తెలుగు చలన త్ర పరిశ్రమలో మరో విషాదం చోటు చేసుకుంది. నటుడిగా ఎదుగుతున్న తరుణంలోనే ఒక ప్రతిభావంతమైన యువ నటుడు రోడ్డు ప్రమాదంలో కన్నుమూశాడు. ఔటర్ రింగ్ రోడ్డు పై జరిగిన ఘోర రోడ్డు ప్రమాదంలో యువనటుడు భరత్ కాంత్ తుది శ్వాస విడిచాడు. ఈ ప్రమాదంలో  సినిమాటోగ్రాఫర్ త్రిలోక్ కూడా కన్నుమూశారు. అప్పుడప్పుడే కెరీర్‌లో ఎదుగుతున్న ఒక యువ ప్రతిభావంతుడు ఇలా ప్రమాద రూపంలో ప్రాణాలు కోల్పోవడం పట్ల చిత్ర పరిశ్రమ తీవ్ర సంతాపం వ్యక్తం చేస్తోంది.

హైదరాబాద్ ఔటర్ రింగ్ రోడ్డుపై  బొంగులూరు గేట్ సమీపంలో..  నెల్లూరు నుంచి హైదరాబాద్‌కు వస్తున్న కారును వెనుక నుంచి వచ్చిన కంటైనర్ లారీ ఢీకొట్టింది. ఈ ప్రమాదంలో కారులో ప్రయాణిస్తున్న హీరో భరత్ కాంత్‌, సినిమాటోగ్రాఫర్ త్రిలోక్ అక్కడికక్కడే ప్రాణాలు కోల్పోయారు. భరత్ కాంత్ ఇటీవల విడుదలైన  టాలెంట్  సినిమాలో హీరోగా నటించి మంచి గుర్తింపు పొందాడు.   పలు తెలుగు, హిందీ వెబ్ సిరీస్‌లలో కూడా నటించాడు.

ఇక సినిమాటోగ్రాఫర్ త్రిలోక్ పలు తెలుగు సినిమాలకు పనిచేసి  మంచి పేరు తెచ్చుకున్నారు. ఇద్దరూ కలిసి తమ సొంత ఊరైన నెల్లూరు వెళ్లి తిరిగి హైదరాబాద్‌కు వస్తుండగా ఈ విషాద ఘటన చోటు చేసుకుంది. పలువురు సినీ ప్రముఖులు భరత్ కాంత్ మృతికి నివాళులర్పిస్తున్నారు.