ఎన్‌జీఓ నిధులు, నెరేటివ్స్ మాయాజాలంతో భారత ప్రజాస్వామ్యంపై అంతర్జాతీయ ఒత్తిడి!

 21వ శతాబ్దంలో అంతర్జాతీయ రాజకీయాలు, దేశాల సార్వభౌమత్వ రక్షణ సరికొత్త సవాళ్లను ఎదుర్కొంటున్నాయి. ఒక దేశం నిజమైన స్వాతంత్య్రాన్ని కలిగి ఉందో లేదో తెలుసుకోవడానికి కేవలం ఆ దేశ సరిహద్దు రక్షణను చూస్తే సరిపోదనీ..  ఆ దేశం చేసే అంతర్గత చట్టాలపై అంతర్జాతీయంగా ఎలాంటి ఒత్తిళ్లు వస్తున్నాయో గమనించాలని తాజా పరిణామాలు స్పష్టం చేస్తున్నాయి. సాంప్రదాయ పద్ధతుల్లో బాంబులు, తుపాకులతో జరిగే యుద్ధాల కాలం ముగిసి..  ప్రస్తుతం నిధులు, సాఫ్ట్ పవర్, నెరేటివ్ కంట్రోల్ (కథనాల నియంత్రణ) కేంద్రంగా ఒక అదృశ్య 'న్యూ కోల్డ్ వార్' నడుస్తోంది. ఈ ప్రచ్ఛన్న యుద్ధంలో భారతదేశం వంటి అతిపెద్ద ప్రజాస్వామ్య దేశాన్ని అంతర్గతంగా ప్రభావితం చేసేందుకు గ్లోబల్ నెట్‌వర్క్‌లు తీవ్రంగా ప్రయత్నిస్తున్నాయి.  

గత శతాబ్దంలో అంటే 20వ శతాబ్దంలో అమెరికా, సోవియట్ యూనియన్ మధ్య నడిచిన పాత కోల్డ్ వార్ సైనిక కూటములు, గూఢచర్యం, క్షిపణి పోటీల చుట్టూ తిరిగేది. కానీ నేటి ఆధునిక ప్రపంచంలో యుద్ధ రంగం పూర్తిగా మారిపోయింది. ఇప్పుడు దేశాల సరిహద్దుల కంటే ఎక్కువగా పార్లమెంట్లు, మీడియా సంస్థలు, డిజిటల్ ప్లాట్‌ఫామ్‌లు, ప్రార్థనా మందిరాలు, విద్యాసంస్థల్లో ఈ ప్రభావాల యుద్ధం సాగుతోంది. డేటా, నిధులు, సాంఘిక మాధ్యమాల ప్రచారాల ద్వారా ప్రజల మనసులను మార్చడమే లక్ష్యంగా అంతర్జాతీయ శక్తులు పావులు కదుపుతున్నాయి. ఎవరి కథనం ప్రజల్లో బలంగా నాటుకుంటే వాళ్లదే అంతిమ విజయం అనే తరహాలో ఈ 'ఇన్‌ఫ్లుయెన్స్ వార్' కొనసాగుతోంది.  

భారతదేశంలో చారిటీ, సమాజ సేవ, విద్యా, ఆరోగ్య రంగాల అభివృద్ధి పేరిట వేలాది స్వచ్ఛంద సంస్థలు (ఎన్జీవోలు) పనిచేస్తున్నాయి. వీటిలో చాలా సంస్థలు విదేశీ నిధుల నియంత్రణ చట్టం (ఎఫ్సీఆర్ఏ) ద్వారా అంతర్జాతీయ ఫౌండేషన్లు, ఇతర మార్గాల నుండి భారీగా నిధులను పొందుతున్నాయి. ఈ సంస్థలలో అనేకం నిజాయితీగా సేవలందిస్తున్నప్పటికీ, కొన్ని ఎన్జీవోలు మాత్రం విదేశీ ప్రభుత్వాల, కొన్ని ఐడియాలజికల్ గ్రూపుల వ్యూహాత్మక ప్రయోజనాల కోసం పని చేస్తున్నాయన్న ఆందోళనలు ఉన్నాయి. రాజకీయ ఉద్యమాలను ప్రోత్సహించడం, ఆందోళనలను రెచ్చగొట్టడం, సోషల్ మీడియా వేదికగా దేశ ప్రతిష్టను దిగజార్చేలా నెరేటివ్స్ నిర్మించడం వంటి పనులు ఈ నిధుల మద్దతుతో జరుగుతున్నాయని భావిస్తున్నారు.  

దీనికి తోడు, సేవా కార్యక్రమాల ముసుగులో జరుగుతున్న మతమార్పిడుల అంశం కూడా ఈ ప్రచ్ఛన్న యుద్ధంలో కీలకంగా మారింది. భారత రాజ్యాంగం ప్రతి పౌరుడికి నచ్చిన మతాన్ని ఆచరించే, ప్రచారం చేసుకునే స్వేచ్ఛను ఇచ్చినప్పటికీ, బలవంతపు, ఆర్థిక ప్రలోభాలతో కూడిన మార్పిడులను చట్టం నిరాకరిస్తోంది. పేదరికం, అణగారిన వర్గాల బలహీనతలను ఆసరాగా చేసుకుని విదేశీ నిధుల సహాయంతో స్థానిక డెమోగ్రఫీనిఅంటే జనాభా సమతుల్యతను మార్చడానికి, తద్వారా దేశ సంస్కృతిని, రాజకీయాలను ప్రభావితం చేయడానికి వ్యూహాత్మక ప్రయత్నాలు జరుగుతున్నాయనే విమర్శలు బలంగా వినిపిస్తున్నాయి.  ఈ వ్యూహాత్మక ముప్పును అడ్డుకునేందుకు భారత ప్రభుత్వం గత కొన్ని సంవత్సరాలుగా కఠినమైన చర్యలను చేపట్టింది. విదేశీ నిధుల ప్రవాహాన్ని నియంత్రించే ఎఫ్ సీఆర్‌ఏ   చట్టం ద్వారా నిబంధనలు ఉల్లంఘించిన వందలాది స్వచ్ఛంద సంస్థల లైసెన్సులను రద్దు చేసింది. జాతీయ ప్రయోజనాలకు భంగం కలిగిస్తున్నాయనే ఆధారాలతో కొన్ని అంతర్జాతీయ సంస్థలపై ఆంక్షలు కూడా విధించింది. 

అయితే ప్రభుత్వం తీసుకుంటున్న ఇటువంటి రక్షణ చర్యలను అంతర్జాతీయ వేదికలపై తప్పుగా చిత్రీకరించే ప్రయత్నాలు కూడా జరుగుతున్నాయి. భారత సార్వభౌమత్వాన్ని కాపాడుకునేందుకు చట్టాలు చేస్తుంటే..  అంతర్జాతీయ సమాజంలో  భారతదేశంలో ప్రజాస్వామ్యం ప్రమాదంలో పడింది,  సెక్యులరిజం నశిస్తోంది  అనే కథనాలను ఉద్దేశపూర్వకంగా ప్రచారం చేస్తున్నారు.  మరోవైపు అంతర్జాతీయ రేటింగ్ ఏజెన్సీలు, థింక్ ట్యాంకులు విడుదల చేసే డెమోక్రసీ ఇండెక్స్, ఫ్రీడమ్ హౌస్ నివేదికలు, మత స్వేచ్ఛా నివేదికలు వంటి వాటిని భారత అంతర్గత రాజకీయాల్లో ఆయుధాలుగా వాడుకునే సంస్కృతి పెరిగింది.

విదేశీ మీడియా సంస్థలు సృష్టించే ఈ నెరేటివ్స్ ఆధారంగా దేశంలో ఒక బలమైన వ్యతిరేక నెరేటివ్ ఎకోసిస్టమ్  నిర్మించే ప్రయత్నం జరుగుతోంది. ఒకవైపు చైనా   సరిహద్దుల్లో సైనికపరమైన ఒత్తిడినిపెంచుతూ, చుట్టుపక్కల దేశాలలో పెట్టుబడుల ద్వారా భారత్‌ను ఒంటరిని చేయాలని చూస్తోంది. మరోవైపు అమెరికా ఇండియాను వ్యూహాత్మక భాగస్వామిగా చూస్తూనే..  మానవ హక్కులు, మత స్వేచ్ఛ పేరిట వివిధ నివేదికలతో అంతర్గత ఒత్తిడిని (సాఫ్ట్ పవర్) తీసుకువస్తోంది.  ఈ రెండు భిన్నమైన అంతర్జాతీయ ఒత్తిళ్ల మధ్య ఇండియా తన  స్ట్రాటజిక్ ఆటానమీని ఇంకా స్పష్టంగా చెప్పాలంటే.. స్వతంత్ర విదేశాంగ విధానాన్ని కాపాడుకోవడం అత్యంత కీలకమైన సవాల్‌గా మారింది. అయితే ఈ సమస్యను విశ్లేషించేటప్పుడు అత్యుత్సాహం లేదా అతిశయోక్తులకు పోకుండా పారదర్శకమైన విధానాన్ని అవలంబించాల్సిన అవసరం ఉంది. 

దేశంలోని ప్రతి స్వచ్ఛంద సంస్థను శత్రువుగా చూడటం లేదా ప్రతి అంతర్జాతీయ నివేదికను కుట్రగా భావించడం సామాజిక శాంతికి మంచిది కాదు. కానీ విదేశాల నుండి వచ్చే ప్రతి రూపాయి ఎక్కడి నుండి వస్తోంది, ఎవరికి చేరుతోంది, ఏ లక్ష్యం కోసం ఖర్చవుతోంది అనే విషయంలో పూర్తి పారదర్శకత, జాతీయ చట్టాలకు లోబడి ఉండేలా చూసుకోవాల్సిన బాధ్యత ప్రభుత్వంపై ఉంది.  భవిష్యత్తులో ఈ  న్యూ కోల్డ్ వార్ ప్రభావం డిజిటల్ మరియు సోషల్ మీడియా విస్తృతితో మరింత తీవ్రమయ్యే అవకాశాలు స్పష్టంగా కనిపిస్తున్నాయి. తుపాకులు లేని ఈ సరికొత్త యుద్ధంలో సమాజం సురక్షితంగా ఉండాలంటే కేవలం ప్రభుత్వ నియంత్రణలు మాత్రమే సరిపోవు. డిజిటల్ మాధ్యమాలలో వచ్చే ప్రతి వార్తను, అంతర్జాతీయ నివేదికల వెనుక ఉన్న అసలు ఉద్దేశాలను ప్రశ్నించే, పరిశీలించే విమర్శనాత్మక ఆలోచనా ధోరణిని పౌర సమాజం అలవర్చుకోవాలి. దేశ అంతర్గత రాజకీయాలు మరియు ప్రజాస్వామ్య వ్యవస్థలను బాహ్య శక్తులు ప్రభావితం చేయకుండా నిరోధించాలంటే జాతీయ ఆత్మవిశ్వాసం, స్పష్టమైన అవగాహన మాత్రమే దేశానికి అసలైన శ్రీరామరక్ష అని విశ్లేషకులు అభిప్రాయపడుతున్నారు.  

-సీతారాం కంఠంనేని

ఈ విశ్లేషణ మీకు నచ్చినట్లయితే, దయచేసి https://www.teluguone.com పోర్టల్ ను  ఫాలో అవ్వండి. లైక్ చేయండి. షేర్ చేయండి. మీ విలువైన అభిప్రయాలను తెలియజేయండి.