చూడటానికి వృద్ధుడు. చాలా సాధారణంగా ఉంటాడు. జీవనం గడిపేందుకు చిన్న కిళ్లీ కొట్టు నడుపుతుంటా. అతడి వాహనం సైకిల్. చేతిలో సైకిల్ఇది బయటకు కనిపించేది. కానీ ఈ వృద్ధుడికి మరో వ్యాపకం ఉంది. అదే అసలు వ్యాపారం.  హైదరాబాద్ నగరంలో గత ఆరు నెలలుగా ఆయన అత్యంత రహస్యంగా చేస్తున్న వ్యాపారాన్ని పోలీసులు బట్టబయలు చేశారు.  

జియాగూడకు చెందిన అరవై ఏళ్ల బావుద్దీన్   ఓ చిన్న కిళ్లీ కొట్టు యజమానిగా మాత్రమే అందరికీ తెలుసు..  కానీ ఈజీ మనీ కోసం అక్రమ మార్గం ఎంచుకున్నాడు. ధూల్‌పేట్‌లో గంజాయి ప్యాకెట్లు కొనుగోలు చేసి నగరంలోని పలు ప్రాంతాల్లో సైకిల్‌పై తిరుగుతూ విక్రయించేవాడు.

గత ఆరునెలలుగా గుట్టు చప్పుడు కాకుండా ఈ వ్యవహారం సాగించాడు. పోలీసులకు ఇసుమంతైనా అనుమానం రాకుండా అత్యంత పకడ్బందీగా, చాకచక్యంగా ఈ మత్తు వ్యాపారం సాగించాడు.  10 గ్రాముల గంజాయి ప్యాకెట్‌ను ధూల్ పేటలో 250 రూపాయలకు కొని రెట్టింపు లాభానికి అంటే  500కు విక్రయిస్తూ  లాభాలు ఆర్జిస్తున్నాడు.   రోజుకు తక్కువలో తక్కువ   10 ప్యాకెట్లు విక్రయిస్తూ గత ఆరు నెలలుగా ఈ అక్రమ వ్యాపారం కొనసాగిస్తున్నాడు. చివరకు పోలీసులకు చిక్కాడు.  

ఇందిరానగర్ ప్రాంతంలో ఓ వ్యక్తికి గంజాయి విక్రయిస్తున్న సమయంలో పోలీసులు రెడ్‌హ్యాండెడ్‌గా పట్టుకున్నారు. నిందితుడి వద్ద నుంచి 30 గ్రాముల గంజాయి స్వాధీనం చేసుకుని అరెస్టు చేసి రిమాండ్‌కు తరలించారు. సాధారణంగా కనిపించిన ఈ వృద్ధుడి రహస్య గంజాయి వ్యాపారం బయటపడటంతో స్థానికులు విస్మయానికి గురయ్యారు.