తెలంగాణ పోలీస్ శాఖలో భారీ స్థాయిలో బదిలీల పర్వం చోటుచేసుకుంది. రాష్ట్రవ్యాప్తంగా పరిపాలనా సామర్థ్యాన్ని పెంచడంతో పాటు శాంతిభద్రతలను మరింత బలోపేతం చేయాలనే లక్ష్యంతో ప్రభుత్వం కీలక నిర్ణయం తీసుకుంది. ఇందులో భాగంగా రాష్ట్రంలోని 36 మంది డిప్యూటీ సూపరింటెండెంట్ ఆఫ్ పోలీస్ (డీఎస్పీ) అధికారులను బదిలీ చేస్తూ ఉత్తర్వులు జారీ చేసింది.

ఈ మేరకు డీజీపీ సీవీ ఆనంద్ అధికారిక ఆదేశాలు వెలువరించారు. ఒకేసారి ఇంత పెద్ద సంఖ్యలో డీఎస్పీల బదిలీలు జరగడం రాష్ట్ర పోలీస్ శాఖలో చర్చనీయాంశంగా మారింది. పోలీస్ వ్యవస్థలో జవాబుదారీతనాన్ని పెంపొందించడం, పెరుగుతున్న నేరాలను సమర్థంగా నియంత్రించడం, క్షేత్రస్థాయిలో పరిపాలనను మరింత సమర్థవంతం చేయడం, ప్రజలకు మెరుగైన భద్రతా సేవలు అందించడం లక్ష్యంగా ఈ బదిలీలు చేపట్టినట్లు ఉన్నతాధికారులు పేర్కొంటున్నారు.

ఈ బదిలీల్లో జిల్లాల ఎస్‌డీపీఓలు, సిటీ పోలీస్ విభాగాల్లో కీలక బాధ్యతలు నిర్వహిస్తున్న అధికారులు, ఇంటెలిజెన్స్, క్రైమ్ బ్రాంచ్, స్పెషల్ బ్రాంచ్, సీఐడీ, టాస్క్‌ఫోర్స్ వంటి విభాగాలకు చెందిన పలువురు డీఎస్పీలు ఉన్నారు. సున్నితమైన ప్రాంతాల్లో అనుభవజ్ఞులైన అధికారులను నియమించడం ద్వారా శాంతిభద్రతల నిర్వహణను మరింత బలోపేతం చేయాలని పోలీస్ శాఖ భావిస్తోంది. డీజీపీ జారీ చేసిన ఉత్తర్వుల ప్రకారం బదిలీ అయిన అధికారులు వెంటనే తమ ప్రస్తుత బాధ్యతల నుంచి రిలీవ్ అయి, కొత్తగా కేటాయించిన స్థానాల్లో విధులు స్వీకరించాలని ఆదేశించారు. విధుల్లో అలసత్వాన్ని సహించబోమని, శాంతిభద్రతల విషయంలో రాజీ ఉండదని ఈ ఉత్తర్వుల ద్వారా స్పష్టమైన సంకేతాలు ఇచ్చారు.

కొంతకాలంగా వెయిటింగ్‌లో ఉన్న డీఎస్పీలకు వివిధ కమిషనరేట్లు, జిల్లా పోలీసు కార్యాలయాలు, ప్రత్యేక విభాగాల్లో పోస్టింగ్‌లు కల్పించారు. రాష్ట్రవ్యాప్తంగా ఖాళీగా ఉన్న కీలక పోస్టులను ఈ బదిలీల ద్వారా భర్తీ చేశారు.హైదరాబాద్, సైబరాబాద్, రామగుండం, నిజామాబాద్, ఖమ్మం, కరీంనగర్, సిద్దిపేట, కామారెడ్డి, రాజన్న సిరిసిల్ల, ఆదిలాబాద్ జిల్లాల్లోని సీసీఎస్, టాస్క్‌ఫోర్స్, స్పెషల్ బ్రాంచ్, సీఐడీ, ఇంటెలిజెన్స్, డీసీఆర్‌బీ, సీసీఆర్‌బీ, రోడ్ సేఫ్టీ, సీటీసీ తదితర విభాగాలకు అధికారులను నియమించారు. అదేవిధంగా అవినీతి నిరోధక శాఖ (ఏసీబీ), విజిలెన్స్ అండ్ ఎన్‌ఫోర్స్‌మెంట్, ఇంటెలిజెన్స్, ఆర్జీయూకేటీ–బాసర వంటి సంస్థల్లోనూ పోస్టింగ్‌లు కల్పించారు. 

హైదరాబాద్ సిటీ, సైబరాబాద్ కమిషనరేట్లలోని పలు కీలక ఏసీపీ పోస్టులతో పాటు సీఐడీ, ఇంటెలిజెన్స్, స్పెషల్ బ్రాంచ్ వంటి సున్నితమైన విభాగాల్లోనూ అధికారులకు బాధ్యతలు అప్పగించారు. పి. శ్రీశైలం, సంకెళ్ల వెంకటేష్, కంపా రవీందర్, సి. విజయ రాజు, జి. వెంకటేశ్వర్లు, బొప్పాల ప్రవీణ్, బూర శ్రీనివాస్, ఎం. వెంకట్ నర్సయ్య, జి. మహేందర్ రెడ్డి, గొర్ల సీతారెడ్డి, బి. బాలాజీ, అడప నరసింహారావు, ఎం. వెంకట రామయ్య, పబ్బతి వెంకటేశ్వర్లు, కీత రామకృష్ణ, కోస్గి భాస్కర్, పి. కరుణాకర్ రెడ్డి, 

ఎం. వెంకట్ రెడ్డి, పారా రాజు, నూనె వెంకటేశ్వర్లు, జి. గోవర్ధన గిరి, ఎస్. వెంకటేష్, బి. గురునాయుడు, భూపతి గట్టుమల్లు, బి. హరినాథ్ బాబు, చిలుక రాజిరెడ్డి, ఆర్. నరేందర్, ఆవుల రాజయ్య, బొలగాని శ్రీనివాసరావు, ఎ. పెద్దన్న కుమార్, తోటిచర్ల స్వామి, టి. ప్రవీణ్ కుమార్, కె. పురుషోత్తం, సర్ల రాజు, గడ్డం సదయ్య (సదన్ కుమార్) తదితర అధికారులకు కొత్త బాధ్యతలు అప్పగించారు. పోలీస్ శాఖలో ఖాళీలను భర్తీ చేయడం, పరిపాలనా సామర్థ్యాన్ని పెంపొందించడం, ప్రత్యేక విభాగాలను మరింత బలోపేతం చేయడమే ఈ భారీ బదిలీల ప్రధాన ఉద్దేశమని పోలీసు వర్గాలు వెల్లడించాయి.