జీవితంలో మెడికల్ ఎమర్జెన్సీ ఎప్పుడు వస్తుందో ఎవరూ ఊహించలేరు. అలాంటి క్లిష్ట సమయంలో కుటుంబ సభ్యుల ఆరోగ్యం గురించిన ఆందోళన ఒకవైపు, ఆసుపత్రి ఖర్చుల భారం మరోవైపు మనల్ని తీవ్రమైన ఒత్తిడికి గురిచేస్తాయి. సరైన సమయానికి చేతిలో డబ్బు లేకపోతే, చాలా మంది భారం తగ్గించుకోవడానికి అత్యధిక వడ్డీ రేట్లకు పర్సనల్ లోన్లు లేదా ఇతర అప్పులు చేస్తుంటారు. ఈ ఆర్థిక ఇబ్బందుల నుంచి తప్పించుకోవడానికి హెల్త్ ఇన్సూరెన్స్ పాలసీ ఎంతగానో సహాయపడుతుంది. అయితే ఇన్సూరెన్స్ ఉన్నప్పటికీ, సరైన అవగాహన లేకపోవడం వల్ల లేదా క్లెయిమ్ ప్రాసెస్ లో చిన్న చిన్న తప్పులు చేయడం వల్ల చాలా మంది క్యాష్ లెస్ సదుపాయాన్ని కోల్పోతుంటారు. లేదా క్లెయిమ్ పూర్తిగా రిజెక్ట్ అయ్యే ప్రమాదం కూడా ఉంటుంది. ఇన్సూరెన్స్ కంపెనీ చికిత్సను ఆమోదించినంత మాత్రాన క్లెయిమ్ ప్రక్రియ ముగిసినట్లు కాదు. ఆసుపత్రిలో చేరినప్పటి నుండి డిశ్చార్జ్ అయ్యే వరకు పాలసీదారులు అలర్ట్ గా ఉండాలి. ఎలాంటి అడ్డంకులు లేకుండా సులువుగా హెల్త్ ఇన్సూరెన్స్ క్లెయిమ్ సెటిల్మెంట్ పొందడానికి ప్రతి ఒక్కరూ కచ్చితంగా ఫాలో అవ్వాల్సిన పది ముఖ్యమైన సూత్రాలు ఉన్నాయి. వీటిని పాటిస్తే ఎమర్జెన్సీ సమయంలో మీ సొంత జేబు నుండి ఒక్క రూపాయి కూడా అదనంగా ఖర్చు పెట్టాల్సిన అవసరం రాదు.

మొట్టమొదటిగా మీరు చికిత్స కోసం వెళ్తున్న ఆసుపత్రి, మీ ఇన్సూరెన్స్ కంపెనీకి చెందిన నెట్‌వర్క్ ఆసుపత్రుల జాబితాలో ఉందో లేదో ముందే చెక్ చేసుకోవాలి. ఇది క్యాష్‌లెజ్ ట్రీట్‌మెంట్ పొందడానికి ఎంతో కీలకం. ఆసుపత్రి నెట్‌వర్క్ లో ఉంటే ఎలాంటి నగదు చెల్లించకుండానే చికిత్స ప్రారంభించవచ్చు. రెండవది, ఆసుపత్రిలో చేరిన వెంటనే వీలైనంత త్వరగా ఇన్సూరెన్స్ కంపెనీకి సమాచారం అందించడం చాలా ముఖ్యం. ఇలా సకాలంలో సమాచారం ఇవ్వడం వల్ల క్లెయిమ్ ప్రక్రియ వేగవంతం అవుతుంది. మూడవ దశలో, ఆసుపత్రిలో ఉండే థర్డ్ పార్టీ అడ్మినిస్ట్రేటర్ అంటే టీపీఏ డెస్క్ లేదా ఇన్సూరెన్స్ డెస్క్‌ని వెంటనే సంప్రదించాలి. వీరు క్యాష్‌లెస్ క్లెయిమ్‌కు సంబంధించిన పేపర్‌వర్క్ మరియు కంపెనీతో కోఆర్డినేషన్ చేయడంలో సహాయపడతారు. నాలుగవది, అత్యవసర సమయాల్లో పాలసీ కాపీ, హెల్త్ కార్డ్, ఐడీ ప్రూఫ్, కేవైసీ డాక్యుమెంట్లు, పాన్ కార్డ్, ఆధార్ కార్డ్ మరియు మెడికల్ రికార్డులను ఎప్పుడూ సిద్ధంగా ఉంచుకోవాలి. ఐదవ ముఖ్యమైన విషయం ఏమిటంటే, ప్రీ-ఆథరైజేషన్ ఫారమ్‌ను చాలా జాగ్రత్తగా, కచ్చితమైన వివరాలతో నింపాలి. వ్యాధి నిర్ధారణ, తీసుకుంటున్న చికిత్స మరియు గత మెడికల్ హిస్టరీ వంటి వివరాలను తప్పులు లేకుండా ఇస్తేనే ఇన్సూరెన్స్ కంపెనీలు క్లెయిమ్‌ను సులభంగా అప్రూవ్ చేస్తాయి.

ఆ తర్వాత ఆరో దశలో ప్రీ-ఆథరైజేషన్ అప్రూవల్ స్టేటస్‌ని క్రమం తప్పకుండా ట్రాక్ చేస్తుండాలి. అయితే ప్రారంభంలో వచ్చే అప్రూవల్ కేవలం అంచనా మొత్తం మాత్రమేనని గుర్తుంచుకోవాలి. ఏడవదిగా, ఫైనల్ అప్రూవల్ ప్రాసెస్‌ని అర్థం చేసుకోవాలి. ఆసుపత్రి వారు పంపే పూర్తి బిల్లు మరియు డిశ్చార్జ్ సమ్మరీని పరిశీలించిన తర్వాతే ఇన్సూరెన్స్ కంపెనీ చివరి క్లెయిమ్ మొత్తాన్ని ఖరారు చేస్తుంది. ఎనిమిదవది, డిశ్చార్జ్ అయ్యే సమయంలో హాస్పిటల్ స్టాఫ్‌తో మరియు ఇన్సూరెన్స్ డెస్క్‌తో నిరంతరం కోఆర్డినేట్ చేసుకోవాలి. ఆసుపత్రి వారు ఫైనల్ డాక్యుమెంట్లను ఇన్సూరెన్స్‌ కంపెనీకి పంపినప్పుడే ఫైనల్ క్లెయిమ్ అప్రూవల్ వస్తుంది. తొమ్మిదవది, క్యాష్‌లెస్ క్లెయిమ్ అప్రూవ్ అయినప్పటికీ, ఒరిజినల్ మెడికల్ డాక్యుమెంట్లు అయిన డిశ్చార్జ్ సమ్మరీ, ల్యాబ్ రిపోర్టులు, బిల్లులు, ప్రిస్క్రిప్షన్లు మరియు రసీదులన్నింటినీ ఆసుపత్రి నుండి తప్పకుండా కలెక్ట్ చేసుకోవాలి. ఇవి భవిష్యత్తులో రిఫరెన్స్ కోసం ఉపయోగపడతాయి. చివరగా పదో స్టెప్, హాస్పిటలైజేషన్ తర్వాత అయ్యే ఖర్చుల రికార్డులను కూడా భద్రపరుచుకోవాలి. పాలసీ నిబంధనల ప్రకారం డిశ్చార్జ్ అయిన తర్వాత వాడే మందులు, ఫాలో-అప్ ట్రీట్‌మెంట్‌ ఖర్చులను కూడా మనం క్లెయిమ్ చేసుకోవచ్చు. ఈ పది సింపుల్ స్టెప్స్ పాటిస్తే మెడికల్ ఎమర్జెన్సీ సమయంలో ఆర్థిక ఒత్తిడి లేకుండా ప్రశాంతంగా ఉండవచ్చు.

hassle free cashless insurance steps,hospitalization health insurance guide.