పశ్చిమ బెంగాల్ రాజకీయాలు అనగానే అందరికీ గుర్తుకు వచ్చేది అక్కడి ఎన్నికల హింస మరియు రాజకీయ కక్షసాధింపులు. ఇటీవల ముగిసిన పశ్చిమ బెంగాల్ శాసనసభ ఎన్నికల నేపథ్యంలో క్షేత్రస్థాయిలో నెలకొన్న భీకర పరిస్థితులను, ఓటర్లు,  రాజకీయ కార్యకర్తలు అనుభవించిన మానసిక ఆందోళనలను భారతీయ జనతా పార్టీ   మహిళా మోర్చా జాతీయ సహ-ఇన్‌చార్జ్ స్మిత బరూవా ఒక ప్రత్యేక ఇంటర్వ్యూలో పంచుకున్నారు. బెంగాల్ ఎన్నికల ప్రచారంలో పాల్గొని తిరిగి వచ్చిన ప్రతిసారీ అక్కడి ప్రజల దీనస్థితిని చూసి కన్నీళ్లు ఆపుకోలేకపోయానని ఆమె భావోద్వేగానికి గురయ్యారు. ఎన్నికల్లో అధికార పక్షం సృష్టించిన భయాందోళనల మధ్యే ప్రజాస్వామ్య ప్రక్రియ ఎలా సాగిందో ఆమె కళ్లకు కట్టారు.

గుండెల్ని పిండేసే క్షేత్రస్థాయి యదార్థాలు: వృద్ధురాలి ఆర్తనాదం

ఎన్నికల ప్రచార సమయాల్లో తాను ఎదుర్కొన్న అత్యంత హృదయవిదారక సంఘటనలను స్మిత బరూవా ఆ ఇంటర్వ్యూలో కళ్లకు కట్టారు.  ఒక గ్రామీణ ప్రాంతంలో సమావేశం ముగించుకుని వస్తుండగా, ఒక వృద్ధురాలు తన చేతిని గట్టిగా పట్టుకుని,  ఒకవేళ మీరు ఈ ఎన్నికల్లో ఓడిపోతే..  అధికార పార్టీ వారు మమ్మల్ని ప్రాణాలతో వదిలిపెట్టరు, చంపేస్తారు అని ఆవేదన వ్యక్తం చేసినట్లు తెలిపారు. ఈ మాటలు విన్న తర్వాత, అక్కడ తమ పార్టీ గెలవకపోతే సామాన్య ప్రజల పరిస్థితి ఏమిటనే భయం తనను వెంటాడిందని ఆమె పేర్కొన్నారు. అంతేకాకుండా, స్థానిక డ్రైవర్లు సైతం తమ ప్రాణ రక్షణ కోసం మాత్రమే వాహనాలపై అధికార పార్టీ జెండాలను ప్రదర్శించారని, కానీ వారి మద్దతు మాత్రం మార్పు కోసమేనని రహస్యంగా చెప్పేవారని ఆమె వెల్లడించారు. క్షేత్రస్థాయిలో భద్రత ఎంత దారుణంగా ఉందంటే, తాను ప్రచారానికి వెళ్లిన ప్రతిరోజూ ఆత్మరక్షణ కోసం బ్యాగులో పెప్పర్ స్ప్రే ఉంచుకోవాల్సి వచ్చిందని ఆమె వివరించారు.

హింసను సాధారణీకరించిన వాతావరణం.. జమ్మూ కాశ్మీర్ కంటే ప్రమాదకరం

సాధారణంగా నక్సలైట్ల ప్రభావిత ప్రాంతాలైన ఛత్తీస్‌గఢ్‌లోని బస్తర్ లేదా ఉగ్రవాద ప్రభావిత ప్రాంతమైన జమ్మూ కాశ్మీర్‌కు వెళ్లేటప్పుడు కూడా తన కుటుంబ సభ్యులు ఎప్పుడూ ఆందోళన చెందలేదనీ.. కానీ బెంగాల్ వెళ్తున్నప్పుడు మాత్రం తీవ్రంగా భయపడ్డారని స్మిత బరూవా తెలిపారు. బెంగాలీ సంస్కృతి, భాష తెలిసిన కోడలిగా తనకు ఆ రాష్ట్రంపై అవగాహన ఉన్నప్పటికీ, అక్కడ శాంతిభద్రతలు పూర్తిగా క్షీణించాయన్నారు. గత ఎన్నికల్లో కేవలం మూడు స్థానాల నుండి డెబ్బై ఏడు స్థానాలకు బీజేపీ బలం పుంజుకున్నప్పటి నుండి ప్రతిపక్ష పార్టీలను అణచివేయడం తీవ్రతరమైందని మండిపడ్డారు. ఈ రాజకీయ ఘర్షణల్లో ఇప్పటివరకు దాదాపు 300 మందికి పైగా బీజేపీ కార్యకర్తలు ప్రాణాలు కోల్పోయారని, అనేకమంది మహిళలు లైంగిక దాడులకు, వేధింపులకు గురయ్యారని ఆమె ఆరోపించారు.  పశ్చిమ బెంగాల్‌లో రాజకీయ హింస ఎంతగా సాధారణీకరించబడిందంటే, ప్రజాస్వామ్యబద్ధంగా ఓటు వేయాలన్నా లేదా రాజకీయ కార్యక్రమాల్లో పాల్గొనాలన్నా ప్రాణాలను పణంగా పెట్టాల్సిన పరిస్థితి ఏర్పడిందని స్మితాబారువా చెప్పారు.

జాదవ్‌పూర్ ఉదాహరణ: చెల్లాచెదురైన కుటుంబాల గాథలు

కోల్‌కతా నగరానికి సమీపంలో ఉండే ఆధునిక ప్రాంతమైన జాదవ్‌పూర్‌లో తాను చూసిన ఒక ఉదాహరణను ఆమె ఈ సందర్భంగా ప్రస్తావించారు. రాజకీయ దాడుల వల్ల ధ్వంసమైన ఒక ఇంటిని సందర్శించినప్పుడు, ఆ ఇంటి యజమానురాలు ఎన్నికల ఫలితాలు వచ్చేవరకు ఇల్లు రిపేర్ చేయించనని చెప్పినట్లు తెలిపారు. ఒకవేళ ప్రతిపక్షం ఓడిపోతే మళ్లీ ఇల్లు పగలగొడతారనే భయం ఆమెలో స్పష్టంగా కనిపించింది. ఆ కుటుంబం కేవలం బీజేపీకి మద్దతు ఇచ్చిందనే ఒకే ఒక్క కారణంతో, తొమ్మిది నెలల గర్భవతి అయిన వారి కోడలు ప్రాణాలు చేతబట్టుకుని రైలెక్కి పారిపోవాల్సి వచ్చింది. రాజకీయాల కారణంగా సొంత అన్నదమ్ములు మాట్లాడుకోవడం మానేసి, కుటుంబాలు విచ్ఛిన్నమైన పరిస్థితులు బెంగాల్‌లోనే చూశామని స్మిత బరూవా ఆవేదన వ్యక్తం చేశారు.

అపూర్వమైన మహిళా చైతన్యం: 94 శాతం రికార్డు ఓటింగ్

ఇంతటి భయానక వాతావరణం, బెదిరింపులు ఉన్నప్పటికీ, బెంగాల్ ఎన్నికల్లో కొన్ని ప్రాంతాల్లో ఏకంగా 94 శాతం వరకు ఓటింగ్ నమోదు కావడం విశేషం. సాధారణంగా గుజరాత్ వంటి రాష్ట్రాల్లో 50 నుండి 60 శాతం ఓటింగ్ జరుగుతుందని, కానీ బెంగాల్‌లో ప్రాణభయం ఉన్నా ప్రజలు అంత పెద్ద సంఖ్యలో తరలిరావడం అసాధారణం. ముఖ్యంగా, రాజకీయ హింసకు ఎక్కువగా బలి అయ్యే మహిళలే ఈ ఎన్నికల్లో మొదటి రెండు దశల్లో అత్యధికంగా పోలింగ్ కేంద్రాలకు వచ్చి ఓటు వేశారు. అధికార పార్టీ శ్రేణులు ఇళ్ల బయట కాపలా ఉండి బెదిరించినప్పటికీ, మహిళలు చూపిన ధైర్యం బెంగాల్ రాజకీయ చరిత్రలోనే ఒక మైలురాయిగా నిలిచిపోతుందని స్మితాబారువా పేర్కొన్నారు.

ఈవీఎంల రక్షణ..  క్షేత్రస్థాయి వాలంటీర్ల పోరాటం

పోలింగ్ ముగిసిన తర్వాత ఈవీఎం యంత్రాలను స్ట్రాంగ్ రూమ్‌లకు తరలించే క్రమంలో బీజేపీ వాలంటీర్లు పడిన శ్రమను స్మిత బరూవా  ప్రత్యేకంగా అభినందించారు. భారీ వర్షం పడుతున్నప్పటికీ, ఈవీఎంలను తీసుకువెళ్లే బస్సుల వెనుక తమ పార్టీ కార్యకర్తలు మోటార్ సైకిళ్లపై అనుసరిస్తూ భద్రతను పర్యవేక్షించారని తెలిపారు. ఇటువంటి కఠినమైన భద్రతా ఏర్పాట్లు మరియు స్వచ్ఛంద నిఘా తాను మరే ఇతర రాష్ట్రాల్లోనూ చూడలేదన్నారు. ఫలితాలు వెలువడి రెండు వారాలు దాటినా.. క్షేత్రస్థాయిలో సాధించిన ఈ విజయాన్ని, కార్యకర్తల త్యాగాలను  నమ్మలేకపోతున్నానంటూ భావోద్వేగానికి గురయ్యారు స్మితాబారువా. 

వ్యవస్థల వైఫల్యం మరియు ఫిర్యాదుల తిరస్కరణ

బెంగాల్‌లో స్థానిక పరిపాలన మరియు పోలీస్ యంత్రాంగం పూర్తిగా అధికార పక్షంతో కుమ్మక్కయ్యాయని స్మిత బరూవా  ఆరోపించారు. బాధితులు పోలీస్ స్టేషన్లకు వెళ్లినా కనీసం ఎఫ్‌ఐఆర్  కూడా నమోదు చేసేవారు కాదని, ఒకవేళ మహిళలు ధైర్యం చేసి లైంగిక వేధింపులపై ఫిర్యాదు చేస్తే, వాటిని వెనక్కి తీసుకోవాలని తీవ్ర ఒత్తిడి,  వేధింపులకు గురిచేసేవారని పేర్కొన్నారు. ఇలాంటి పరిస్థితుల్లో కేంద్ర బలగాల మోహరింపు మాత్రమే ఓటర్లకు మరియు మహిళలకు కనీస భరోసా ఇవ్వగలిగిందని ఆమె స్పష్టం చేశారు.

పశ్చిమ బెంగాల్‌లో జరిగిన ఎన్నికల పోరాటం కేవలం రెండు పార్టీల మధ్య జరిగినది కాదు, అది అణచివేతపై సామాన్య ప్రజలు, ముఖ్యంగా మహిళలు సాధించిన మహోన్నత విజయంగా  స్మిత బరూవా అభివర్ణించారు. వృత్తిరీత్యా తాను ఒక మానసిక ఆరోగ్య నిపుణురాలినైనప్పటికీ, క్షేత్రస్థాయిలో ప్రజలు అనుభవిస్తున్న మానసిక ఆఘాతాన్ని చూసి తానే కలత చెందానన్న ఆమె  బెంగాల్‌లో జరిగిన వాస్తవ హింస,  మహిళల ఆవేదన జాతీయ మీడియాలో తగినంతగా చర్చకు రాలేదన్నారు.

రాబోయే రోజుల్లో అక్కడ శాంతిభద్రతలు మెరుగుపడతాయని, ప్రజలు ఎలాంటి భయం లేకుండా తమ ప్రజాస్వామ్య హక్కును వినియోగించుకునే రోజులు వస్తాయన్నారు. కేంద్ర ప్రభుత్వ జోక్యం, న్యాయస్థానాల నిఘా ద్వారా మాత్రమే బెంగాల్‌లో రాజకీయ హింసకు శాశ్వత ముగింపు పలకడం సాధ్యమవుతుందని పేర్కొన్నారు. 

-సీతారాం కంఠంనేని

ఈ విశ్లేషణ మీకు నచ్చినట్లయితే, దయచేసి https://www.teluguone.com పోర్టల్ ను  ఫాలో అవ్వండి. లైక్ చేయండి. షేర్ చేయండి. మీ విలువైన అభిప్రయాలను తెలియజేయండి.