అమెరికా అధ్యక్షుడు డొనాల్డ్ ట్రంప్  అమలు చేసిన  టారిఫ్ విధానం అనుకున్న లక్ష్యాలను సాధించకపోగా,  బూమరాంగ్ అయ్యింది. స్వదేశీ ఆర్థిక వ్యవస్థకే ముప్పుగా పరిణమించింది. ఈ విషయాన్ని  ప్రముఖ అంతర్జాతీయ అధ్యయనాలు స్పష్టం చేస్తున్నాయి. విదేశీ ఎగుమతిదారులను కట్టడి చేసి, స్థానిక పరిశ్రమలను బలోపేతం చేయడంతో పాటు వాణిజ్య లోటును తగ్గించడమే లక్ష్యంగా ఈ నిర్ణయం తీసుకున్నట్లు అమెరికా ప్రభుత్వం ప్రకటించింది. అయితే, వాస్తవ పరిస్థితులు పూర్తిగా విరుద్ధంగా ఉన్నాయని, ఈ టారిఫ్‌ల భారం అంతా చివరికి అమెరికాలోని దిగుమతిదారులు,  సాధారణ వినియోగదారుల పైనే పడిందని అంతర్జాతీయ ద్రవ్య నిధి (ఐఎంఎఫ్) పరిశోధనలు, ఐఎంఎఫ్ మాజీ చీఫ్ ఎకనామిస్ట్ గీతా గోపీనాథ్ విశ్లేషణలు వెల్లడిస్తున్నాయి.  అంతర్జాతీయ ఆర్థిక నిపుణులు విడుదల చేసిన గణాంకాల ప్రకారం, 2025లో అమెరికా విధించిన సుంకాల మూలంగా పెరిగిన వ్యయంలో ఏకంగా 86 శాతం నుండి 94 శాతం వరకు భారాన్ని అమెరికాలోని దిగుమతిదారులే స్వయంగా భరించాల్సి వచ్చింది. విదేశీ ఎగుమతిదారులు కేవలం 6 నుంచి 14 శాతం మేర మాత్రమే ఈ భారాన్ని సర్దుబాటు చేసుకున్నారు.

 స్థానిక ఉత్పత్తిదారులకు రక్షణ కల్పించాల్సింది పోయి, రక్షణాత్మక పన్ను విధానం వల్ల అమెరికా వినియోగదారుల రోజువారీ జీవన వ్యయం గణనీయంగా పెరిగింది.  సుంకాల పెంపు వల్ల దిగుమతి చేసుకునే సరుకుల నాణ్యతలో స్పష్టమైన క్షీణత కనిపించడం అత్యంత ఆందోళనకరమైన పరిణామంగా నమోదైంది. మార్కెట్లో కొన్ని రకాల వస్తువుల సగటు ధరలు తగ్గినట్లు పత్రాల్లో కనిపించినప్పటికీ, దానికి ప్రధాన కారణం అమెరికా వ్యాపారులు నాణ్యమైన ఎగుమతిదారులను వదిలేసి, తక్కువ నాణ్యత కలిగిన చౌకైన సప్లయర్ల వైపు మళ్లడమేనని పరిశోధకులు చెబుతున్నారు. 

ఈ రకమైన సప్లయర్ల మార్పిడి వల్ల దిగుమతి అవుతున్న విడిభాగాల నాణ్యత పడిపోవడమే కాకుండా, ఉత్పత్తుల మన్నిక తగ్గి చివరికి వినియోగదారులు తక్కువ నాణ్యత గల సరుకులకు ఎక్కువ మూల్యం చెల్లించుకోవాల్సి వస్తోంది.  చారిత్రకంగా చూస్తే, అమెరికా 1930 నాటి స్మూట్-హాలీ చట్టం సమయంలో ఇటువంటి తీవ్రమైన సుంకాలను విధించింది. నాటి నిర్ణయం ప్రపంచ వాణిజ్యాన్ని దెబ్బతీసి తీవ్ర ఆర్థిక మాంద్యానికి దారితీసిందనే హెచ్చరికలు ఉన్నప్పటికీ, ట్రంప్ పరిపాలన యంత్రాంగం అంతర్జాతీయ అత్యవసర ఆర్థిక అధికారాల చట్టం ) కింద ఏకపక్షంగా భారీ టారిఫ్‌లను అమలులోకి తెచ్చింది. 

చైనా, భారత్, బ్రెజిల్ వంటి అనేక దేశాల ఎగుమతులపై విధించిన భారీ సుంకాలు అంతర్జాతీయంగా తీవ్ర కలకలం రేపాయి.  ఈ నిర్ణయాలపై న్యాయపరంగా కూడా తీవ్రమైన వ్యతిరేకత వ్యక్తమవుతోంది. వ్యాపార లోటును జాతీయ అత్యవసర పరిస్థితిగా చూపిస్తూ అధ్యక్షుడు ఏకపక్ష అధికారాలను ఉపయోగించడాన్ని అమెరికాలోని చిన్న, మధ్య తరహా వ్యాపారవేత్తలు కోర్టుల్లో సవాలు చేశారు. మరోవైపు ప్రపంచ వాణిజ్య సంస్థ (డబ్ల్యూటీఓ) సూత్రాలకు ఇవి విరుద్ధంగా ఉన్నప్పటికీ, అంతర్జాతీయ న్యాయ సూత్రాల అమలులో ఉన్న అడ్డంకుల వల్ల వైట్ హౌస్ ఈ నిర్ణయాలను కొనసాగిస్తోంది.  

ద్రవ్యోల్బణం దృష్ట్యా చూస్తే, అమెరికాలో గృహోపకరణాలు, ఫర్నిచర్, కాఫీ వంటి నిత్యావసర వస్తువుల ధరలు గణనీయంగా పెరిగాయి. విదేశీ భాగస్వాములపై ఆధారపడే చిన్న తరహా పరిశ్రమలు తమ లాభాల శాతాన్ని కోల్పోవాల్సి వచ్చింది. ప్రభుత్వం సేకరించిన పన్ను ఆదాయం పెరిగిన మాట వాస్తవమే అయినప్పటికీ, అది విదేశీయుల నుంచి వసూలు చేసిన సొమ్ము కాదని, స్వదేశీ సంస్థలు,  పౌరులపై పడిన పన్ను భారం మాత్రమేనని ఆర్థికవేత్తలు ధ్రువీకరిస్తున్నారు.  రాబోయే రోజుల్లో ఈ విధానం వల్ల అమెరికా తయారీ రంగం ఆశించిన స్థాయి అభివృద్ధిని సాధిస్తుందా లేదా అనేది సందేహాస్పదంగా మారింది. సుంకాలు పెంపు ద్వారా అనుకున్న వాణిజ్య లోటు తగ్గింపు లక్ష్యం నెరవేరకపోగా, స్థానిక పరిశ్రమల పోటీతత్వం దెబ్బతినే ప్రమాదం ఉంది. దీర్ఘకాలంలో స్థానిక ఉత్పత్తిదారులు ఉత్పాదకతను కోల్పోతే, అది అమెరికా ఆర్థిక ప్రగతికే ముప్పుగా మారే అవకాశముందని నిపుణులు హెచ్చరిస్తున్నారు.  విదేశీ విపణులను దెబ్బతీయడానికి రూపొందించిన ఈ ఆంక్షల వ్యూహం చివరకు అమెరికా పౌరుల జేబులకే చిల్లు పెడుతోందని విశ్లేషణలు స్పష్టం చేస్తున్నాయి. రానున్న కాలంలో కోర్టు తీర్పులు ఎలా ఉంటాయో మరియు రాబోయే ఆర్థిక త్రైమాసికాల డేటా ఆధారంగా ప్రభుత్వం తన సుంకాల విధానాన్ని పునఃపరిశీలిస్తుందో లేదో వేచి చూడాల్సి ఉంది.

 -సీతారాం కంఠంనేని

ఈ విశ్లేషణ మీకు నచ్చినట్లయితే, దయచేసి https://www.teluguone.com పోర్టల్ ను  ఫాలో అవ్వండి. లైక్ చేయండి. షేర్ చేయండి. మీ విలువైన అభిప్రయాలను తెలియజేయండి.    

Gita Gopinath IMF Study, US Tariff Burden, US Economy News,  Telugu One, Donald Trump Import Tariffs