ఇండియా,  జపాన్  మధ్య దౌత్య సంబంధాలు ఇప్పుడు కేవలం ప్రభుత్వాల స్థాయికే పరిమితం కాకుండా.. భారీ పారిశ్రామిక,  నైపుణ్యాల భాగస్వామ్యంగా రూపాంతరం చెందాయి. దేశీయ ఆటోమొబైల్ రంగాన్ని మలుపు తిప్పే విధంగా హర్యానాలోని ఖార్ఖోడా లో మారుతి సుజుకి ఇండియా లిమిటెడ్ తన నాలుగో మెగా వాహన తయారీ కేంద్రాన్ని  అందుబాటులోకి తెచ్చింది. భారత ప్రధానమంత్రి నరేంద్ర మోదీ, జపాన్ ప్రధాని సనాఏ తకాఇచి సంయుక్తంగా వీడియో కాన్ఫరెన్స్ ద్వారా ఈ అత్యాధునిక ప్లాంట్‌ను ప్రారంభించడం ఇరు దేశాల ఆర్థిక వ్యూహాలకు అద్దం పడుతోంది. అదే సమయంలో..  జపాన్‌కు చెందిన ఫుకుఒకా ప్రిఫెక్చర్‌తో హర్యానా ప్రభుత్వం కుదుర్చుకున్న సరికొత్త స్కిల్ మైగ్రేషన్ ఒప్పందం ద్వారా దాదాపు 50 వేల మంది స్థానిక యువతకు ఉపాధి కల్పించడమే లక్ష్యంగా పెట్టుకోవడం పారిశ్రామిక వర్గాల్లో చర్చనీయాంశమైంది.

 35 వేల కోట్ల పెట్టుబడి.. 21 వేల మందికి ఉపాధి అవకాశాలు

ఖార్ఖోడాలో దాదాపు 800 ఎకరాల విస్తీర్ణంలో ఏర్పాటు చేసిన ఈ మెగా తయారీ ప్లాంట్  మేక్ ఇన్ ఇండియా నినాదానికి  కొత్త రూపాన్ని ఇస్తోంది. ప్రాథమికంగా ఈ ప్లాంట్ ఉత్పత్తి సామర్థ్యం ఏడాదికి  5 లక్షల యూనిట్లుగా ఉండగా, రాబోయే రోజుల్లో దీనిని  10 లక్షలు  యూనిట్లకు పెంచాలని మారుతి సుజుకి సంస్థ లక్ష్యంగా పెట్టుకుంది. ఈ ప్రతిష్టాత్మక ప్రాజెక్ట్ కోసం  35 వేల కోట్ల రూపాయల  పెట్టుబడులు కేటాయించారు. దీని ద్వారా ప్రత్యక్షంగా,   పరోక్షంగా  21 వేల మందికి పైగా యువతకు ఉపాధి లభించనుంది. పర్యావరణ పరిరక్షణను దృష్టిలో ఉంచుకుని 100 శాతం పునరుత్పాదక ఇంధనం, ఆర్టిఫిషియల్ ఇంటెలిజెన్స్  ఆధారిత కోబోట్స్,  జీరో-లిక్విడ్-డిశ్చార్జ్ వంటి అధునాతన సాంకేతికతలతో ఈ స్మార్ట్ ఫ్యాక్టరీని డిజైన్ చేయడం విశేషం.

హర్యానా-ఫుకుఒకా కనెక్ట్..  అంతర్జాతీయ వేదికపై భారత నైపుణ్యం

మరోవైపు, చండీగఢ్‌లో నిర్వహించిన ఉన్నత స్థాయి సమావేశంలో హర్యానా విదేశీ సహకార విభాగం, హర్యానా కౌశల్ రోజ్‌గార్ నిగమ్  జపాన్ ప్రతినిధులతో కీలక చర్చలు జరిపాయి. ప్రస్తుతం జపాన్‌లోని ఫుకుఒకా ప్రాంతంలో దాదాపు 80 శాతం సాంకేతిక పరిశ్రమలు తీవ్రమైన మానవ వనరుల కొరతను ఎదుర్కొంటున్నాయి. ఈ నైపుణ్యాల లోటును భర్తీ చేయడానికి హర్యానా యువతకు జపాన్ ఆహ్వానం పలుకుతోంది. ఐదేళ్ల కాలపరిమితిలో 50వేల మంది యువకులకు టెక్నికల్ స్కిల్ ట్రైనింగ్,  జపనీస్ భాషా కోర్సులలో శిక్షణ ఇచ్చి, అక్కడ కేర్‌గివింగ్, మాన్యుఫాక్చరింగ్, కన్స్ట్రక్షన్ మరియు ఐటీ రంగాలలో ప్లేస్‌మెంట్స్ కల్పించనున్నారు.

చారిత్రక ప్రయాణం,  ఎగుమతుల విస్తరణ

1980వ దశకంలో చిన్న కార్ల విప్లవంతో ప్రారంభమైన మారుతి సుజుకి ప్రయాణం నేడు గ్లోబల్ మార్కెట్‌ను శాసించే స్థాయికి చేరింది. సుజుకి మోటార్ కార్పొరేషన్  కు భారత్ ఇప్పుడు ప్రధానమైన హబ్‌గా మారింది. గుజరాత్ ప్లాంట్‌లో తయారవుతున్న సరికొత్త ఈ విటారా   బ్యాటరీ ఎలక్ట్రిక్ వాహనాలను ఇప్పటికే దాదాపు 100 దేశాలకు ఎగుమతి చేస్తున్నారు. భారత దేశంలో తయారైన కార్లను జపాన్ అత్యధికంగా దిగుమతి చేసుకుంటుండటం గమనార్హం. ఖార్ఖోడాలో రెండవ ప్లాంట్ కూడా పూర్తి స్థాయిలో అందుబాటులోకి రావడంతో, సంస్థ   మొత్తం వార్షిక ఉత్పత్తి సామర్థ్యాన్ని 40 లక్షల యూనిట్లకు చేర్చాలనే వ్యూహానికి బలమైన పునాది పడింది.

గ్లోబల్ టాలెంట్ హబ్ వర్సెస్ బ్రెయిన్ డ్రెయిన్ 

ఈ ద్వైపాక్షిక వృద్ధి వ్యూహాలు దేశ ప్రగతికి ఎంతగానో తోడ్పడతాయని ప్రభుత్వ వర్గాలు వివరిస్తున్నప్పటికీ, అంతర్జాతీయ వలసల విధానంపై మేధావుల నుంచి కొన్ని  ప్రశ్నలు కూడా వ్యక్తమవుతున్నాయి. ఒకవైపు దేశీయంగా ఆటోమొబైల్, సెమీకండక్టర్   ఈవీ రంగాలు వేగంగా విస్తరిస్తున్న తరుణంలో, స్థానిక ప్రతిభావంతులు పెద్ద సంఖ్యలో విదేశాలకు వెళ్లడం వల్ల భవిష్యత్తులో దేశీయ పరిశ్రమలకు నైపుణ్యం కలిగిన సిబ్బంది కొరత ఏర్పడే ప్రమాదం ఉందనే వాదనలు వస్తున్నాయి. జపాన్‌లో అందించే వేతనాలు అక్కడి స్థానిక ప్రమాణాలకు సమానంగా ఉండేలా చూడటం, సామాజిక భద్రత, హెల్త్ ఇన్సూరెన్స్ వంటి సాంకేతిక,  న్యాయపరమైన అంశాలపై స్పష్టమైన పర్యవేక్షణ అవసరమని కార్మిక హక్కుల నిపుణులు అభిప్రాయపడుతున్నారు.

 మారుతి సుజుకి ఖార్ఖోడా మెగా ప్లాంట్ ప్రారంభోత్సవం,  హర్యానా-ఫుకుఒకా స్కిల్ ఒప్పందం నిరంతరం అభివృద్ధి చెందుతున్న భారత్, జపాన్ పారిశ్రామిక బంధానికి నిలువెత్తు నిదర్శనాలుగా నిలుస్తున్నాయి.  పారిశ్రామిక అభివృద్ధి, హరిత ఉత్పాదక ప్రమాణాలు దేశ ఆర్థిక వ్యవస్థను అంతర్జాతీయ స్థాయికి తీసుకువెళ్తున్న తరుణంలో, ఉపాధి మార్కెట్ స్థిరత్వం,  స్థానిక శ్రామిక శక్తుల హక్కుల పరిరక్షణను సమతుల్యంగా మేనేజ్ చేయడం దీర్ఘకాలిక వృద్ధికి ఎంతో కీలకం కానుంది.

 -సీతారాం కంఠంనేని

ఈ విశ్లేషణ మీకు నచ్చినట్లయితే, దయచేసి https://www.teluguone.com పోర్టల్ ను  ఫాలో అవ్వండి. లైక్ చేయండి. షేర్ చేయండి. మీ విలువైన అభిప్రయాలను తెలియజేయండి.       

Maruti Suzuki Kharkhoda Plant, India Japan Relations, Haryana Fukuoka Skill Agreement, PM Narendra Modi, Sanae Takaichi, Viksit Bharat, Make in India Automobile