భారతదేశం తన 80వ స్వాతంత్ర్య దినోత్సవాన్ని ఒక చారిత్రాత్మక మైలురాయిగా జరుపుకుంటున్న వేళ..  దేశ భవిష్యత్తును తీర్చిదిద్దేందుకు,  వికసిత భారత్ స్వప్నాన్ని సాకారం చేయడానికి ఒక స్పష్టమైన రోడ్‌మ్యాప్ రూపుదిద్దుకుంది. శతాబ్ది ఉత్సవాల నాటికి ఇండియాను అన్ని రంగాల్లో సుసంపన్నమైన,  అభివృద్ధి చెందిన దేశంగా తీర్చిదిద్దడమే లక్ష్యంగా జాతీయ అజెండా నిర్దేశించబడింది. అంతర్జాతీయంగా ఎన్నో భౌగోళిక రాజకీయ అస్థిరతలు, వాణిజ్య అంతరాయాలు, సాంకేతిక సవాళ్లు నెలకొన్న ప్రస్తుత తరుణంలో.. ఇండియా ఆకాంక్షలను ప్రపంచ సవాళ్లతో అనుసంధానిస్తూ దేశ వ్యూహాత్మక సంసిద్ధతను పెంపొందించడం  ప్రధానమైన అంశంగా మారింది. ఎర్రకోట బురుజులపై నుంచి ప్రధాని నరేంద్రమోడీ ప్రసంగం 2047 నాటికి ఇండియా అభివృద్ధి చెందుతున్న దేశంగా కాదు అభివృద్ధి చెందిన దేశంగా నిలుస్తుందనీ, స్వావలంబన సాధిస్తుందనీ చాటడమే కాకుండా అందుకు స్పష్టమైన రోడ్ మ్యాప్ ఉందని ఎలుగెత్తింది.  

మోడీ ప్రసంగాన్ని బట్టి చూస్తే.. కేవలం అంతర్గత ఆర్థిక పురోగతికే ప్రాధాన్యత ఇవ్వకుండా, అంతర్జాతీయ ఒత్తిడులను తట్టుకోగల సార్వభౌమత్వ సామర్థ్యాన్ని పెంపొందించుకోవడమే ప్రధాన ధ్యేయంగా స్పష్టమవుతోంది.  చారిత్రాత్మక ఎర్రకోట ప్రాంగణంలో జరిగిన స్వాతంత్ర్య దినోత్సవ వేడుకలు దేశ సాంస్కృతిక వారసత్వంతో పాటు రక్షణ, సాంకేతిక రంగాలలో ఇండియా సాధించిన స్వావలంబనను విస్పష్టంగా ప్రతిబింబించాయి. రాజ్‌ఘాట్‌లో మహాత్మా గాంధీకి నివాళులర్పించిన అనంతరం ప్రధాని ధరించిన గుజరాత్, రాజస్థాన్ సాంప్రదాయ రంగుల తలపాగా పండుగ వాతావరణానికి   శోభ  చేకూర్చింది. దేశీయంగా తయారైన 105 మిమీ లైట్ ఫీల్డ్ గన్‌ల ద్వారా అందించిన 21-గన్ సెల్యూట్,  వందేమాతరం గీత 150 ఏళ్ల వేడుకల ప్రదర్శనలు జాతీయ ఆత్మస్థైర్యాన్ని పెంపొందించాయి. అంతే కాకుండా.. ఆర్టిఫిషియల్ ఇంటెలిజెన్స్ (ఏఐ) సాంకేతికతను ఉపయోగించి ప్రసంగాన్ని 22 భారతీయ భాషల్లోకి ప్రత్యక్షంగా అనువదించడం ద్వారా డిజిటల్ ఆధునీకరణ రంగంలో భారత్ సాధిస్తున్న పురోగతి ప్రపంచానికి చాటిచెప్పింది.  

 ప్రపంచ వ్యాప్తంగా   సంరక్షణవాదం,  ఆర్థిక ఒత్తిడులు పెరిగిపోతున్న పరిస్థితుల్లో, జాతీయ స్వావలంబన అనేది అత్యవసర,  వ్యూహాత్మక అవసరంగా మారింది. ఇంధన సరఫరాలు, ఎరువులు, ఔషధాలు,  కీలకమైన సాంకేతికతలను అంతర్జాతీయంగా ఒత్తిడి సాధనాలుగా ఉపయోగిస్తున్న ఈ కాలంలో,  ఆత్మనిర్భర్ భారత్ విధానం కేవలం పరిశ్రమల ఉత్పాదకతకే పరిమితం కాకుండా దేశ స్థిరత్వానికి ఒక రక్షణ కవచంగా నిలుస్తోంది. బాహ్య అంతరాయాలకు గురికాకుండా విదేశీ,  ఆర్థిక విధానాల్లో పూర్తి స్వయంప్రతిపత్తిని కలిగి ఉండటానికి ఇది దోహదపడుతుంది. 

ఈ స్వావలంబన విధానం ప్రపంచ ఆర్థిక వ్యవస్థ నుండి వేరుపడటానికి ఎంతమాత్రం కాదు.  వ్యూహాత్మక బలంతో అంతర్జాతీయ మార్కెట్లలో పోటీపడేందుకు,  ఎగుమతి ఆధారిత వ్యవస్థగా మారడానికేనని స్పష్టమవుతోంది.  భారత ఉత్పాదక రంగాన్ని కేవలం దేశీయ అవసరాల కోసమే కాకుండా ప్రపంచ సరఫరా గొలుసులో ఒక నమ్మకమైన కేంద్రంగా నిలబెట్టేందుకు స్పష్టమైన ప్రణాళికతో ముందుకుసాగుతున్న విషయాన్ని ఎర్రకోట బురుజులపై నుంచి ప్రధాని మోడీ చేసిన ప్రసంగం ద్వారా స్పష్టమౌతోంది. . కేవలం ఉత్పత్తి పరిమాణంపైనే కాకుండా  నాణ్యత, స్థిరమైన ప్రమాణాలు,  ప్రపంచ స్థాయి బ్రాండ్ విశ్వసనీయతపై ప్రత్యేక దృష్టి సారించాల్సిన అవసరం ఉంది. 

ఈ లక్ష్య సాధన కోసం.. తయారీ రంగం,   అగ్రికల్చర్ ఆండ్ పుడ్ ప్రోసెసింగ్,  టెక్నాలజీ, ఇన్నో వేషన్,  గతి శక్తి, ఇన్ ప్రాస్ట్రక్చర్,  డిఫెన్స్ పవర్,    గ్రీన్ అండ్ బ్లూ ఎకానమీ, సాంస్కృతిక  రంగాల వికాసమే రాబోయే కాలంలో భారతదేశ ఆర్థిక స్థితిస్థాపకతకు  దిక్సూచిగా మారనుంది.  ఈ సప్తధారణ అభివృద్ధి నమూనా దేశాన్ని 2027 నాటికి వికసిత్ భారత్ దిశగా నడిపిస్తుందని మోడీ ఉద్ఘాటించారు. దేశ జనాభా ప్రయోజనాలను పూర్తిస్థాయిలో వినియోగించుకోవడంలో యువత, నైపుణ్యాభివృద్ధి,  సామాజిక సమానత్వాలు అత్యంత కీలకపాత్ర పోషిస్తాయి. దేశంలో కోటి మంది యువతకు ఆర్టిఫిషియల్ ఇంటెలిజెన్స్‌లో ప్రత్యేక నైపుణ్య శిక్షణ అందించే కార్యక్రమం డిజిటల్ ఆర్థిక వ్యవస్థలో నూతన ఉపాధి అవకాశాలను సృష్టించనుంది. దీనికి తోడు ఆర్థికంగా వెనుకబడిన వర్గాల విద్యార్థులకు పోటీ పరీక్షల కోసం ఉచిత ఆన్‌లైన్ కోచింగ్ సౌకర్యం కల్పించడం వల్ల విద్యార్థులకు సమాన అవకాశాలు లభిస్తాయి. క్రీడా రంగంలో దేశీయ ప్రతిభను వెలికితీసేందుకు జాతీయ స్థాయిలో ఒలింపిక్ టాలెంట్ సెర్చ్‌ను ప్రారంభించి, 2036 ఒలింపిక్ క్రీడల ఆతిథ్య లక్ష్యానికి,  అంతర్జాతీయ స్థాయిలో క్రీడా జయభేరి మోగించడానికి బలమైన పునాది వేయడం జరుగుతోంది.  

సామాజిక సంక్షేమంతో పాటు ప్రజారోగ్యం మరియు పౌర భాగస్వామ్యం కూడా ఈ బృహత్తర ప్రణాళికలో భాగమయ్యాయి. సమాజాన్ని పీడిస్తున్న మాదకద్రవ్యాల సమస్య నిర్మూలనకు 100 వారాల ప్రత్యేక ప్రచారాన్ని చేపట్టడం మరియు ప్రజా నిమగ్నతను పెంచడం ద్వారా మాదకద్రవ్య రహిత సమాజాన్ని స్థాపించవచ్చు. అలాగే కొనసాగుతున్న జనాభా గణన ప్రక్రియలో డిజిటల్ అక్షరాస్యత కలిగిన యువత తమ కుటుంబాలకు సహాయపడటం ద్వారా ప్రజా పరిపాలనలో నేరుగా భాగస్వామ్యులవుతున్నారు. కార్పొరేట్ రంగానికి సంబంధించి, రాబోయే దశాబ్దంలో ప్రపంచంలోని ఫార్చ్యూన్ 500 సంస్థల జాబితాలో కనీసం 50 భారతీయ కంపెనీలు చోటు సంపాదించేలా ఎదగాలని లక్ష్యంగా పెట్టుకున్నారు. 

బ్యాంకింగ్, ఫార్మా, హెల్త్‌కేర్, పర్యాటకం వంటి అనేక కీలక రంగాలలో భారత సంస్థలు అంతర్జాతీయ ప్రమాణాలను నెలకొల్పాల్సిన అవసరం ఎంతైనా ఉంది.  రాజకీయ,  ప్రజాస్వామ్య వ్యవస్థల్లో మహిళా ప్రాతినిధ్యం ప్రాథమిక ప్రతిపత్తిగా నిలుస్తుంది. చట్టసభలలో మహిళలకు 33 శాతం రిజర్వేషన్లు కల్పించాలనే నిర్ణయం మహిళల గౌరవాన్ని పెంచడంతో పాటు నిర్ణయాధికారంలో వారి భాగస్వామ్యాన్ని పెంపొందిస్తుంది. ఇది ఆర్థిక సూచీలను దాటి నిజమైన ప్రజాస్వామ్య వికాసానికి దారితీస్తుంది. మరోవైపు, దేశ సమైక్యతకు భంగం కలిగించే అంశాలపై తీవ్ర హెచ్చరికలు వ్యక్తమయ్యాయి. సాయుధ నక్సలిజం బలహీనపడినప్పటికీ, నిరాయుధ మార్గాల ద్వారా తీవ్రవాద సైద్ధాంతిక ఆలోచనలను ప్రోత్సహించే "దిమాగీ నక్సల్స్" విధానాలను గుర్తించి ఏకాకిని చేయాలని స్పష్టం చేయబడింది. ప్రతీకాత్మక జాతీయవాదాన్ని మరియు దీర్ఘకాలిక అభివృద్ధినీ అనుసంధానించే ఈ ప్రతిపాదనలు, 2047 నాటికి భారత్‌ను ప్రపంచ వేదికపై అగ్రగామిగా నిలబెట్టే దృఢమైన సంకల్పాన్ని ప్రతిబింబిస్తున్నాయి.

- సీతారాం కంఠంనేని

ఈ విశ్లేషణ మీకు నచ్చినట్లయితే, దయచేసి మా https://TeluguOne.com  పోర్టల్‌ను అనుసరించండి, మీ స్నేహితులతో పంచుకోండి, అలాగే మీ విలువైన అభిప్రాయాలను తెలియజేయండి.   

Viksit Bharat 2047, PM Narendra Modi Speech, Atmanirbhar Bharat, 80th Independence Day,    Saptadharas Development Model