సంచలన వ్యాఖ్యలు, వాదాస్పద డిజిటల్ కంటెంట్ ద్వారా వార్తల్లో నిలిచిన ప్రశ్న రావణ్ కు న్యాయస్థానంలో మరోసారి ఎదురుదెబ్బ తగిలింది.  విద్వేషపూరిత వ్యాఖ్యల ఆరోపణలపై చట్ట వ్యతిరేక కార్యకలాపాల నియంత్రణ చట్టం ఉపా  కింద నమోదైన కేసులో ఆయనకు లీగల్ రిలీఫ్ లభించలేదు. గన్నవరం న్యాయస్థానం శనివారం (జులై 18)  రావణ్ రిమాండ్‌ను పొడిగిస్తూ  ఆదేశాలను జారీ చేసింది. దీంతో ఆయన మరికొన్ని రోజుల పాటు జైలులోనే గడపాల్సిన పరిస్థితి ఏర్పడింది.

ఈ కేసు విచారణలో భాగంగా, ప్రస్తుతం నెల్లూరు కేంద్ర కారాగారంలో రిమాండ్ ఖైదీగా ఉన్న రావణ్‌ను పోలీసులు గన్నవరం కోర్టులో  వర్చువల్ విధానంలో ప్రవేశపెట్టారు. ఈ సందర్భంగా న్యాయస్థానంలో ఇరుపక్షాల లాయర్ల మధ్య సుదీర్ఘ వాదనలు జరిగాయి. నిందితుడిపై ఉన్న తీవ్రమైన ఆరోపణలపై దర్యాప్తు   కొనసాగుతున్నందున అతని రిమాండ్‌ను  పొడిగించాలని ప్రభుత్వ పక్ష న్యాయవాదులు కోరారు. మరో వైపు.. ప్రశ్న రావణ్ తరఫు న్యాయవాదులు తమ క్లయింట్ ఇప్పటికే తగినంత కాలం జైలులో ఉన్నాడనీ,  దర్యాప్తునకు పూర్తిగా సహకరిస్తున్నాడని కోర్టుకు వివరించి బెయిలు మంజూరు చేయాలని కోరారు. ఇరు పక్షాల వాదనలూ విన్న న్యాయమూర్తి ప్రశ్న రావణ్ బెయిలు పిటిషన్ ను తిరస్కరించి రిమాండ్ పొడిగించారు.   

ప్రస్తుతానికి దిగువ న్యాయస్థానంలో ఆశించిన ఫలితం దక్కకపోవడంతో, రావణ్ న్యాయవాదులు ఇప్పుడు రాష్ట్ర అత్యున్నత న్యాయస్థానాన్ని ఆశ్రయించారు. తనపై రాజకీయ కక్షసాధింపు చర్యల్లో భాగంగానే వరుస కేసులు పెట్టారని, వాటన్నింటినీ పూర్తిగా కొట్టివేయాలంటూ  క్వాష్ పిటిషన్  రావణ్ తరఫున ఆంధ్రప్రదేశ్ హైకోర్టులో   పిటిషన్ దాఖలైంది. ఈ పిటిషన్ ప్రస్తుతం హైకోర్టు పరిశీలనలో పెండింగ్‌లో ఉంది.

Prasna Ravan, Gannavaram Court, Remand Extension, UAPA Case, AP Police