తెలంగాణా ముఖ్యమంత్రిగా కేసీఆర్ బాధ్యతలు చెప్పట్టిన వెంటనే తెలుగు సినీ పరిశ్రమలో కొందరు పెద్దలకు స్వర్గీయ యన్టీఆర్ హయాంలో కేటాయించిన భూములను వెనక్కు తీసుకోవడంతో, సినీ పరిశ్రమలో తీవ్ర అభద్రతా భావం నెలకొని ఉంది. తెలుగు చిత్ర పరిశ్రమను కొత్త పుంతలు తొక్కించిన సూపర్ స్టార్ కృష్ణకు చాలా సాహసవంతుడిగా పేరుంది. హైదరాబాదుకు సినీ పరిశ్రమ తరలి రాగానే ఆయన పద్మాలయ స్టూడియో నిర్మించి అందులో అనేక గొప్ప చిత్రాలు తీసారు. కొద్ది రోజుల క్రితం తెలంగాణా ప్రభుత్వం ఆయన స్టూడియోకి ఆనుకొనున్న భూములను స్వాధీనం చేసుకొంది. బహుశః తరువాత తన స్టూడియో వంతు వస్తుందనే భయంతో కావచ్చు ఆయన తెలంగాణా ముఖ్యమంత్రి కేసీఆర్ ను పొగడ్తలతో ముంచెత్తి ప్రసన్నం చేసుకొనే పనిలో పడ్డారు. రాష్ట్ర విభజనతో సినీ పరిశ్రమ కూడా ఆంధ్ర, తెలంగాణా సినీ పరిశ్రమలుగా విడిపోయింది. తెలంగాణ సినీ పరిశ్రమను ప్రోత్సహించేందుకు కేసీఆర్ హైదరాబాదులో హాలీవుడ్ ను తలదన్నేలా ఒక సినీ సిటీ నిర్మిస్తానని కొద్ది రోజుల క్రితం చెప్పారు. ఈ సందర్భాన్ని పురస్కరించుకొని సూపర్ స్టార్ కృష్ణ ఆయనపై పొగడ్తల వర్షం కురిపించారు. సినీ పరిశ్రమ అభివృద్ధికి కృషి చేస్తున్న కేసీఆర్, తను నిర్మించబోయే సినీ సిటీకి తనపేరు పెట్టుకొంటే బాగుంటుందని కృష్ణ అన్నారు. తద్వారా భావి తరాలవారు ఆయనను ఎల్లపుడు గుర్తుంచుకోగలుగుతారని ఆయన అన్నారు. హైదరాబాదులో సినీ పరిశ్రమ స్థిరపడేందుకు విశేష కృషి చేసిన కృష్ణ వంటి వారు చాలా మంది ఉన్నారు. వారందరూ అక్కడ సినిమా స్టూడియోలు, రికార్డింగ్ దియేటర్లు వగైరాలు నిర్మించారు. అయితే ఎన్ని ఇబ్బందులు ఎదురవుతున్నప్పటికీ ఇప్పటికిప్పుడు వాటన్నిటినీ అమ్ముకొని బయటపడటం అసాధ్యం. కనుకనే తెలంగాణా ముఖ్యమంత్రి కేసీఆర్ ను ప్రసన్నం చేసుకొని ఇబ్బందులు లేకుండా కాలక్షేపం చేయాలని భావిస్తున్నారు. బహుశః ఆ ప్రయత్నంలోనే కృష్ణ కూడా కేసీఆర్ ని పొగిడి ఉండవచ్చును. అయితే కేసీఆర్ ఇటువంటి పొగడ్తలకు పడిపోయే రకం కాదని నాగార్జునకు చెందిన యన్.కన్వెన్షన్ సెంటర్ కూల్చివేత ఉదంతం స్పష్టం చేస్తోంది. అందువల్ల కృష్ణ కూడా తన జాగ్రత్తలో తను ఉండటం మంచిది.