మంత్రి పొంగులేటి శ్రీనివాస్ రెడ్డికి చెందినదిగా ఆరోపణలు ఎదుర్కొంటున్న రాఘవ కన్‌స్ట్రక్షన్స్ సంస్థకు సంబంధించిన మానస హిల్స్ మైనింగ్ వ్యవహారంపై జాతీయ మానవ హక్కుల కమిషన్ సీరియస్‌గా స్పందించినట్లు సమాచారం. రాజేంద్రనగర్ పరిధిలో జరిగినట్లు ఆరోపణలు ఉన్న మైనింగ్ కార్యకలాపాలపై కమిషన్ పలు కీలక ప్రశ్నలు లేవనెత్తింది.

అవసరమైన అనుమతులు లేకుండా తవ్వకాలు ఎలా జరిగాయి? చట్టం సామాన్య ప్రజలకు ఒకలా, ప్రభావవంతమైన వ్యక్తులు లేదా వారి సంస్థలకు మరోలా అమలవుతుందా? అంటూ సంబంధిత అధికారులను కమిషన్ ప్రశ్నించినట్లు తెలుస్తోంది.

మైనింగ్ వ్యవహారంలో రెవెన్యూ శాఖ, గనుల శాఖ, కాలుష్య నియంత్రణ మండలి, హెచ్ఎండీఏ తమ బాధ్యతలను ఎందుకు నిర్వర్తించలేదనే అంశంపైనా NHRC వివరణ కోరినట్లు సమాచారం. మైనింగ్‌కు అవసరమైన అనుమతులు ఉన్నాయా? ఉంటే వాటి పరిధిలోనే తవ్వకాలు జరిగాయా? పర్యావరణ, మైనింగ్ నిబంధనలు పాటించారా? అనే అంశాలపై పూర్తి నివేదిక ఇవ్వాలని ఆదేశించినట్లు తెలుస్తోంది.

అనుమతులు లేకుండా మైనింగ్ జరిగినట్లు తేలితే మినరల్స్ అండ్ మినరల్స్ (డెవలప్‌మెంట్ అండ్ రెగ్యులేషన్) చట్టం–MMDR Act ప్రకారం చర్యలు తీసుకోవాలని కేంద్ర ప్రభుత్వానికి NHRC సూచించినట్లు సమాచారం. అలాగే ఈ అంశంపై ఎనిమిది వారాల్లోగా చర్యలు తీసుకుని నివేదిక సమర్పించాలని కేంద్ర బొగ్గు గనుల శాఖను ఆదేశించినట్లు తెలుస్తోంది. NHRC తాజా ఆదేశాలతో మానస హిల్స్ మైనింగ్ వ్యవహారం మరోసారి చర్చనీయాంశంగా మారింది. అయితే ఈ అంశంపై సంబంధిత శాఖలు లేదా రాఘవ కన్‌స్ట్రక్షన్స్ తరఫున అధికారిక స్పందన వెలువడాల్సి ఉంది.

Ponguleti Srinivasa Reddy, Raghava Constructions,  NHRC, National Human Rights Commission, Manasa Hills, Rajendranagar, Illegal Mining Allegations, Mining Permissions