బాలీవుడ్ చలనచిత్ర పరిశ్రమలో ప్రస్తుతం మారుతున్న సమీకరణాలు, అంతర్గత పరిణామాలు ఒక స్పష్టమైన వాస్తవాన్ని వెల్లడిస్తున్నాయి. ఇండస్ట్రీని చాన్నాళ్లుగా శాసిస్తున్న పాత నియంత్రణ వ్యవస్థలు క్రమంగా తమ ప్రభావాన్ని కోల్పోతున్నాయని స్పష్టమవుతోంది. ప్రముఖ నటుడు రణ్‌వీర్ సింగ్‌కు వ్యతిరేకంగా ఫెడరేషన్ ఆఫ్ వెస్టర్న్ ఇండియా సినీ ఎంప్లాయీస్ (ఎఫ్ డబ్ల్యుఐసీఈ)  నాలుగు లక్షల మంది సభ్యులతో కూడిన సహాయ నిరాకరణ  ప్రకటన చేయడం దీనికి తాజా ఉదాహరణ. అయితే, పైకి ఇది ఒక శిక్షగా కనిపిస్తున్నప్పటికీ..  నిజానికి ఇది పరిశ్రమలోని పెద్దల నిస్సహాయతకు అద్దం పడుతోందనే వాదనలు వినిపిస్తున్నాయి. ఒకప్పుడు స్టార్లను సులభంగా నియంత్రించిన శక్తులు, ఇప్పుడు మారుతున్న కాలానికి అనుగుణంగా తమ పట్టును కోల్పోతున్నాయని ఈ పరిణామాలు నిరూపిస్తున్నాయి.

ప్రస్తుతం రణ్‌వీర్ సింగ్ చుట్టూ నడుస్తున్న ఈ వివాదాన్ని పరిశీలిస్తే.. ఇది మింగలేక కక్కలేక అన్న చందంగా తయారైంది. బహిరంగంగా చూస్తే, డాన్ 3 సినిమా నుండి రణ్‌వీర్ సింగ్ తప్పుకున్నాడనే నెపంతో ఎఫ్‌డబ్ల్యూఐసీఈ ఈ కఠిన నిర్ణయం తీసుకున్నట్లు ప్రచారం జరుగుతోంది. తమ సభ్యులెవరూ ఆయనతో కలిసి పనిచేయకూడదనే నిబంధనను తెరపైకి తెచ్చారు. కానీ ఇండస్ట్రీ లోగుట్టు తెలిసిన విశ్లేషకుల ప్రకారం, ఇది నిజమైన నిషేధం కాదు, కేవలం ఒక రకమైన బెదిరింపు మాత్రమే. సినిమా రంగానికి రణ్‌వీర్ సింగ్ లాంటి భారీ క్రేజ్ ఉన్న హీరో ఎంతో అవసరం, కానీ ఇండస్ట్రీలోని కొన్ని వర్గాలు తమ స్వంత షరతులకు ఆయన లొంగి ఉండాలని భావిస్తున్నాయి. ఆయన దానికి అంగీకరించకపోవడంతోనే ఈ తరహా ఒత్తిడి తంత్రాలు మొదలయ్యాయి.

ఈ మొత్తం వ్యవహారానికి ప్రధాన కారణం రణ్‌వీర్ సింగ్ నటించిన  ధురందర్ (2025) చిత్రం సాధించిన అఖండ విజయమేనని చెప్పవచ్చు. ఈ సినిమా బాక్సాఫీస్ వద్ద ఏకంగా రూ. 1300 కోట్ల వసూళ్లను సాధించి సరికొత్త రికార్డులను సృష్టించింది. ఈ భారీ విజయంతో రణ్‌వీర్ మార్కెట్ విలువ, స్టార్‌డమ్ ఊహించని స్థాయికి చేరుకున్నాయి. అంతకుముందు వరకు రణ్‌వీర్ విషయంలో ఒడిదుడుకులు చూసిన డాన్ 3  నిర్మాతలు, ఈ విజయాల తర్వాతే ఆయనతో ప్రాజెక్టును ఎలాగైనా ముందుకు తీసుకెళ్లాలని పట్టుబట్టారు. అయితే.. పెరిగిన తన మార్కెట్ విలువకు అనుగుణంగా రణ్‌వీర్ సింగ్ తన పారితోషికాన్ని, ఇతర నిబంధనలను సవరించాలని కోరడం, దానికి నిర్మాతలు సిద్ధంగా లేకపోవడంతో వివాదం ముదిరి చివరకు సంఘాల జోక్యానికి దారితీసింది.

బాలీవుడ్ చరిత్రలో ఇలాంటి వ్యూహాలు కొత్తేమీ కాదు. సరిగ్గా ఇరవై ఏళ్ల క్రితం నాటి స్టార్ హీరో సన్నీ డియోల్ విషయంలోనూ ఇలాంటి ఎత్తుగడలనే ఉపయోగించారు. కాకపోతే..  ఆ సమయంలో ఇండస్ట్రీ పెద్దలు అనుకున్నది సాధించగలిగారు, కానీ ప్రస్తుత డిజిటల్ యుగంలో రణ్‌వీర్‌పై ఆ పప్పులు ఉడకడం లేదు. నాడు ఘటక్  (1996), బార్డర్ (1997),  భారతీయ సినిమా చరిత్రలోనే అత్యధిక టిక్కెట్లు అమ్ముడైన చిత్రంగా రికార్డు సృష్టించిన గదర్ (2001) వంటి భారీ బ్లాక్‌బస్టర్లతో సన్నీ డియోల్ తిరుగులేని మాస్ హీరోగా ఎదిగారు. కాషాయ తిలకంతో, జాతీయవాద,  దేశభక్తి పూరిత పాత్రలతో ఆయన సంపాదించుకున్న క్రేజ్ అప్పట్లో కొందరికి నచ్చలేదు.

తీరా 2004లో దేశంలో రాజకీయ సమీకరణాలు మారిన తర్వాత, సినిమా రంగంలోనూ కథల ఎంపిక మారింది. సరిహద్దు దేశాలతో స్నేహాన్ని కాంక్షించే కథలకు ప్రాధాన్యత పెరిగింది. ఫలితంగా పాకిస్తాన్ నేపథ్యంతో బలమైన దేశభక్తి సినిమాలు చేసే సన్నీ డియోల్ లాంటి నటుడిని ప్రధాన స్రవంతి చిత్రాల నుండి పక్కన పెట్టడం ప్రారంభించారు. పెద్ద నిర్మాణ సంస్థలు, అగ్ర దర్శకులు ఆయనకు అవకాశాలు ఇవ్వడం మానేశారు. మీడియా సైతం ఆయనను కాలం చెల్లిన నటుడిగా చిత్రీకరించింది. అప్పట్లో ప్రేక్షకులకు నేరుగా తమ గళాన్ని వినిపించే సామాజిక మాధ్యమాలు లేకపోవడం వల్ల, ఇండస్ట్రీ వర్గాలు సన్నీ డియోల్‌ను దాదాపు రెండు దశాబ్దాల పాటు పక్కన పెట్టడంలో విజయవంతమయ్యాయి.

కానీ..  నేటి డిజిటల్ సమాజంలో రణ్‌వీర్ సింగ్ విషయంలో అదే తరహా ఫార్ములా పూర్తిగా విఫలమవుతోంది. దీనికి ప్రధాన కారణం సోషల్ మీడియా విప్లవం. ఈ రోజుల్లో ఒక నటుడి స్టార్‌డమ్‌ను కేవలం కొద్దిమంది ఇండస్ట్రీ పెద్దలు లేదా పీఆర్ సంస్థలు నిర్ణయించలేవు. ట్విట్టర్ ట్రెండ్స్, ఇన్‌స్టాగ్రామ్ రీల్స్, మీమ్స్ ద్వారా ప్రేక్షకులు తమకు నచ్చిన హీరోలను సొంతంగా సెలబ్రేట్ చేసుకుంటున్నారు. దీనికి తోడు ప్రస్తుతం బాలీవుడ్ తీవ్రమైన ఆర్థిక,  కంటెంట్ సంక్షోభాన్ని ఎదుర్కొంటోంది. ఇటీవలి కాలంలో సల్మాన్ ఖాన్ నటించిన సికందర్  పండుగ సీజన్‌లోనూ ఆశించిన వసూళ్లు రాబట్టలేకపోయింది. అక్షయ్ కుమార్ సైతం వరుస పరాజయాలతో సతమతమవుతున్నారు. 2023-24 ఆర్థిక సంవత్సరంలో హిందీ సినిమా బాక్సాఫీస్ రాబడి గణనీయంగా 13 శాతం పడిపోయింది.

ఇలాంటి బలహీన స్థితిలో ఉన్న బాలీవుడ్‌కు ధురందర్ సినిమా  రూ. 1300 కోట్ల భారీ విజయంతో  ఊపిరి పోసింది. పాత ఫార్ములాతో వస్తున్న స్పై యూనివర్స్ సినిమాలు ఆదరణ కోల్పోతుండగా..  వాస్తవికతతో కూడిన కథలకు ప్రేక్షకులు బ్రహ్మరథం పడుతున్నారు.  డాన్ 3 ప్రాజెక్టును 2023లోనే ప్రకటించినప్పటికీ..  సరైన స్క్రిప్ట్ లేక రెండున్నరేళ్లు కాలయాపన చేశారు. ఒక దశలో రణ్‌వీర్‌ను మార్చి హృతిక్ రోషన్‌ను పెట్టాలని కూడా భావించారు. కానీ రణ్‌వీర్  ధురందర్ తో హిట్టు కొట్టగానే..  నిర్మాతలు హడావిడిగా ఈ ఏడాదిలోనే సినిమాను విడుదల చేస్తామంటూ ప్రకటనలు గుప్పించారు. ప్రీ-ప్రొడక్షన్ కోసం రూ. 45 కోట్లు ఖర్చు చేశామంటూ ఫర్హాన్ అక్తర్ సంస్థ ఎఫ్‌డబ్ల్యూఐసీఈని ఆశ్రయించడం, మే 25, 2026న రణ్‌వీర్‌పై ఈ ఆంక్షల ప్రకటన రావడం వెనుక ఉన్న అసలు నాటకం ఇదే.

ఈ పరిణామాలన్నీ గమనిస్తే సినిమా పరిశ్రమకు కేవలం వ్యాపార ప్రయోజనాలే ముఖ్యమని అర్థమవుతుంది. ఒకప్పుడు  ధురందర్ సినిమా శైలిని వ్యతిరేకించిన అలియా భట్, వరుణ్ ధావన్ వంటి స్టార్లే ఇప్పుడు ఆ చిత్రాన్ని ఆకాశానికెత్తుతున్నారు. ఆ సినిమా దర్శకుడు ఆదిత్య ధర్ రాత్రికి రాత్రే మోస్ట్ వాంటెడ్ దర్శకుడిగా మారగా..  నటులు అక్షయ్ ఖన్నా, అర్జున్ రాంపాల్ ల మార్కెట్ వాల్యూ భారీగా పెరిగింది. కాబట్టి..  రణ్‌వీర్ సింగ్‌ను పరిశ్రమ నుండి దూరం పెట్టడం అనేది ఆర్థికంగా ఎవరికీ సాధ్యం కాని పని. ఈ సహాయ నిరాకరణ ఉత్తర్వులు కేవలం ఆయనను లొంగదీసుకోవడానికి వేసిన ఎత్తుగడ మాత్రమే. నాడు సన్నీ డియోల్ ఒంటరిగా పోరాడాల్సి వచ్చింది..  కానీ నేడు ప్రేక్షకుల మద్దతు, తన సొంత బాక్సాఫీస్ బలంతో రణ్‌వీర్ సింగ్ మరింత శక్తిమంతంగా నిలబడ్డారు. బాలీవుడ్‌లో పాత శకం ముగిసి, నటుల స్వయంప్రతిపత్తి పెరిగే కొత్త యుగానికి ఇది స్పష్టమైన సంకేతం.

-సీతారాం కంఠంనేని

ఈ విశ్లేషణ మీకు నచ్చినట్లయితే, దయచేసి https://www.teluguone.com పోర్టల్ ను  ఫాలో అవ్వండి. లైక్ చేయండి. షేర్ చేయండి. మీ విలువైన అభిప్రయాలను తెలియజేయండి.