ఒకప్పుడు క్రికెట్ ప్రపంచంలో రారాజుగా వెలుగొందిన వెస్టిండీస్ టీమ్ ఇటీవలి కాలంలో క్రికెట్ లో పసికూనల చేతిలో కూడా చిత్తవుతోంది. తాజాగా విండీస్ జట్టు ఆప్ఘనిస్థాన్  చేతిలో చిత్తైంది. దుబాయ్ వేదికగా ఆప్ఘనిస్థాన్, వెస్టిండీస్ జట్ల మధ్య జరుగుతున్న మూడు మ్యాచ్ ల టి20 సిరీస్ లో తొలి మ్యాచ్ లో ఆప్ఘనిస్థాన్ 38 పరుగుల ఆధిక్యతతో విజయం సాధించింది.

ఈ మ్యాచ్ లో టాస్ గెలిచి  తొలుత బ్యాటింగ్‌‌ చేపట్టిన ఆప్ఘనిస్థాన్  నిర్ణీత 20 ఓవర్లలో  మూడు వికెట్లు కోల్పోయి 181 పరుగులు చేసింది. ప్రారంభంలో 19 పరుగులకే 2 వికెట్లు కోల్పోయిన చిక్కుల్లో పడ్డ ఆప్ఘనిస్థాన్  ఆ తర్వాత అనూహ్యంగా పుంజుకుంది. ఇబ్రహీం జద్రాన్‌ (56 బంతుల్లో 87 నాటౌట్‌), దర్విష్‌ రసూలీ(59 బంతుల్లో 84)  విండీస్ బౌలర్లను ఓ ఆటాడుకున్నారు.  

అఫ్గాన్ ఇన్నింగ్స్‌లో రహ్మానుల్లా గుర్బాజ్‌ డకౌట్‌ కాగా.. సెదిఖుల్లా అటల్‌ 2 పరుగులు మాత్రమే చేశాడు. కరేబియన్ బౌలర్లలో జేడన్‌ సీల్స్‌, మాథ్యూ ఫోర్డ్‌ తలో వికెట్‌ తీశారు. అనంతరం 182 పరుగుల టార్గెట్‌తో బ్యాటింగ్‌కు దిగిన విండీస్‌.. 20 ఓవర్లలో 9 వికెట్లు కోల్పోయి 143 పరుగులు మాత్రమే చేయగలిగింది.