ట్రైనీ ఐపీఎస్‌కి న్యాయం జరగాలి..విచారణ పూర్తికాకముందే దోషిగా ప్రకటించడం సరికాదు..!

హైదరాబాద్‌లోని సర్దార్ వల్లభభాయ్ పటేల్ నేషనల్ పోలీస్ అకాడమీలో శిక్షణ పొందుతున్న ఐపీఎస్ ప్రొబేషనర్ ఉదయ్ కృష్ణారెడ్డిపై నమోదైన కేసు నేపథ్యంలో సీబీఐ మాజీ చీఫ్ నాగేశ్వరరావు ఎక్స్ (X) వేదికగా సుదీర్ఘంగా స్పందించారు. ఈ వ్యవహారంలో నిష్పాక్షిక దర్యాప్తు, సమాన న్యాయం, చట్ట ప్రక్రియకు ప్రాధాన్యం ఇవ్వాలని ఆయన కోరారు. నాగేశ్వరరావు తన పోస్టులో, ఉదయ్ కృష్ణారెడ్డిపై మరో ట్రైనీ ఐపీఎస్‌ చేసిన లైంగిక వేధింపులు, దాడి ఆరోపణలు దేశవ్యాప్తంగా చర్చకు దారితీశాయని పేర్కొన్నారు. ప్రస్తుతం ఈ కేసులో రెండు భిన్నమైన వాదనలు ఉన్నాయని, ఫిర్యాదుదారు తీవ్రమైన ఆరోపణలు చేస్తుండగా, ఉదయ్ కృష్ణారెడ్డి వాటిని పూర్తిగా ఖండిస్తూ తమ మధ్య సంబంధం పరస్పర అంగీకారంతో ఏర్పడిందని, తనను తప్పుడు కేసులో ఇరికించారని చెబుతున్నారని వివరించారు. 

ఈ పరిస్థితుల్లో అసలు నిజానిజాలు నిష్పాక్షిక దర్యాప్తు ద్వారానే తేలాలని అభిప్రాయపడ్డారు. ఉదయ్ కృష్ణారెడ్డి జీవిత ప్రయాణం గురించి ప్రస్తావిస్తూ, ఆయన అత్యంత పేద కుటుంబంలో జన్మించి చిన్న వయసులోనే తల్లిదండ్రులను కోల్పోయారని తెలిపారు. అమ్మమ్మ వద్ద పెరిగి, ప్రభుత్వ తెలుగు మాధ్యమ పాఠశాలల్లో చదువుకుని, ఆర్థిక ఇబ్బందుల కారణంగా ఆంధ్రప్రదేశ్ పోలీసు శాఖలో కానిస్టేబుల్‌గా చేరారని గుర్తు చేశారు. విధులు నిర్వహిస్తూనే యూపీఎస్సీ సివిల్ సర్వీసెస్ పరీక్షకు సిద్ధమై చివరకు భారతీయ పోలీసు సేవ (ఐపీఎస్)లో స్థానం సంపాదించారని చెప్పారు. కానిస్టేబుల్ నుంచి ఐపీఎస్ అధికారిగా ఎదిగిన ఆయన ప్రయాణం గ్రామీణ, నిరుపేద యువతకు స్ఫూర్తిగా నిలిచిందని పేర్కొన్నారు.

సివిల్స్‌లో విజయం సాధించడం వల్ల ఉద్యోగ హోదా మారినా, ఒక వ్యక్తి జీవిత అనుభవాలు, సామాజిక పరిస్థితులు ఒక్కసారిగా మారిపోవని నాగేశ్వరరావు అభిప్రాయపడ్డారు. గ్రామీణ పేదరికం నుంచి జాతీయ స్థాయి శిక్షణా సంస్థలోకి అడుగుపెట్టే యువ అధికారులు భావోద్వేగ, మానసిక, సామాజిక సవాళ్లను ఎదుర్కొంటారని పేర్కొన్నారు. ఇలాంటి సమయంలో శిక్షణా సంస్థలు కేవలం క్రమశిక్షణను అమలు చేయడమే కాకుండా, కౌన్సెలింగ్, మార్గదర్శకత్వం, మానసిక సహాయాన్ని కూడా అందించాల్సిన బాధ్యత ఉందన్నారు. అయితే ఇది ఎట్టి పరిస్థితుల్లోనూ తప్పు జరిగితే సమర్థించడం కాదని, నిజాలు తేలే వరకు సమతుల్య దృక్పథం అవసరమని స్పష్టం చేశారు.

వ్యక్తిగత సంబంధం విఫలమైతే ప్రతి సందర్భంలోనూ దానిని నేరంగా పరిగణించడం సరైంది కాదని, అలాగే పరస్పర అంగీకారంతో జరిగిన సంబంధమని చెప్పడమే ఆరోపణలను కొట్టివేయడానికి కూడా సరిపోదని ఆయన పేర్కొన్నారు. ఈ రెండు అంశాల మధ్య తేడాను నిర్ధారించేది కేవలం సాక్ష్యాధారాలు, చట్టబద్ధమైన దర్యాప్తేనని అన్నారు. అందువల్ల దర్యాప్తు అధికారులు ఎలాంటి ఒత్తిళ్లకు లోనుకాకుండా వాస్తవాలను వెలికితీయాలని కోరారు. ఫిర్యాదు నమోదైన వెంటనే కేంద్ర హోం మంత్రిత్వ శాఖ ఉదయ్ కృష్ణారెడ్డిని సస్పెండ్ చేయడంపై కూడా సీబీఐ మాజీ డైరెక్టర్ ప్రశ్నలు లేవనెత్తారు. పరిపాలనా చర్యలు సమానత్వం, సహజ న్యాయ సూత్రాలకు అనుగుణంగా ఉండాలని, విచారణ పూర్తికాకముందే ఒకరిపై మాత్రమే చర్యలు తీసుకోవడం సమాన న్యాయం విషయంలో ప్రశ్నలకు తావిస్తుందని అభిప్రాయపడ్డారు. 

పరస్పర అంగీకారంతో సంబంధం ఏర్పడిందనే వాదన నిజమైతే, ఆ అంశాన్ని కూడా దర్యాప్తులో నిష్పాక్షికంగా పరిశీలించాలని అన్నారు. ఈ కేసులో ఫిర్యాదుదారుకు న్యాయం జరగడం ఎంత ముఖ్యమో, ఆరోపణలు ఎదుర్కొంటున్న వ్యక్తికి కూడా చట్టబద్ధమైన హక్కులు, సహజ న్యాయ సూత్రాల ప్రకారం విచారణ పొందే హక్కు అంతే ముఖ్యమని నాగేశ్వరరావు పేర్కొన్నారు. విచారణ పూర్తికాకముందే ఎవ్వరినీ దోషిగా గానీ, నిర్దోషిగా గానీ ప్రకటించడం సరికాదని సీబీఐ మాజీ డైరెక్టర్ అన్నారు. 

చివరగా కేంద్ర హోం మంత్రిత్వ శాఖ, సర్దార్ వల్లభభాయ్ పటేల్ నేషనల్ పోలీస్ అకాడమీ డైరెక్టర్, హైదరాబాద్ పోలీసు కమిషనర్, తెలంగాణ డీజీపీలు నిష్పాక్షికంగా వ్యవహరించి దర్యాప్తును త్వరగా పూర్తి చేయాలని కోరారు. అలాగే ఆంధ్రప్రదేశ్ ముఖ్యమంత్రి ఎన్. చంద్రబాబు నాయుడు, ఉప ముఖ్యమంత్రి పవన్ కళ్యాణ్, మంత్రి నారా లోకేష్ ఈ అంశాన్ని కేంద్ర హోం మంత్రి అమిత్ షా దృష్టికి తీసుకెళ్లి, విచారణ పూర్తయ్యే వరకు ఉదయ్ కృష్ణారెడ్డి సస్పెన్షన్‌ను పునఃసమీక్షించాలని విజ్ఞప్తి చేశారు. "నిజమైన న్యాయం అంటే ముందుగానే తీర్పు ఇవ్వడం కాదు. పక్షపాతం లేకుండా దర్యాప్తు జరిపి, సాక్ష్యాధారాల ఆధారంగా చట్టం ప్రకారం నిర్ణయం తీసుకోవడమే నిజమైన న్యాయం" అని సీబీఐ మాజీ డైరెక్టర్ తన ఎక్స్ పోస్టులో పేర్కొన్నారు.

Trainee IPS Uday Krishna Reddy, Suicide note, Attapur Police Station, National Police Academy Hyderabad, Trainee IPS Suicide Attempt Drama, Hyderabad Police Investigation, Retired IPS Nageswara Rao, National Police Academy