భారత ప్రధాని నరేంద్ర మోడీ మొన్న రష్యాకి, ఆ తర్వాత ఆఫ్ఘనిస్థాన్‌కి, అటు నుంచి అదే పాకిస్థాన్‌కి వెళ్ళొచ్చిన విషయం తెలిసిందే. పాకిస్థాన్ వెళ్ళినందుకు ఆ దేశంతో స్నేహ సంబంధాలు ఏర్పాటే అవకాశాలు మెరుగుపడ్డాయి... ఆప్ఘనిస్థాన్ వెళ్ళినందుకు మంచి మిత్రుడితో స్నేహం మరింత బలపడింది. రష్యాకి వెళ్ళినందుకు రష్యా మన దేశానికి బంపర్ ఆఫర్ ఇచ్చింది. అది అలాంటి ఇలాంటి ఆఫర్ కాదు... చైనా, పాకిస్థాన్, అమెరికా దేశాలు బిత్తరపోయి, మనసులో కుళ్ళుకునే ఆఫర్. నరేంద్రమోడీ రష్యాలో అడుగుపెట్టిన వేళా విశేషం బాగున్నట్టుంది. అందుకే రష్యా మాంచి బంపర్ ఆఫర్ ప్రకటించింది. FAGA (T-50) వార్ ఫైటర్ టెక్నాలజీని మన దేశానికి ఇవ్వడానికి రష్యా అక్షరాలా ఆరు బిలియన్ డాలర్లు అడిగింది. అయితే ఇప్పుడు మోడీ రష్యా వెళ్ళినప్పుడు ఆ టెక్నాలజీని ఆరు బిలియన్ డాలర్లకు కాకుండా కేవలం 3.7 బిలియన్ డాలర్లకే మొత్తం టెక్నాలజీని మనకు ఇస్తానని రష్యా చెప్పింది. అక్కడితో ఆగకుండా నమూనాగా మరొక మూడు ఫైటర్లను ఇస్తానని బంపర్ ఆఫర్ ఇచ్చింది. అంటే అత్యధునికమైన ఫైటర్లను, ఇకనుండి మనమే సొంతగా తయారుచేసుకొవచ్చు. సదరు టెక్నాలజీని మరింతగా అభివృద్ధి చేసుకోవచ్చన్నమాట. ఊహించని ఈ ఆఫర్‌కి ఇండియా పాలకులు సంతోషంలో మునిగిపోతే, చైనా, పాకిస్థాన్లతోపాటు పాటు అమెరికా కూడా బిత్తరపోతున్నాయిట. గతంలో చైనా రష్యాని ఎంత బతిమాలినా, బామాలినా ఆయుధాల తయారీకి సంబంధించిన టెక్నాలజీని ఇవ్వనుగాక ఇవ్వనని రష్యా తేల్చి చెప్పేసింది. అదే ఇండియాకి మాత్రం అడక్కుండానే ఇచ్చింది. అడగక ఇచ్చిన ఆయుధాలే ముద్దు అంటే ఇదేనేమో. FAGA (T-50) రష్యన్ ఫైటర్ ప్రపంచంలోనే అత్యంత అత్యధునికమైన శక్తివంతమైన రెండవ వార్ ఫైటర్. మొదటిది అమెరికా తయారుచేస్తున్న 35G2. ఇది ప్రస్తుతం ట్రయల్ రన్‌లో వుంది. ఇప్పుడు రష్యా ఇచ్చిన ఆఫర్‌తో మన దేశం తయారు చేసే వార్ ఫైటర్లు కూడా త్వరలో అమెరికా ముందు మన దేశం తలెత్తుకునేలా చేస్తాయన్నమాట.