పశ్చిమాసియాలో కొనసాగుతున్న యుద్ధం ప్రపంచ ఇంధన మార్కెట్లపై ప్రభావం చూపుతోంది. ముఖ్యంగా చమురు సరఫరాపై ఆందోళనలు పెరగడంతో డీజిల్‌, పెట్రోల్‌, వంటగ్యాస్ ధరలు పెరిగే అవకాశాలు ఉన్నాయని నిపుణులు చెబుతున్నారు. దీంతో గ్యాస్‌పై పూర్తిగా ఆధారపడకుండా ప్రత్యామ్నాయ వంట పద్ధతులపై ప్రజలు దృష్టి సారిస్తున్నారు. ఒకప్పుడు గ్రామాలు, పట్టణాల్లో కట్టెల పొయ్యిలు, కిరోసిన్ స్టవ్‌లు, బొగ్గుల కుంపట్లు వంటకు సాధారణంగా ఉపయోగించేవారు. ఇప్పుడు ఆధునిక సాంకేతికతతో పాటు సంప్రదాయ పద్ధతులూ కలిపి అనేక మార్గాలు అందుబాటులో ఉన్నాయి. గ్యాస్ లేకుండానే వంట చేసుకునే కొన్ని ముఖ్యమైన ప్రత్యామ్నాయాలను పరిశీలిద్దాం.

1. ఇండక్షన్ కుక్‌టాప్

పట్టణాల్లో గ్యాస్ స్టవ్‌కు ప్రధాన ప్రత్యామ్నాయంగా ఇండక్షన్ కుక్‌టాప్‌లు మారుతున్నాయి. ఇవి విద్యుత్‌తో పనిచేస్తూ మంట లేకుండా అయస్కాంత శక్తితో పాత్రను నేరుగా వేడి చేస్తాయి. అందువల్ల వంట త్వరగా పూర్తవుతుంది. పాలు మరిగించడం, పప్పులు ఉడికించడం, కూరలు వండడం వంటి పనులకు ఇవి చాలా అనుకూలంగా ఉంటాయి.

2. ఇన్‌ఫ్రారెడ్ ఎలక్ట్రిక్ స్టవ్

ఇండక్షన్ స్టవ్‌లా కనిపించినా ఇది ఇన్‌ఫ్రారెడ్ కాయిల్స్ ద్వారా వేడి ఉత్పత్తి చేస్తుంది. అన్ని రకాల పాత్రలతో వాడుకోవచ్చు. అయితే పైభాగం ఎక్కువగా వేడెక్కడం, విద్యుత్ వినియోగం కొంచెం ఎక్కువగా ఉండటం దీనిలోని లోపాలు.

3. కాయిల్ స్టవ్ (ఎలక్ట్రిక్ హాట్ ప్లేట్)

విద్యుత్‌తో పనిచేసే ఈ పరికరం తక్కువ ఖర్చుతో దొరికే వంట సాధనం. లోపల ఉండే కాయిల్ వేడెక్కి పాత్రను వేడి చేస్తుంది. దాదాపు అన్ని రకాల పాత్రలతో వాడొచ్చు. కానీ వేడెక్కడానికి కొంత సమయం పడుతుంది.

4. ఎలక్ట్రిక్ రైస్ కుక్కర్

చాలా ఇళ్లలో ఇప్పటికే ఉపయోగంలో ఉన్న పరికరం ఇది. అన్నం, పప్పు, సూప్‌, కూరలు వంటి వంటలను సులభంగా తయారు చేయవచ్చు. పదార్థాలు వేసి నీరు పోసి ఆన్ చేస్తే వంట పూర్తవుతుంది. అయితే వేపుడు వంటలు లేదా రోటీలు చేయడం సాధ్యం కాదు.

5. మైక్రోవేవ్ ఓవెన్

ముఖ్యంగా వంటలను వేడి చేయడానికి, ఆవిరి వంటలకు ఇది ఉపయోగపడుతుంది. నీటి అణువులను వేడి చేసి ఆహారాన్ని త్వరగా వేడి చేస్తుంది. కానీ స్టవ్‌లా అన్ని రకాల వంటలకు ఉపయోగపడదు.

6. సోలార్ కుక్కర్

సూర్యరశ్మిని ఉపయోగించి వంట చేసే పర్యావరణ హిత పద్ధతి ఇది. సూర్యకాంతిని కేంద్రీకరించి పాత్రను వేడెక్కేలా చేస్తుంది. ఇంధనం అవసరం ఉండదు. అయితే మబ్బులు ఉన్నపుడు లేదా రాత్రివేళల్లో వాడలేము.

7. కిరోసిన్ స్టవ్

గ్యాస్ స్టవ్‌లకు ముందు కాలంలో ఎక్కువగా వాడిన పరికరం ఇది. కిరోసిన్ నింపి మంట వెలిగించి వంట చేస్తారు. మంట బలంగా ఉన్నా పొగ, వాసన ఇబ్బంది కలిగించవచ్చు.

8. బయోగ్యాస్ స్టవ్

పశువుల పేడ, కిచెన్ వ్యర్థాలను కుళ్ళించి ఉత్పత్తి చేసే మీథేన్ గ్యాస్‌తో ఈ స్టవ్ పనిచేస్తుంది. ఇది చౌకైనదే కాకుండా పర్యావరణానికి కూడా మేలు చేస్తుంది. అయితే బయోగ్యాస్ ప్లాంట్ ఏర్పాటు చేయడానికి కొంత స్థలం అవసరం.

9. బ్యూటేన్ కార్ట్రిడ్జ్ స్టవ్

చిన్న గ్యాస్ కార్ట్రిడ్జ్‌లతో పనిచేసే పోర్టబుల్ స్టవ్ ఇది. సాధారణంగా క్యాంపింగ్‌, పర్యటనల్లో వాడతారు. గ్యాస్ స్టవ్‌లా వంట చేయవచ్చు. కానీ కార్ట్రిడ్జ్‌ల ఖర్చు కొంచెం ఎక్కువగా ఉంటుంది.

10. బయోమాస్ పెల్లెట్ స్టవ్

వ్యవసాయ వ్యర్థాలతో తయారుచేసిన పెల్లెట్లను ఇంధనంగా ఉపయోగించే స్టవ్. సంప్రదాయ కట్టెల పొయ్యిల కంటే పొగ తక్కువగా ఉంటుంది. అయితే పెల్లెట్లు అన్ని ప్రాంతాల్లో సులభంగా దొరకకపోవచ్చు.

11. రాకెట్ స్టవ్
చిన్న కట్టెలతో ఎక్కువ వేడి అందించేలా రూపొందించిన ప్రత్యేక స్టవ్ ఇది. తక్కువ ఇంధనంతో వంట చేయవచ్చు. సాధారణంగా బయట వంటకు ఎక్కువగా ఉపయోగిస్తారు.

12. బొగ్గుల స్టవ్

బొగ్గు లేదా చార్కోల్‌ను కాల్చి వంట చేసే సంప్రదాయ పద్ధతి. వేడి స్థిరంగా ఉంటుంది. అయితే పొగ, కార్బన్ మోనాక్సైడ్ వంటి సమస్యలు ఉండే అవకాశం ఉంది.

13.హైబ్రిడ్ కిచెన్ – ఉత్తమ పరిష్కారం

ప్రస్తుత పరిస్థితుల్లో ఒకే ఇంధనంపై ఆధారపడకుండా “హైబ్రిడ్ కిచెన్” ఏర్పాటు చేసుకోవడం ఉత్తమ మార్గమని నిపుణులు సూచిస్తున్నారు. అంటే గ్యాస్ స్టవ్‌తో పాటు ఇండక్షన్ స్టవ్‌, ఎలక్ట్రిక్ కుక్కర్‌, మైక్రోవేవ్ వంటి పరికరాలను కలిపి ఉపయోగించడం. ఒక ఇంధనం అందుబాటులో లేకపోయినా వంట ఆగకుండా ఉంటుంది.

పట్టణాల్లో విద్యుత్ ఆధారిత పరికరాలు ఉపయోగపడితే, గ్రామీణ ప్రాంతాల్లో బయోగ్యాస్‌, పెల్లెట్ స్టవ్‌లు, కట్టెల పొయ్యిలు వంటి స్థానిక ఇంధనాలు ప్రత్యామ్నాయంగా ఉపయోగపడతాయి. ఇలా వివిధ వంట పద్ధతులను కలిపి ఉపయోగించడం ద్వారా ఇంధనాన్ని, సమయాన్ని కూడా ఆదా చేసుకోవచ్చు.