టీడీపీ గ్రహస్థితి బాగుండాలంటే...

తెలుగుదేశం పార్టీ గ్రహస్థితి ఇప్పుడు చాలా బాగుంది. అన్ని గ్రహాలూ అనుకూలించాయి... పార్టీలోని నాయకులు, కార్యకర్తలు శ్రమించారు. తెలుగుదేశం పార్టీకి పదేళ్ళ తర్వాత అధికారం దక్కేలా చేశారు. ఇప్పుడు తెలుగుదేశం పార్టీ ఆంధ్రప్రదేశ్ రాష్ట్రాన్ని అభివృద్ధి పథంలో ముందుకు తీసుకుని వెళ్ళే పనిలో నిర్విరామంగా కృషి చేస్తోంది. ఇలాంటి సంతోషకరమైన సందర్భంలో కొంతమంది దృష్టి తెలుగుదేశం పార్టీ మీద పడుతోంది. వాళ్ళు ఎవరో కాదు... గతంలో తెలుగుదేశం పార్టీ కారణంగా రాజకీయాల్లో రాణించి, అనేక పదవులు అనుభవించి, పార్టీలో హవా నడిపించి... చివరికి పార్టీ కష్టకాలంలో వున్నప్పుడు పార్టీని వదిలిపెట్టి పోయినవారు... శత్రు శిబిరాల్లో చేరి, కన్నతల్లి లాంటి పార్టీనే, పార్టీ నాయకుడినే నానారకాల మాటలతో ‘దాడి’ చేసినవారు.... ఇప్పుడు తెలుగుదేశం పార్టీ పచ్చగా వుండేసరికి అలాంటి నాయకులకు ఇప్పుడు మళ్ళీ తెలుగుదేశం పార్టీ మీద కన్నుపడింది. మళ్ళీ ఈ పార్టీలో స్థానం సంపాదించి అందాలలకు ఎక్కాలని ఉవ్విళ్ళూరుతున్నారు. చంద్రబాబు పిలిస్తే పార్టీలో చేరతామని ఎందుకూ పనికిరాని ఆఫర్లు ఇస్తున్నారు. గ్రహస్థితి బాగాలేకపోవడం వల్లే గతంలో తెలుగుదేశం పార్టీని విడిచిపెట్టి వెళ్ళామని, ఇతర పార్టీలో వుండి తెలుగుదేశం పార్టీని తిట్టిన తిట్టు తిట్టకుండా తిట్టానని పశ్చాత్తాపపడుతున్నారు. తిరిగి తమను పార్టీలోకి తీసుకుంటే పార్టీ సేవలో తరిస్తామని అతి వినయంగా చెబుతున్నారు. గ్రహస్థితి బాగాలేక తెలుగుదేశం పార్టీని విడిచిపెట్టి వెళ్ళిన వారిని ఇప్పుడు తిరిగి పార్టీలో చేర్చుకోవాల్సిన అవసరం లేదు. తెలుగుదేశం పార్టీ గ్రహస్థితి ఇప్పుడు చాలా బాగుంది. ఇలాంటి పరిస్థితుల్లో పార్టీని వదిలి వెళ్ళిపోయిన దుష్టగ్రహాలను పార్టీలో చేర్చుకోకుండా వుండాలని పలువురు కార్యకర్తలు, నాయకులు భావిస్తున్నారు. అప్పుడే తెలుగుదేశం పార్టీ గ్రహస్థితి బాగుంటుందని అంటున్నారు.