భారతదేశ పటంలో ఆగ్నేయ దిశన బంగాళాఖాతంలో విసిరేసినట్లు కనిపించే అండమాన్ నికోబార్ దీవులను చాలామంది కేవలం పర్యాటక కేంద్రాలుగానే చూస్తారు. ఆహ్లాదకరమైన బీచ్‌లు, నీలి రంగు సముద్రం, పచ్చని ప్రకృతికి ఇవి నిలయమన్నది అందరికీ తెలిసిన విషయమే. అయితే..  రక్షణ కోణంలో చూస్తే ఇవి కేవలం దీవులు మాత్రమే కాదు, భారతదేశ భద్రతను కాపాడే ఒక సహజ సిద్ధమైన సముద్ర కోటలు. మలక్కా జలసంధికి అత్యంత సమీపంలో ఉండటం వల్ల..  అంతర్జాతీయ వాణిజ్య,  రక్షణ మార్గాలను పర్యవేక్షించడంలో ఈ దీవులు భారత దేశానికి ఒక ‘స్ట్రాటజిక్ గేట్‌వే’గా నిలుస్తున్నాయి.  

ఇండో-పసిఫిక్ ప్రాంతంలో పెరుగుతున్న భౌగోళిక రాజకీయ ఉద్రిక్తతల నేపథ్యంలో..  అండమాన్ నికోబార్ ప్రాధాన్యత గతంలో కంటే ఇప్పుడు మరింత పెరిగింది. ముఖ్యంగా మలక్కా జలసంధి ద్వారా జరిగే ప్రపంచ సముద్ర వాణిజ్యంలో సుమారు 24 శాతం, చమురు రవాణాలో 45 శాతం వాటా ఉంటుంది. చైనా, జపాన్ వంటి అగ్రరాజ్యాల ఇంధన అవసరాలు ఈ మార్గంపైనే ఆధారపడి ఉన్నాయి. ఈ నేపథ్యంలో, హిందూ మహాసముద్రంలో పెరుగుతున్న చైనా ప్రభావాన్ని అడ్డుకోవడానికి, మయన్మార్‌లోని కోకో దీవుల్లో చైనా ఇంటెలిజెన్స్ కార్యకలాపాలను పర్యవేక్షించడానికి అండమాన్ దీవులు భారత్‌కు బలమైన ఆయుధంగా మారాయి.  ప్రస్తుతం కేంద్ర ప్రభుత్వం ప్రతిష్టాత్మకంగా చేపట్టిన  గ్రేట్ నికోబార్ ప్రాజెక్ట్  చుట్టూ దేశవ్యాప్తంగా పెద్ద ఎత్తున చర్చ జరుగుతోంది. గలతియా బే వద్ద అంతర్జాతీయ ట్రాన్స్‌షిప్‌మెంట్ పోర్టు నిర్మాణం, డ్యూయల్-యూజ్ విమానాశ్రయం, పవర్ ప్లాంట్,  ఆధునిక పట్టణీకరణ వంటి అంశాలు ఈ ప్రాజెక్ట్‌లో భాగంగా ఉన్నాయి. రక్షణ రంగ నిపుణుల అభిప్రాయం ప్రకారం, ఇది భారతదేశపు  సింగపూర్  లేదా  హాంగ్ కాంగ్ గా మారే అవకాశం ఉంది.  కేవలం ఆర్థిక పరంగానే కాకుండా, భారత సైన్యానికి చెందిన ఏకైక  ట్రై-సర్వీస్ కమాండ్  (ఆర్మీ, నేవీ, ఎయిర్ ఫోర్స్ కలిపి ఉండే విభాగం) బలోపేతానికి ఇది వెన్నెముకగా నిలుస్తుంది.  

అయితే, ఈ ప్రాజెక్ట్ చుట్టూ రాజకీయ వివాదాలు కూడా ముసురుతున్నాయి. పర్యావరణ విధ్వంసం జరుగుతోందని, స్థానిక గిరిజన తెగల హక్కులకు భంగం కలుగుతోందని విపక్షాలు, ముఖ్యంగా కాంగ్రెస్ నేతలు ఆందోళన వ్యక్తం చేస్తున్నారు. భూ కేటాయింపుల్లో కార్పొరేట్ సంస్థల ప్రయోజనాలు ఉన్నాయనే విమర్శలు వినిపిస్తున్నాయి. దీనికి ప్రతిగా రక్షణ నిపుణులు,  వైమానిక దళ  మాజీ  అధికారులు స్పందిస్తూ..  దేశ భద్రతను దృష్టిలో ఉంచుకుని ఈ ప్రాజెక్ట్ నిర్మిస్తున్నామని, పర్యావరణ నష్టాన్ని తగ్గించేలా తగిన జాగ్రత్తలు తీసుకుంటున్నామని స్పష్టం చేస్తున్నారు. ప్రాజెక్ట్ వల్ల కేవలం 2 శాతం కంటే తక్కువ అటవీ విస్తీర్ణం మాత్రమే ప్రభావితమవుతుందని వారు వాదిస్తున్నారు.  

సైనిక కోణం నుండి చూస్తే..  హిందూ మహాసముద్రంలో భారత నావికాదళం తన పట్టును నిరూపించుకోవడానికి అండమాన్ నికోబార్ కమాండ్ (ఏఎన్సీ) కీలకం. చైనా సబ్‌మరైన్లు,  అండర్ వాటర్ డ్రోన్ల కదలికలను ఎప్పటికప్పుడు కనిపెట్టడానికి ఇక్కడి నిఘా వ్యవస్థలు ఉపయోగపడుతున్నాయి. ఐఎన్‌ఎస్ బాజ్ వంటి ఎయిర్‌బేస్‌ల విస్తరణ ద్వారా యుద్ధ విమానాల రాకపోకలకు మార్గం సుగమం అవుతోంది. ఇది కేవలం రక్షణకు మాత్రమే కాదు, విపత్తు సమయాల్లో మానవీయ సహాయం అందించడానికి కూడా ఒక ప్రధాన కేంద్రంగా ఉపయోగపడుతుంది.  ప్రస్తుతం జరుగుతున్న ఈ  నేరేటివ్ వార్ లో రెండు భిన్నమైన వాదనలు ప్రజల ముందు ఉన్నాయి. ఒకటి దేశ భద్రత,  వ్యూహాత్మక ప్రయోజనాల వైపు ఉంటే, మరొకటి పర్యావరణ,  సామాజిక హక్కుల వైపు ఉంది. ఈ ప్రాజెక్ట్ వల్ల కలిగే దీర్ఘకాలిక లాభాలను బేరీజు వేసుకోవడం ఇప్పుడు దేశం ముందున్న సవాలు. వాస్తవానికి అండమాన్‌లో నిర్మిస్తున్నది కేవలం ఒక ఓడరేవు మాత్రమే కాదు.  అది భవిష్యత్తులో భారత ప్రాదేశిక సమగ్రతను కాపాడే ఒక కవచం అని విశ్లేషకులు భావిస్తున్నారు.  రాబోయే రోజుల్లో గ్రేట్ నికోబార్ ప్రాజెక్ట్ పనులు ఎంత వేగంగా సాగుతాయనేది ఆసక్తికరంగా మారింది. అంతర్జాతీయ సమాజం కూడా ఈ పరిణామాలను నిశితంగా గమనిస్తోంది. ఇండో-పసిఫిక్ ప్రాంతంలో భారత్ తన ప్రాబల్యాన్ని చాటుకోవాలంటే, అండమాన్ నికోబార్ దీవులను ఆధునీకరించడం తప్పనిసరి. అభివృద్ధి మరియు పర్యావరణ పరిరక్షణ మధ్య సమతుల్యం సాధిస్తూ, ఈ స్ట్రాటజిక్ హబ్‌ను భారత్ ఎలా తీర్చిదిద్దుతుందో చూడాలి. దేశ భద్రతకు సంబంధించిన ఈ విషయంలో ప్రజల మద్దతు మరియు స్పష్టమైన అవగాహన ఎంతైనా అవసరం.  

- సీతారాం కంఠంనేని

ఈ విశ్లేషణ మీకు నచ్చినట్లయితే.. https://www.teluguone.comను అనుసరించండి.  షేర్ చేయండి.  మీ విలువైన అభిప్రాయాలను తెలియజేయండి.