వరంగల్ లోక్‌సభ స్థానానికి ఉప ఎన్నిక జరగబోతున్న నేపథ్యంలో అక్కడ అన్ని పార్టీలూ హోరాహోరీగా ప్రచారం చేస్తున్నాయి. అధికార పార్టీతో సహా అన్ని పార్టీలూ ఈ స్థానంలో తమ విజయం ఖాయమని కుండబద్దలు కొట్టి మరీ చెబుతున్నాయి. చివరికి తెలంగాణలో ఉనికేలేని వైసీపీ కూడా వరంగల్ స్థానం మాదేనని సగర్వంగా చెబుతూ వుండటం విశేషం. పోలింగ్ తేదీ ముంచుకుని వస్తూ వుండటంతో పార్టీలన్ని ప్రచారాన్ని ఉద్ధృతం చేశాయి. టీఆర్ఎస్ పార్టీకి చెందిన కీలక నాయకులందరూ వరంగల్‌లోనే మకాం వేసి ప్రచారం చేస్తున్నారు. అయితే వారికి ప్రజల నుంచి తీవ్ర స్థాయిలో నిరసనలు ఎదురవుతున్నాయి. కాంగ్రెస్ అభ్యర్థి సర్వే సత్యనారాయణ, బీజేపీ - టీడీపీ అభ్యర్థి దేవయ్య కూడా ప్రచారంలో దూసుకుపోతున్నారు. వైసీపీ తరఫున సినీ నటి రోజా మొన్ననే వరంగల్ నియోజకవర్గంలో ప్రచారం మొదలుపెట్టారు. ఈ నేపథ్యంలో తమ ప్రచారానికి సినీ గ్లామర్ కూడా జోడిస్తే మంచిగా వుంటుందని టీడీపీ, బీజేపీ వర్గాలు భావిస్తున్నాయి. త్వరలో తమ తరఫున పవన్ కళ్యాణ్ ప్రచారంలోకి వచ్చే అవకాశం వుందని ఆ పార్టీల వర్గాలు చెబుతున్నాయి. ఈ మేరకు బీజేపీ కేంద్ర నాయకత్వం, తెలుగుదేశం అగ్ర నాయకత్వం పవన్ కళ్యాణ్‌తో సంప్రదింపులు కూడా ప్రారంభించేశారని, రేపో మాపో పవన్ కళ్యాణ్ ప్రచారానికి ఓకే అని రంగంలోకి దిగే అవకాశం వుందని టీడీపీ - బీజేపీ వర్గాలు చెబుతున్నాయి. గురువారం నాడు ఏపీ ముఖ్యమంత్రి చంద్రబాబును కలసిన పవన్ కళ్యాణ్ చాలా సానుకూల ధోరణిలో కనిపించారు. దీన్ని తమ పార్టీలకు అనుకూలంగా మలచుకుని టీడీపీ - బీజేపీకిలకు వరంగల్‌లో ప్రచారం కోసం దించాలన్న ప్రయత్నాలు ముమ్మరంగా సాగుతున్నట్టు తెలుస్తోంది. 2014 సాధారణ ఎన్నికలలో పవన్ కళ్యాణ్ టీడీపీ - బీజేపీ తరఫున ప్రచారం చేసిన విషయం తెలిసిందే.