ఇది ప్రతిపక్షం కాదు.. అతిపక్షం

ఆంధ్రప్రదేశ్ రాష్ట్రంలో ఇప్పుడున్నది ప్రతిపక్షం అని చెప్పడానికి ఎంతమాత్రం అర్హత కనిపించడం లేదు. అతిపక్షం అనే మాట ఇప్పుడున్న ప్రతిపక్షానికి అతికినట్టు సరిపోతుంది. నవ్యాంధ్రప్రదేశ్ రాష్ట్రానికి తొలి ప్రభుత్వం ఏర్పడినప్పటి నుంచి నిర్మాణాత్మకంగా వ్యవహరించాల్సిన ప్రతిపక్షం విధ్వంసాత్మకంగా వ్యవహరిస్తోంది. ప్రతి చిన్న విషయాన్ని కోతి పుండును బ్రహ్మరాక్షసిలా చేసే విధంగా సొంత మీడియాతో నానాయాగీ చేస్తున్న ప్రతిపక్ష నాయకుడి విధానంలో బోలెడంత అతి కనిపిస్తోంది. అందుకనే పై మాట వాడాల్సి వచ్చింది. రాజధాని భూముల విషయంలో, ప్రాజెక్టుల విషయంలో, అసెంబ్లీ సమావేశాల సందర్భంగా ప్రతిపక్ష నేత వ్యవహరించిన అతిపక్ష తీరు ఆంధ్రప్రదేశ్ ప్రజలకు చిరాకు తెప్పించింది. ఏపీ ప్రజలకు ఇప్పటి వరకు ఎన్నో ప్రతిపక్షాలను చూశారు. కానీ ఇప్పుడున్న తరహా ప్రతిపక్షాన్ని మాత్రం ఇంతవరకు ఏపీ ప్రజలు మాత్రమే కాదు.. దేశంలోని ఏరాష్ట్రంలోనూ ఎవరూ చూసి వుండరని చెప్పుకుంటే అతిశయోక్తి కాదు. గతంలో విషయాలు అలా వుంటే, ఇప్పుడు ఆర్టీసీ సమ్మె సందర్భంగా సదరు అతిపక్ష నాయకుడు వ్యవహరిస్తున్న తీరు దారుణంగా వుంది. ఆర్టీసీ ఉద్యోగులు ఆచరణ సాధ్యం కాని కోర్కెలతో సమ్మె చేస్తుంటే ప్రజలు ఎంతో ఇబ్బంది పడుతున్నారు. ప్రజల ఇబ్బందిని దృష్టిలో పెట్టుకుని అయినా సమ్మెను వ్యతిరేకించినట్టయితే ఓ పద్ధతిగా వుండేది. అయితే సదరు అతిపక్ష నాయకుడు మాత్రం సమ్మెకు మద్దతు ప్రకటించడం దారుణం. అంటే ప్రజలు ఇబ్బంది పడటాన్ని ఆయన సమర్థిస్తున్నారన్నమాట. ఆయన సొంత మీడియా కూడా సమ్మె ప్రభుత్వ తప్పు అన్నట్టుగా కలరింగ్ ఇస్తూ కథనాలు ఇస్తోంది. మొత్తమ్మీద ఈ అతిపక్ష తీరును ప్రజలు చీదరించుకుంటున్నారు.