ఐపీఎల్ 2026లో శుక్రవారం  హైదరాబాద్ సన్ రైజర్స్, రాయల్ చాలెంజర్స్ బెంగళూరు జట్ల మధ్య హైదరాబాద్ వేదికగా జరిగిన మ్యాచ్ లో  హై డ్రామా చోటుచేసుకుంది.  ఈ మ్యాచ్‌లో  సన్ రైజర్స్ హైదరాబాద్ 55 పరుగుల భారీ తేడాతో విజయం సాధించింది. అయితే ఈ విజయం కాదు.. అందరి దృష్టినీ ఆకర్షించిన విషయం మాత్రం కింగ్ విరాట్ కోహ్లీ, ట్రావిస్ హెడ్ మధ్య వివాదమే.  మ్యాచ్ ముగిసిన తర్వాత సాంప్రదాయకంగా ఆటగాళ్లు ఒకరికొకరు కరచాలనం చేసుకునే సమయంలో విరాట్ కోహ్లీ ఆస్ట్రేలియా బ్యాటర్ ట్రావిస్ హెడ్‌ను పూర్తిగా విస్మరించడం ఇప్పుడు సోషల్ మీడియాలో హాట్ టాపిక్ గా మారింది.  షేక్ హ్యాండ్ కోసం ట్రావిస్ హెడ్ తన చేతిని చాచినప్పటికీ..  కోహ్లీ అతడిని కనీసం పట్టించుకోకుండా పక్కకు వెళ్ళిపోయాడు. అయితే ఎస్ఆర్హెచ్ కెప్టెన్ ప్యాట్ కమిన్స్, ఇషాన్ కిషన్ వంటి ఇతర ఆటగాళ్లను మాత్రం ఆత్మీయంగా పలకరించాడు.

అయితే ఇందుకు కారణం లేకపోలేదు..  మొదటి ఇన్నింగ్స్‌లో రాసిఖ్ సలామ్ దార్ బౌలింగ్‌లో ట్రావిస్ హెడ్ 26 పరుగుల వద్ద క్లీన్ బౌల్డ్ అయినప్పుడు విరాట్ కోహ్లీ ఎంతో దూకుడుగా, విపరీతమైన హావభావాలతో సెలబ్రేషన్స్ చేసుకున్నాడు. ఆ తర్వాత ఆర్‌సీబీ 256 పరుగుల భారీ లక్ష్య ఛేదనలో ఉన్నప్పుడు మూడో ఓవర్‌లో వెంకటేష్ అయ్యర్ ఫోర్లు బాదుతున్న సమయంలో విరాట్ కోహ్లీ నేరుగా ట్రావిస్ హెడ్‌ వైపు తిరిగి కొన్ని వ్యాఖ్యలు చేశాడు. హెడ్ ఈ సీజన్‌లో ఎక్కువగా ఇంపాక్ట్ ప్లేయర్‌గా రావడంపై కోహ్లీ,  ఇంపాక్ట్ సబ్ సైన్ చేసి, గ్రౌండ్‌లో మాటలు చెప్పడం కాదు ధైర్యముంటే వచ్చి బౌలింగ్ వేయాలంటూ సవాల్ విసిరాడు. ఈ స్లెడ్జింగ్‌కు హెడ్ కూడా గట్టిగానే బదులిచ్చాడు, నువ్వు నేను బౌలింగ్‌కు రాకముందే అవుట్ అయిపోతావు అంటూ కౌంటర్ ఇచ్చాడు.

ఈ మాటల యుద్ధం తరువాత కోహ్లీ..   11 బంతుల్లో 15 పరుగులు మాత్రమే చేసి  ఔటయ్యాడు. కోహ్లీ అవుట్ అయినప్పటికీ.. మ్యాచ్ ముగిసే సమయానికి హెడ్ నిజంగానే బౌలింగ్‌కు వచ్చాడు. 19వ ఓవర్‌లో బంతిని అందుకున్న హెడ్, అద్భుతంగా ఆడుతూ 56 పరుగులు చేసిన ఆర్‌సీబీ కెప్టెన్ రజత్ పాటిదార్‌ను అవుట్ చేసి మ్యాచ్‌ను పూర్తిగా ఎస్ఆర్హెచ్ వైపు తిప్పాడు.  మొత్తం మీద.. ఇరువురి మధ్యా వివాదం విషయం ఎలా ఉన్నా..  హెడ్‌కు షేక్‌హ్యాండ్ ఇవ్వకుండా కోహ్లీ తప్పుకోవడం క్రీడా స్ఫూర్తికి విరుద్ధంగా ఉందని నెట్టింట వ్యాఖ్యలు వెల్లువెత్తుతున్నాయి.