి శ్రీనివాస్ రెడ్డి ప్రకటించారు. కేవలం మాటలకే పరిమితం కాకుండా క్షేత్రస్థాయిలో నిధుల కేటాయింపులు జరుపుతూ, రాష్ట్రవ్యాప్తంగా అభివృద్ధి పనులను అత్యంత వేగంగా పరుగులు పెట్టిస్తున్నామని ఆయన స్పష్టం చేశారు. ఆధ్యాత్మికతను కాపాడుతూనే, భక్తులకు అంతర్జాతీయ స్థాయి వసతులు కల్పించడమే తమ ప్రజా ప్రభుత్వ ముఖ్య ఉద్దేశమని వెల్లడించారు. ముఖ్యంగా దక్షిణ అయోధ్యగా పేరొందిన భద్రాచలం రామాలయ అభివృద్ధిపై మంత్రి పొంగులేటి ప్రత్యేకంగా మాట్లాడారు. గత ప్రభుత్వం పదేళ్ల కాలంలో భద్రాచలం క్షేత్రానికి ఒక్క పైసా కూడా విదిల్చలేదని ఆయన తీవ్రస్థాయిలో ధ్వజమెత్తారు. కానీ, తమ ప్రజా ప్రభుత్వం బాధ్యతలు చేపట్టిన వెంటనే భద్రాద్రి రామయ్య ఆలయ పునరుద్ధరణ, భక్తుల సౌకర్యాల కోసం రూ.350 కోట్లను మంజూరు చేసిందని సగర్వంగా ప్రకటించారు. కేవలం నిధులు కేటాయించడమే కాకుండా, వచ్చే ఏడాది రాబోయే అత్యంత ప్రతిష్టాత్మకమైన గోదావరి పుష్కరాల నాటికి ఈ పనులన్నింటినీ పూర్తి చేసి, భక్తులకు అందుబాటులోకి తీసుకువస్తామని గడువును కూడా నిర్దేశించారు. ఆధ్యాత్మిక పర్యాటక రంగంలో తెలంగాణను అగ్రస్థానంలో నిలబెట్టేందుకు ప్రభుత్వం భారీ ప్రణాళికలతో ముందుకు సాగుతోంది. ఇందులో భాగంగానే ఇటీవల ముగిసిన మేడారం సమ్మక్క-సారలమ్మ జాతరను అత్యంత వైభవంగా, అద్భుతంగా నిర్వహించామని మంత్రి గుర్తుచేశారు. గిరిజన కుంభమేళాగా పిలిచే మేడారం పరిసరాల శాశ్వత అభివృద్ధి కోసం ప్రభుత్వం రూ.300 కోట్లను ఖర్చు చేసిందని గణాంకాలతో సహా వివరించారు. దీనితో పాటు ఖమ్మం జిల్లా కూసుమంచిలోని చారిత్రాత్మక కాకతీయ కాలపు శివాలయం వైభవాన్ని పునరుద్ధరించేందుకు మరియు దాని సమగ్ర అభివృద్ధికి రాష్ట్ర ప్రభుత్వం పూర్తి స్థాయిలో కట్టుబడి ఉందని భరోసా ఇచ్చారు. రాష్ట్రంలో కొందరు దేవుడి పేరిట, గుళ్ల పేరిట రాజకీయాలు చేయాలని చూస్తున్నారంటూ ప్రతిపక్షాలపై మంత్రి పొంగులేటి శ్రీనివాస్ రెడ్డి తీవ్ర విమర్శలు గుప్పించారు. రాష్ట్రవ్యాప్తంగా కళ్లముందే ఎన్నో అద్భుతమైన సంక్షేమ, అభివృద్ధి కార్యక్రమాలు జరుగుతుంటే ఓర్వలేక, కొన్ని రాజకీయ పార్టీలు మతాన్ని అడ్డం పెట్టుకుని పబ్బం గడుపుకోవాలని చూస్తున్నాయని మండిపడ్డారు. తమ ప్రభుత్వం ఏ ఒక్క మతానికో పరిమితం కాలేదని, అన్ని మతాలను సమానంగా చూస్తూ మతాలకు అతీతంగా ఆలయాలు, చర్చిలు, మసీదులను సమానంగా అభివృద్ధి చేస్తామని స్పష్టం చేశారు. సమాజంలో మత సామరస్యాన్ని కాపాడుతూనే, క్షేత్రస్థాయిలో నిజమైన ప్రగతిని సాధించి చూపిస్తామని మంత్రి పొంగులేటి ధీమా వ్యక్తం చేశారు.

Publish Date: May 31, 2026 1:29PM

అభిషేక్ బెనర్జీపై దాడి...సీఈవోకు మమత వార్నింగ్

పశ్చిమ బెంగాల్ రాజకీయం మరోసారి హీటెక్కింది. తృణమూల్ కాంగ్రెస్ కీలక నేత అభిషేక్ బెనర్జీపై జరిగిన దాడి ఉదంతం.. ప్రస్తుతం అధికార, ప్రతిపక్షాల మధ్య తీవ్ర స్థాయి ఘర్షణకు దారితీసింది. ఈ క్రమంలోనే కోల్‌కతాలోని ఓ ప్రముఖ ప్రైవేట్ ఆసుపత్రి చీఫ్ ఎగ్జిక్యూటివ్ ఆఫీసర్ తో మాజీ ముఖ్యమంత్రి మమతా బెనర్జీ మాట్లాడినట్లు చెబుతున్న ఒక ఆడియో క్లిప్ సామాజిక మాధ్యమాల్లో ప్రత్యక్షమవ్వడం కలకలం రేపుతోంది. తీవ్ర గాయాలపాలైన అభిషేక్ బెనర్జీ ప్రస్తుతం కోల్‌కతాలోని ప్రఖ్యాత బెల్ వ్యూ ఆసుపత్రిలో చికిత్స పొందుతున్నారు. అయితే, ఆయన ఆరోగ్య పరిస్థితి విషమంగా ఉన్నప్పటికీ, డిశ్చార్జ్ చేయాలంటూ భారతీయ జనతా పార్టీ నాయకులతో పాటు ఒక సీనియర్ పోలీస్ అధికారి ఆసుపత్రి యాజమాన్యంపై విపరీతమైన ఒత్తిడి తీసుకువచ్చారని మమతా బెనర్జీ ఆరోపిస్తున్నారు. ఈ నేపథ్యంలోనే బెల్ వ్యూ ఆసుపత్రి సీఈవో ప్రదీప్ టాండన్‌తో మమతా బెనర్జీ మాట్లాడిన ఆడియో వెలుగులోకి వచ్చింది. తన మేనల్లుడి ప్రాణాలకు ఏమాత్రం ముప్పు వాటిల్లినా దానికి పూర్తి బాధ్యత ఆసుపత్రి యాజమాన్యానిదేనంటూ ఆమె ఆ ఫోన్ సంభాషణలో గట్టిగా హెచ్చరించినట్లు స్పష్టమవుతోంది. వైద్య సేవల విషయంలో రాజకీయ ఒత్తిళ్లకు లొంగిపోవడంపై మమత తీవ్ర అభ్యంతరం వ్యక్తం చేశారు. గతంలో తాము చేసిన సాయాన్ని గుర్తుంచుకోవాలని, ప్రస్తుత ప్రవర్తనను దేవుడు కూడా క్షమించడని సదరు సీఈవోకు ఆమె స్పష్టం చేసినట్లు ఆడియో ద్వారా తెలుస్తోంది. బీజేపీ నాయకుల మాటలు విని తప్పుదోవ పట్టవద్దని, ఇప్పుడు వారు అధికారంలో ఉన్నంత మాత్రాన శాశ్వతం కాదని మమతా బెనర్జీ వ్యాఖ్యానించారు. భవిష్యత్తులో అధికార మార్పిడి జరిగినప్పుడు తాము తీసుకోవాల్సిన చర్యలు తీసుకుంటామని సంచలన హెచ్చరికలు జారీ చేశారు. ప్రస్తుతం ఈ ఆడియో క్లిప్ పశ్చిమ బెంగాల్ వ్యాప్తంగా పెను రాజకీయ దుమారాన్ని రేపుతోంది. ఒక ప్రైవేట్ సంస్థ అధిపతిని ఈ విధంగా బెదిరించడం సరికాదని ప్రతిపక్షాలు మండిపడుతుండగా, ఒక రోగి ప్రాణాలతో ఆడుకోవాలని చూస్తే చూస్తూ ఊరుకోబోమని టీఎంసీ శ్రేణులు సమర్థిస్తున్నాయి. మరోవైపు, అభిషేక్ బెనర్జీపై జరిగిన దాడిని సీరియస్‌గా తీసుకున్న పోలీసులు ఇప్పటికే రంగంలోకి దిగి విచారణ చేపట్టారు. ఈ దాడి ఉదంతానికి సంబంధించి ఇప్పటివరకు ఐదుగురు అనుమానితులను అదుపులోకి తీసుకుని విచారిస్తున్నట్లు పోలీస్ వర్గాలు వెల్లడించారు. ప్రస్తుతం అభిషేక్ బెనర్జీకి ఇంటి వద్దే ప్రత్యేక వైద్య బృందం పర్యవేక్షణలో చికిత్స అందిస్తున్నట్లు తెలుస్తోంది. ఈ ఆడియో లీక్ వ్యవహారం రానున్న రోజుల్లో బెంగాల్ రాజకీయాల్లో ఇంకెన్ని మలుపులు తిరుగుతుందో, దీనిపై ఇరు పక్షాలు ఎలా స్పందిస్తాయో వేచి చూడాలి.

Publish Date: May 31, 2026 1:03PM