ప్రస్తుత ఉరుకుల పరుగుల జీవితంలో మానసిక, శారీరక ఆరోగ్యానికి నిద్ర ఎంత కీలకమో అందరికీ తెలిసిందే. అయితే మారుతున్న కాలానికి అనుగుణంగా వైవాహిక బంధాల్లో కూడా కొత్త ధోరణులు చోటుచేసుకుంటున్నాయి. తాజాగా భారత్‌లో 'స్లీప్ డివోర్స్ అనే సరికొత్త ట్రెండ్ వెలుగులోకి వచ్చింది. వివాహ బంధంలో ఎటువంటి ఇబ్బందులు లేకపోయినప్పటికీ, కేవలం నాణ్యమైన నిద్ర కోసం భార్యాభర్తలు విడివిడిగా నిద్రించడాన్నే ఈ పేరుతో పిలుస్తున్నారు.

గతంలో భార్యాభర్తలు వేర్వేరు గదుల్లో పడుకోవడాన్ని వారి మధ్య గొడవలకు లేదా విడిపోవడానికి సంకేతంగా భావించేవారు. కానీ ఇప్పుడు పరిస్థితి మారుతోంది. తాజా అధ్యయనాల ప్రకారం, భారతదేశంలోని దాదాపు 53 శాతం మంది దంపతులు వారంలో కనీసం ఒక రోజైనా విడివిడిగా పడుకుంటున్నారని గణాంకాలు చెబుతున్నాయి. ముఖ్యంగా మిలీనియల్స్, యువ జంటల్లో ఈ ధోరణి ఎక్కువగా కనిపిస్తోంది.

ఈ స్లీప్ డివోర్స్ వెనుక ప్రధానంగా ఆచరణాత్మక కారణాలు ఉన్నాయని నిపుణులు విశ్లేషిస్తున్నారు. భాగస్వామి గట్టిగా గురక పెట్టడం, నిద్రలో పదేపదే కదలడం లేదా భిన్నమైన పని వేళల వల్ల ఒకరి నిద్రకు మరొకరు భంగం కలిగించుకుంటున్నారు. దీనివల్ల మరుసటి రోజు పనిపై ప్రభావం పడటమే కాకుండా, విసుగు, చిరాకు పెరిగి బంధంలో అనవసరమైన గొడవలకు దారితీస్తోంది.

మరికొన్ని సందర్భాల్లో రాత్రిపూట గది ఉష్ణోగ్రత  విషయంలో ఇద్దరి అభిరుచులు వేరుగా ఉండటం, బెడ్ పక్కనే మొబైల్ ఫోన్లు వాడటం కూడా నిద్రాభంగానికి కారణమవుతున్నాయి. ఇలాంటి చికాకుల కంటే విడివిడిగా పడుకుని ప్రశాంతంగా నిద్రపోవడం మేలని చాలా మంది భావిస్తున్నారు. ఈ నిర్ణయం వల్ల మరుసటి రోజు ఉదయం దంపతులు ఎంతో ఉత్సాహంగా, సానుకూల దృక్పథంతో ఒకరినొకరు కలుసుకోగలుగుతున్నారని నివేదికలు సూచిస్తున్నాయి.

అయితే, స్లీప్ డివోర్స్ అనేది కేవలం నిద్రకు సంబంధించిన అంశమేనని, ఇది మనసుల మధ్య దూరం కాదని నిపుణులు స్పష్టం చేస్తున్నారు. నిద్రలేమి వల్ల తలెత్తే ఆరోగ్య సమస్యలైన రక్తపోటు, మధుమేహం, గుండె జబ్బుల నుంచి తప్పుకోవడానికి ఇదొక ఆరోగ్యకరమైన మార్గమని వారు అభిప్రాయపడుతున్నారు. రాత్రిపూట వేర్వేరు గదుల్లో ఉన్నా, పగటిపూట నాణ్యమైన సమయాన్ని గడపడం ద్వారా బంధాన్ని మరింత బలోపేతం చేసుకోవచ్చని సూచిస్తున్నారు.మున్ముందు భారతీయ పట్టణ ప్రాంతాల్లో ఈ ట్రెండ్ మరింత పెరిగే అవకాశం ఉందని సామాజిక నిపుణులు అంచనా వేస్తున్నారు. సాంప్రదాయ పద్ధతుల కంటే వ్యక్తిగత ఆరోగ్యం, ప్రశాంతతకు ప్రాధాన్యత ఇచ్చే క్రమంలో ఈ మార్పులు సహజమేనని భావిస్తున్నారు.