ఇంగ్లండ్‌తో ఎడ్జ్‌బాస్టన్ వేదికగా జరిగిన తొలి వన్డే మ్యాచ్‌లో టీమిండియా అద్భుత విజయాన్ని అందుకుంది. అయితే ఈ విజయోత్సాహం మధ్యలోనే భారత క్రికెట్ అభిమానులను తీవ్ర ఆందోళనకు గురిచేసే ఒక ఊహించని సంఘటన చోటుచేసుకుంది. లక్ష్యఛేదనలో అద్భుతమైన ఫామ్‌తో దూసుకుపోతున్న భారత యువ కెప్టెన్ శుభ్‌మన్ గిల్ గాయం కారణంగా ఆట మధ్యలోనే రిటైర్డ్ హర్ట్‌గా మైదానాన్ని వీడాల్సి వచ్చింది. కెప్టెన్సీ బాధ్యతలను భుజాన వేసుకుని, జట్టును విజయతీరాలకు చేర్చే క్రమంలో గిల్ ఎదుర్కొన్న ఈ శారీరక ఇబ్బంది అభిమానులను కలవరపెట్టింది. మ్యాచ్ ముగిసినా గిల్ గాయం తీవ్రతపై ఇంకా స్పష్టత రాకపోవడంతో అందరిలోనూ ఉత్కంఠ నెలకొంది.

ఈ మ్యాచ్‌లో టాస్ గెలిచి మొదట బ్యాటింగ్ చేసిన ఇంగ్లండ్ జట్టు భారత బౌలర్ల ధాటికి ఒక దశలో కేవలం 107 పరుగులకే 6 వికెట్లు కోల్పోయి పీకల్లోతు కష్టాల్లో పడింది. ముఖ్యంగా భారత స్పిన్నర్ అక్షర్ పటేల్ తన మాయాజాలంతో 4 వికెట్లు పడగొట్టి ఇంగ్లాండ్ నడ్డి విరిచాడు. అయితే ఆ తర్వాత కోలుకున్న ఇంగ్లండ్ జట్టు జో రూట్, లియామ్ డాసన్ ల అర్ధ సెంచరీల అండతో నిర్ణీత ఓవర్లలో 258 పరుగుల గౌరవప్రదమైన స్కోరు సాధించగలిగింది. 259 పరుగుల విజయలక్ష్యంతో బరిలోకి దిగిన భారత జట్టుకు ప్రారంభంలోనే గట్టి షాక్‌లు తగిలాయి. సీనియర్ ఆటగాళ్లు రోహిత్ శర్మ 11 పరుగులకే, విరాట్ కోహ్లీ కేవలం 5 పరుగులకే వరుస ఓవర్లలో పెవిలియన్ చేరడంతో భారత్ తీవ్ర ఒత్తిడిలో పడింది.

ఇలాంటి క్లిష్ట సమయంలో కెప్టెన్ శుభ్‌మన్ గిల్ బాధ్యతాయుతమైన ఇన్నింగ్స్‌తో జట్టును ఆదుకున్నాడు. మైదానంలో క్లాస్ షాట్లతో అలరిస్తూ స్కోరు బోర్డును పరిగెత్తించాడు. శ్రేయస్ అయ్యర్‌తో కలిసి మూడో వికెట్‌కు ఏకంగా 101 పరుగుల విలువైన భాగస్వామ్యాన్ని నెలకొల్పాడు. గిల్ కేవలం 75 బంతుల్లోనే 80 పరుగులు చేసి సెంచరీ దిశగా సాగుతున్నాడు. అయితే ఇన్నింగ్స్ 24వ ఓవర్ సమయంలో గిల్ కుడి కాలు వెనుక భాగంలో తీవ్ర అసౌకర్యానికి గురయ్యాడు. భారత జట్టు ఫిజియో మైదానంలోకి వచ్చి గిల్‌కు స్ట్రెచింగ్ చేసి, ప్రాథమిక చికిత్స అందించారు. ఆ సమయంలో చికిత్సకు ఎక్కువ సమయం పట్టడంతో ఆన్‌ఫీల్డ్ అంపైర్ కుమార్ ధర్మసేన ఆటను త్వరగా ప్రారంభించాలని కోరారు.

gill injury update india victory england,india defeat england shubman gill 80 runs.