ప్రపంచ క్రికెట్ చరిత్రలో తనకంటూ ఒక సువర్ణాధ్యాయాన్ని లిఖించుకున్న ఇంగ్లాండ్ బ్యాటింగ్ దిగ్గజం జో రూట్ మరో చారిత్రాత్మక రికార్డు ముంగిట నిలిచాడు. సుదీర్ఘ టెస్టు ఫార్మాట్‌లో ఇప్పటికే పలు దిగ్గజాల రికార్డులను తిరగరాసిన రూట్, ఇప్పుడు ఆస్ట్రేలియా మాజీ కెప్టెన్ రికీ పాంటింగ్ పేరు మీద ఉన్న ఒక ఆల్‌టైమ్ అత్యుత్తమ రికార్డును అధిగమించేందుకు సిద్ధమయ్యాడు.తమ సొంత గడ్డపై ఆడుతూ అత్యధిక టెస్టు పరుగులు చేసిన బ్యాటర్‌గా రికీ పాంటింగ్ దాదాపు దశాబ్ద కాలంగా అగ్రస్థానంలో కొనసాగుతున్నాడు. ఆస్ట్రేలియాలో ఆడిన 92 టెస్టుల్లో 154 ఇన్నింగ్స్ పూర్తి చేసిన పాంటింగ్ ఏకంగా 7,578 పరుగులు సాధించి అగ్రస్థానాన నిలిచాడు. కానీ, ఇప్పుడు ఇంగ్లాండ్‌లో జో రూట్ కనిపిస్తున్న విధ్వంసకర ఫామ్ ముందు ఈ రికార్డు త్వరలోనే తుడిచిపెట్టుకుపోయేలా కనిపిస్తోంది.ఇప్పటివరకు ఇంగ్లాండ్ వేదికగా 87 టెస్టులు ఆడిన జో రూట్ 153 ఇన్నింగ్స్‌లలో 7,500 పరుగులు పూర్తి చేసుకున్నాడు. రికీ పాంటింగ్‌ను అధిగమించి, స్వదేశీ గడ్డపై టెస్టుల్లో అత్యధిక పరుగులు చేసిన ప్రపంచపు నంబర్ వన్ బ్యాటర్‌గా సరికొత్త చరిత్ర సృష్టించడానికి రూట్‌కు కేవలం 79 పరుగులు మాత్రమే అవసరం. హెడింగ్లే వేదికగా జరుగుతున్న మ్యాచ్‌లోనే ఈ మైలురాయిని అందుకోవడానికి అతడు తీవ్రంగా శ్రమిస్తున్నాడు.  ఈ జాబితాలో భారత్‌కు చెందిన క్రికెట్ దేవుడు సచిన్ టెండూల్కర్ 7,216 పరుగులతో మూడో స్థానంలో ఉండగా, శ్రీలంక దిగ్గజం మహేళ జయవర్ధనే 7,167 పరుగులతో, దక్షిణాఫ్రికా ఆల్‌రౌండర్ జాక్వెస్ కల్లిస్ 7,035 పరుగులతో తదుపరి స్థానాల్లో ఉన్నారు. జో రూట్ కేవలం 87 టెస్టుల్లోనే 7,500 మైలురాయిని అందుకోవడం అతడి స్థిరత్వానికి, ప్రతిభకు నిదర్శనం.  ఇది మాత్రమే కాదు, టెస్టు క్రికెట్‌లో అత్యధిక అర్థశతకాలు (50+) బాదిన సచిన్ టెండూల్కర్ రికార్డుపై కూడా జో రూట్ కన్నేశాడు. 200 టెస్టులాడిన సచిన్ కెరీర్‌లో 68 హాఫ్ సెంచరీలు నమోదు చేయగా, 167 టెస్టుల్లో ఆడిన రూట్ ఇప్పటికి 67 అర్థశతకాలతో సచిన్‌కు అతి సమీపంలో ఉన్నాడు. రాబోయే ఇన్నింగ్స్‌ల్లో మరొక్క అర్థశతకం సాధిస్తే సచిన్ రికార్డును సమం చేయడంతో పాటు మరొకటి సాధిస్తే వరల్డ్ రికార్డును బ్రేక్ చేస్తాడు. 

joe root 79 runs away from world record,joe root test cricket most runs at home.