మైనర్‌ బాలికపై లైంగిక దాడి ఆరోపణలు ఎదుర్కొంటున్న కేంద్ర సహాయ మంత్రి బండి సంజయ్ కుమారుడు భగీరథ్‌ కేసులో పోలీసులు విచారణను ముమ్మరం చేశారు. నిందితుడు దేశం విడిచి పారిపోకుండా ఉండేందుకు పోలీసులు లుకౌట్‌ నోటీసులు జారీ చేసినట్లు సమాచారం. భగీరథ్‌పై ఇప్పటికే పోక్సో చట్టం కింద కేసు నమోదై ఉండగా, ప్రస్తుతం అతడు పరారీలో ఉన్నట్లు తెలుస్తోంది. అతని ఆచూకీ కోసం పోలీసులు ఐదు ప్రత్యేక బృందాలతో విస్తృతంగా గాలింపు చర్యలు చేపట్టారు.

బండి సాయి భగీరథ్‌పై నమోదైన పోక్సో (POCSO) కేసు ప్రస్తుతం రెండు తెలుగు రాష్ట్రాల్లో తీవ్ర సంచలనంగా మారింది. మైనర్ బాలికపై లైంగిక దాడికి పాల్పడ్డారనే ఆరోపణలతో హైదరాబాద్‌లోని పేట్ బషీరాబాద్ పోలీస్ స్టేషన్‌లో ఈ నెల 8న నమోదైన ఈ కేసు రోజుకో మలుపు తిరుగుతోంది. బాధితురాలి ఇచ్చిన స్టేట్‌మెంట్ ఆధారంగా సైబరాబాద్ పోలీసులు దర్యాప్తును ముమ్మరం చేశారు. 

తొలుత సాధారణ సెక్షన్ల కింద కేసు నమోదు చేసినప్పటికీ, కేసు తీవ్రతను బట్టి పోలీసులు తర్వాత తీవ్రమైన శిక్షలకు ఆస్కారమున్న అగ్రివేటెడ్ పెనెట్రేటివ్ సెక్సువల్ అసాల్ట్ (పోక్సో సెక్షన్ 5(l) r/w 6) సెక్షన్లను ఎఫ్‌ఐఆర్‌లో చేర్చారు. దీంతో ఈ కేసు ఒక్కసారిగా అత్యంత ప్రాధాన్యతను సంతరించుకుంది. అధికార పక్షాలు, ప్రతిపక్షాలు మరియు ప్రజా సంఘాల మధ్య తీవ్ర రాజకీయ దుమారం రేగుతోంది.ఈ ఘటనపై తెలంగాణ ముఖ్యమంత్రి ఎనుముల రేవంత్ రెడ్డి స్వయంగా స్పందించి, ఉన్నతాధికారులతో సమీక్షా సమావేశం నిర్వహించారు. చట్టం ముందు ఎవరూ చుట్టాలు కారని, ఎంతటి వారైనా సరే చట్టప్రకారం కఠిన చర్యలు తీసుకోవాలని స్పష్టమైన ఆదేశాలు జారీ చేశారు. 

ముఖ్యమంత్రి ఆదేశాల మేరకు కూకట్‌పల్లి డీసీపీ రిత్రిరాజ్ పర్యవేక్షణలో ఒక ప్రత్యేక దర్యాప్తు బృందాన్ని (SIT) ఏర్పాటు చేశారు. ఈ ప్రత్యేక బృందం బాధితురాలి నుంచి మరిన్ని వివరాలను సేకరించి, ఫామ్‌హౌస్ వివరాలు, అపార్ట్‌మెంట్ రికార్డులు మరియు నిందితుడి మొబైల్ లొకేషన్ డేటా వంటి కీలక సాక్ష్యాలను సేకరిస్తోంది. అలాగే బాధితురాలి వయస్సును నిర్ధారించడానికి హైదరాబాద్‌లోని ప్రైవేట్ ఆసుపత్రి నుంచి బర్త్ సర్టిఫికేట్ రికార్డులను కూడా పోలీసులు స్వాధీనం చేసుకుని పరిశీలిస్తున్నారు. చట్టం తన పని తాను చేసుకుపోతుందని, రాజకీయ ఒత్తిళ్లకు తావులేదని పోలీసు ఉన్నతాధికారులు స్పష్టం చేశారు.

మరోవైపు పోలీసుల నోటీసులకు బండి భగీరథ్ గడువులోగా స్పందించకపోవడంతో ఆయన ప్రస్తుతం పరారీలో ఉన్నట్లు పోలీసులు ప్రకటించారు. నిందితుడి మొబైల్ ఫోన్ స్విచ్ఛాఫ్ రావడంతో ఆయన కోసం సైబరాబాద్ పోలీసులు ప్రత్యేక బృందాలను ఢిల్లీ మరియు కరీంనగర్‌కు పంపించారు. అయితే, వ్యక్తిగత కారణాల వల్ల మరియు నోటీసులు చాలా తక్కువ సమయంలో ఇవ్వడం వల్ల తాను విచారణకు రాలేకపోతున్నానని, డాక్యుమెంట్లు సిద్ధం చేసుకోవడానికి రెండు రోజుల సమయం కావాలని కోరుతూ భగీరథ్ పేట్ బషీరాబాద్ స్టేషన్ హౌస్ ఆఫీసర్‌కు సోషల్ మీడియా ద్వారా ఒక లేఖను పంపినట్లు తెలుస్తోంది. 

ఇదే సమయంలో కరీంనగర్, సికింద్రాబాద్ రైల్వే స్టేషన్ పరిసర ప్రాంతాల్లో భగీరథ్ ఫోటోలతో కూడిన 'అబ్స్కాండింగ్' పోస్టర్లు వెలియడం తీవ్ర కలకలం రేపింది. ఈ పోస్టర్లపై సర్వత్రా చర్చ నడుస్తోంది. అరెస్ట్ నుంచి తప్పించుకోవడానికి బండి భగీరథ్ తెలంగాణ హైకోర్టును ఆశ్రయించి ముందస్తు బెయిల్ పిటిషన్‌తో పాటు క్వాష్ పిటిషన్ దాఖలు చేశారు. తనపై రాజకీయ కక్షసాధింపు చర్యల్లో భాగంగానే తప్పుడు కేసు పెట్టారని ఆయన తరపు న్యాయవాదులు వాదిస్తున్నారు. 

బాధితురాలి వయస్సు 19 నుండి 20 సంవత్సరాల మధ్య ఉంటుందని, గతంలో జరిగిన ఒక రోడ్డు ప్రమాద కేసు రికార్డుల ప్రకారం ఆమె మైనర్ కాదని హైకోర్టు వెకేషన్ బెంచ్ ముందు వాదనలు వినిపించేందుకు సిద్ధమయ్యారు. బాలిక వయస్సును కావాలనే తగ్గించి పోక్సో చట్టాన్ని దుర్వినియోగం చేశారని రికార్డులను సమర్పించేందుకు ప్రయత్నిస్తున్నారు. ఈ హైకోర్టు తీర్పు మరియు పోలీసుల తదుపరి చర్యలపైనే ఈ హైప్రొఫైల్ కేసు భవిష్యత్తు ఆధారపడి ఉంది. తెలంగాణ అంతటా ఈ కేసు పరిణామాలు తీవ్ర ఉత్కంఠను రేకెత్తిస్తున్నాయి.