గెలిచినా..ఓడినా ఎప్పుడూ ఓకేలా ఉండాలని గీతలో శ్రీకృష్ణ భగవానుడు ఎందుకన్నాడో ఇప్పుడు అర్థమవుతోంది. ఆనందమొచ్చినప్పుడు ఒకలాగా..బాధ కలిగినప్పుడు ఒకలాగా మనిషి మారిపోతాడు అనడానికి నిలువెత్తు నిదర్శనం వెస్టిండీస్ క్రికెటర్ శామ్యూల్స్. టీ20 ప్రపంచకప్‌లో గెలవడం అంటే అంత మామూలు విషయం కాదు. ఎన్నో జట్లతో పోరాడి, ఫైనల్లో అమీతుమి తేల్చుకుని విశ్వవిజేతగా ఆవిర్భవించింది విండీస్. విజయోత్సాహాన్ని ఒక్కోక్క స్టైల్లో ప్రజంట్ చేస్తారు. విధ్వంసకర ఆటగాడు గేల్ గంగ్నమ్ డ్యాన్స్ చేస్తూ సహాచరులతో చేయిస్తూ ఆనందాన్ని వ్యక్తపరుస్తాడు. అయితే వీరందరికి భిన్నంగా ప్రవర్తించాడు శామ్యూల్స్ ఫైనల్లో సూపర్ బ్యాటింగ్‌తో ఆకట్టుకున్న శామ్యూల్స్ విజయగర్వంతో ప్రెస్‌మీట్‌కు హాజరయ్యాడు. అక్కడ అతను ప్రవర్తించిన తీరు మాత్రం అందరిని ఆశ్చర్యపరిచింది. జర్నలిస్ట్‌లు ప్రశ్నలు వేయడానికి ముందే టేబుల్ మీద కాళ్లు పెట్టి హీరో రేంజ్‌లో ఫోజు కొట్టాడు. సంతోషంలో ఇలా చేశాడా? లేక గర్వంతో తనకంటే తోపు ఎవడూ లేడని అలా చేశాడా? అన్నది అర్థం కాక జర్నలిస్టులు స్టన్నయ్యారు. ఈ ఫోటో సోషల్ మీడియాలో హల్‌చల్ చేస్తుండటంతో నెటిజన్లు తమదైన స్టైల్లో శామ్యూల్స్‌పై సెటైర్లు పేలుస్తున్నారు.