ఫిలిప్పీన్స్ అధ్యక్షుడు రోడ్రిగో డుటెర్టీ గతంలో అమెరికా అధ్యక్షుడు బరాక్ ఒబామాపై వివాదాస్పద వ్యాఖ్యలు చేసిన సంగతి తెలిసిందే. అందుకుగాను ఒబామా రెండు దేశాల మధ్య జరగాల్సిన భేటీని కూడా రద్దు చేశారు. ఆతరువాత రోడ్రిగో తాను చేసిన వ్యాఖ్యలకు క్షమాపణలు కోరడంతో మళ్లీ సమావేశం జరిగింది. అయితే ఇప్పుడు మళ్లీ తాజాగా రోడ్రిగో డుటెర్టీ  ఒబామాపై విరుచుకుపడ్డారు. క్షిపణుల విషయంలో ఆయన ఒబామాపై ఆగ్రహం వ్యక్తం చేశారు. క్షిపణులు తదితర ఆయుధాలను తొలుత విక్రయిస్తామని హామీ ఇచ్చిన అమెరికా ఇప్పుడు మాట తప్పిందని.. దీంతో అమెరికా అంటే గౌరవం పోయిందని అన్నారు. అంతేకాదు అమెరికా ఆయుధాలు విక్రయించకుంటే, తామేమీ బాధపడబోమని, రష్యా, చైనాలు అందుకు సిద్ధంగా ఉన్నాయని చెబుతూ 'గో టూ హెల్' అని వ్యాఖ్యానించారు. ప్రభుత్వ అధికారులను రష్యాకు పంపించనున్నానని, "ఏం బాధపడొద్దు. మీకు కావాల్సిన వన్నీ మా దగ్గరున్నాయి. వాటిని మేము మీకు అందిస్తాం" అని రష్యా నుంచి హామీ లభించిందని తెలిపారు. మరి దీనిపై ఒబామా ఎలా స్పందిస్తారో చూడాలి.