విదేశాల్లో ఉన్నత చదువులు చదవాలి..  ప్రపంచ ప్రఖ్యాతి గాంచిన ఐటీ సంస్థలలో కొలువులు సాధించాలి,  హెచ్-1బి వీసా సంపాదించి,  ఆ తరువాత గ్రీన్ కార్డ్ హోల్డర్ అయ్యి..  చివరకు అక్కడే స్థిరపడాలనేది గత కొన్ని దశాబ్దాలుగా సగటు ఇండియన్ టెక్ నిపుణుడి స్వప్నంగా ఉంటూ వస్తోంది. సమాజంలో అత్యున్నత ఆర్థిక, సామాజిక హోదాకు ప్రతీకగా నిలిచిన ఈ  అమెరికన్ డ్రీమ్  ప్రస్తుతం తీవ్ర సంక్షోభంలో పడింది. ఇటీవలి కాలంలో అంతర్జాతీయ వలస విధానాలలో చోటుచేసుకుంటున్న ఆకస్మిక మార్పులు, ప్రపంచ ఆర్థిక వ్యవస్థలో తలెత్తుతున్న ఒడిదుడుకులు,  అమెరికా అంతటా విస్తరిస్తున్న కొత్త రాజకీయ సమీకరణాల కారణంగా..  దశాబ్దాల  నాటి ఈ ఆకాంక్షాత్మక ప్రయాణం సరికొత్త సవాళ్లను ఎదుర్కొంటోంది. సాంకేతిక రంగంలో వస్తున్న పెను మార్పులు,  స్థానిక శ్రామిక మార్కెట్లలో జరుగుతున్న పునర్వ్యవస్థీకరణలు విడివిడి సంఘటనలుగా కాకుండా, ప్రపంచ శ్రామిక రంగాన్ని అతలాకుతలం చేస్తున్న ఒక పెద్ద వ్యవస్థాగత సంక్షోభంలో భాగంగా మారుతున్నాయని పరిశీలకులు విశ్లేషిస్తున్నారు. 

అమెరికాలో నివసిస్తున్న ఇండియాకు చెందిన  ఐటీ ఉద్యోగుల పట్ల..  ముఖ్యంగా తాత్కాలిక హెచ్-1బి వీసాలపై ఆధారపడి జీవిస్తున్న వారి పట్ల ఇటీవలి కాలంలో స్థానిక సమాజంలో శత్రుత్వ భావాలు,  వలస వ్యతిరేక ధోరణులు ప్రమాదకర స్థాయికి చేరుకున్నాయి. ఇన్ఫర్మేషన్ టెక్నాలజీ,  సాఫ్ట్‌వేర్ ఇంజనీరింగ్ వంటి కీలకమైన రంగాలలో విదేశీ నిపుణులు రావడం వల్లే స్థానిక అమెరికన్లకు ఉద్యోగ అవకాశాలు హరించుకుపోతున్నాయనే తప్పుడు ప్రచారం ఊపందుకుంది. అమెరికాకు చెందిన దిగ్గజ కంపెనీలు తక్కువ వేతనాలకే లభించే విదేశీ వలసదారులకు ప్రాధాన్యత ఇస్తూ, తమ సొంత పౌరులను పక్కన పెడుతున్నాయనే ఆరోపణలు సోషల్ మీడియా వేదికగా విపరీతంగా వ్యక్తమవుతున్నాయి. ప్రచారమౌతున్నాయి. సిలికాన్ వ్యాలీలోని గూగుల్, మైక్రోసాఫ్ట్, మెటా, ఆపిల్, అమెజాన్ వంటి సాంకేతిక సామ్రాజ్యాలను అగ్రస్థానంలో నిలబెట్టడంలోను, అత్యున్నత కార్యనిర్వాహక పదవులను అధిరోహించి ప్రపంచవ్యాప్తంగా ప్రశంసలు అందుకోవడంలోను ఇండియన్స్  పోషించిన పాత్రను పూర్తిగా విస్మరించి, వారిని కేవలం రాజకీయ ప్రయోజనాల కోసం వాడుకునే వస్తువులుగా మార్చే ప్రక్రియ ఆన్‌లైన్ వేదికలపై స్పష్టంగా గోచరిస్తోంది.

ఈ మానసిక అభద్రతకు తోడు, అమెరికా ఇమ్మిగ్రేషన్ విధానాలలో   కఠినమైన సంస్కరణలు,  వీసా నిబంధనల ప్రతిపాదనలు  భారత టెక్కీల జీవితాలను మరింత అనిశ్చితిలోకి నెట్టేస్తున్నాయి. వీసా దరఖాస్తు రుసుములను భారీగా పెంచడం, కఠినమైన నిఘా, పరిశీలన ప్రక్రియలను ప్రవేశపెట్టడం వంటి చర్యల వల్ల ఇప్పటికే అమెరికాలో స్థిరపడిన కుటుంబాలలో సైతం తీవ్ర ఆందోళన వ్యక్తమవుతోంది. తాము ఎంత ప్రతిభ కనబరిచినా, సకాలంలో పన్నులు చెల్లిస్తూ చట్టాలకు లోబడి జీవిస్తున్నప్పటికీ, తమ భవిష్యత్తు అనేది కేవలం ప్రభుత్వాల తదుపరి నిర్ణయాలపైనే ఆధారపడి ఉందనే చేదు చేదు వాస్తవం వారికి అనుభవేకవైద్యమౌతోంది.  ఒకవైపు గ్రీన్ కార్డ్ లభ్యత కోసం దశాబ్దాల తరబడి నిరీక్షించడం, మరోవైపు అమెరికన్ పాఠశాలల్లో చదువుతున్న పిల్లల భవిష్యత్తును చూసుకోవడం, గృహ రుణాలు,  స్థానిక ఆర్థిక బాధ్యతలను నెరవేరుస్తూనే భారతదేశంలో ఉన్న వృద్ధాప్య తల్లిదండ్రులకు ఆసరాగా నిలవడం వంటి బహుముఖ ఒత్తిళ్లను వారు భరిస్తున్నారు. చట్టపరమైన నిబంధనలలో వచ్చే ప్రతి చిన్న మార్పు  వారి దైనందిన జీవితంలో పెద్ద ఆర్థిక, మానసిక అలజడులను సృష్టిస్తోంది.

ప్రస్తుతం అమెరికా ఐటీ మార్కెట్‌లో కొనసాగుతున్న కార్పొరేట్ పునర్నిర్మాణ ప్రక్రియ మరియు భారీ లేఆఫ్స్ ఇండియన్ టెక్కీల దుస్థితిని మరింత దారుణంగా మార్చాయి. ప్రపంచవ్యాప్తంగా ఉన్న ఆర్థిక మాంద్యాన్ని సాకుగా చూపుతూ దిగ్గజ సంస్థలు తమ ఉద్యోగుల సంఖ్యను నిరంతరం తగ్గిస్తున్నాయి. ఉదాహరణకు..  ప్రముఖ సంస్థ మైక్రోసాఫ్ట్ తన సేల్స్, కన్సల్టింగ్,   గేమింగ్ విభాగాలలో పెద్ద ఎత్తున సిబ్బంది కోతలను విధిస్తోంది. ఈ తొలగింపులు కేవలం ఖర్చుల తగ్గింపు చర్యలు మాత్రమే కాకుండా, సాంకేతిక పరిజ్ఞానాన్ని మరింత సమర్థవంతంగా మార్చుకునే వ్యూహాత్మక చర్యలుగా పరిగణించబడుతున్నాయి. తాత్కాలిక వీసాల మీద ఉన్న భారతీయ ఐటీ ఉద్యోగులకు ఉద్యోగం కోల్పోవడం అనేది కేవలం జీవనోపాధిని కోల్పోవడమే కాదు..  ఇమ్మిగ్రేషన్ చట్టాల ప్రకారం తక్కువ వ్యవధిలోనే దేశం విడిచి వెళ్లాల్సిన లేదా చట్టపరమైన హోదాను కోల్పోయే ప్రమాదాన్ని తెచ్చిపెడుతోంది. కొత్త ఉద్యోగాన్ని వెతుక్కోవడానికి ప్రభుత్వం ఇచ్చే గడువు అత్యంత స్వల్పంగా ఉండటంతో, వేలాది మంది ఐటీ నిపుణులు తీవ్రమైన వలస సంక్షోభాన్ని ఎదుర్కొంటున్నారు.

మరోవైపు..  పరిశ్రమలలో కృత్రిమ మేధస్సు అంటే ఏఐ, అలాగే ఆటోమేషన్ సాంకేతికతల విస్తృతి మానవ శ్రమ ఉనికిని ప్రశ్నార్ధకం చేసే స్థాయికి చేరుకుంది. ప్రారంభంలో ఐటీ సంస్థలు ఆర్టిఫిషియల్ ఇంటెలిజెన్స్‌ను అన్ని సమస్యలకూ ఒకే ఒక పరిష్కారంగా భావించి, ఖర్చులను తగ్గించుకోవడానికి పెద్ద ఎత్తున ఉద్యోగులను తొలగించాయి. నివేదికల రూపకల్పన, కోడింగ్ రాయడం,   భారీ సమాచార విశ్లేషణ వంటి పనులను ఏఐ విజయవంతంగా నిర్వహిస్తున్నప్పటికీ.. సంక్లిష్టమైన నిర్ణయాలు తీసుకోవడం, కస్టమర్ సంబంధాలను సమర్థవంతంగా నిర్వహించడం,   నైతికపరమైన విచక్షణ చూపించడంలో సాంకేతికతకు ఉన్న పరిమితులు ఇప్పుడు నెమ్మదిగా వెలుగులోకి వస్తున్నాయి. ఏఐ వ్యవస్థల ప్రవేశం తర్వాత సిబ్బందిని తగ్గించిన కొన్ని కంపెనీలు, క్లిష్టమైన క్లయింట్ చర్చలు,  అపనమ్మక వాతావరణాన్ని అధిగమించడానికి మానవ మేధస్సు ఎంతో అవసరమని గుర్తించి, తిరిగి కార్మికులను నియమించుకోవడం ప్రారంభిస్తున్నాయి. దీనిని బట్టి భవిష్యత్ పరిశ్రమలు మానవులను పూర్తిగా తొలగించడం ద్వారా కాకుండా, సాంకేతికతను,  మానవ సృజనాత్మకతను సమన్వయం చేసే సహకార నమూనాలపైనే నడుస్తాయని నిపుణులు అంచనా వేస్తున్నారు.

అమెరికా ఉద్యోగ మార్కెట్‌లో ఎంతో అనుభవం ఉన్న సీనియర్ ఇండియన్ టెక్కీలకు సైతం ఉన్నత నాయకత్వ పదవులను అందుకోవడంలో తీవ్రమైన అడ్డంకులు,  అదృశ్య పరిమితులు ఎదురవుతున్నాయి. ఎన్నో ఏళ్ల పని అనుభవం ఉండి, కఠినమైన అనేక రౌండ్ల ఇంటర్వ్యూలను విజయవంతంగా పూర్తి చేసినప్పటికీ, సరైన అవకాశాలు లభించకపోవడంతో విసుగు చెందిన కొందరు నిపుణులు విదేశీ జీవితాన్ని వదిలి స్వదేశానికి తిరిగి వచ్చేస్తున్నారు. అంతర్జాతీయంగా పెరుగుతున్న పోటీ, కంపెనీలలో శ్రేణుల తగ్గింపు,   కేవలం ప్రత్యేక సాంకేతిక నైపుణ్యాలకే ప్రాధాన్యత ఇస్తుండటం వల్ల మేనేజ్మెంట్ స్థాయి పాత్రలలో సాంప్రదాయ వృద్ధి మార్గాలు మూసుకుపోతున్నాయి. అయితే..  ఈ విధంగా భారతదేశానికి తిరిగి రావడాన్ని నిపుణులు తమ కెరీర్ వైఫల్యంగా భావించడం లేదు. దానికి బదులుగా, తమ ఆత్మగౌరవాన్ని కాపాడుకుంటూ, స్వదేశంలో ఉద్భవిస్తున్న అపారమైన అవకాశాలను అందుకోవడానికి ఇదొక వ్యూహాత్మక మార్గంగా మరియు సముచితమైన నిర్ణయంగా వారు పరిగణిస్తున్నారు.

ఈ పరిణామాల నేపథ్యంలో.. ఒకప్పుడు విదేశీ ప్రయాణాలకు కేవలం ప్రత్యామ్నాయ ఆప్షన్‌గా మాత్రమే ఉన్న భారతదేశం, ఇప్పుడు సాంకేతిక నిపుణుల పాలిట అత్యంత ప్రధానమైన గమ్యస్థానంగా రూపాంతరం చెందుతోంది. దేశంలోని ప్రధాన నగరాలైన బెంగళూరు, హైదరాబాద్, పూణే, చెన్నై, గురుగ్రామ్ వంటి నగరాలు గ్లోబల్ కేపబిలిటీ సెంటర్లుగా (జీసీసీ) మారి..  ప్రపంచ స్థాయి స్టార్టప్‌లు,  బహుళజాతి కంపెనీల భారీ పెట్టుబడులను ఆకర్షిస్తున్నాయి. ఆర్టిఫిషియల్ ఇంటెలిజెన్స్, సెమీకండక్టర్ల తయారీ,  సైబర్ సెక్యూరిటీ వంటి సరికొత్త రంగాలలో అంతర్జాతీయ స్థాయి వేతనాలతో కూడిన ఉద్యోగాలు ఇక్కడ అందుబాటులోకి వస్తున్నాయి. అమెరికాలోని అస్థిర వాతావరణంతో పోలిస్తే..  ఇండియాలోని చైతన్యవంతమైన డిజిటల్ పర్యావరణ వ్యవస్థ,  దేశ ప్రగతిలో నేరుగా భాగస్వాములు కాగలగడం అనేది ప్రపంచ స్థాయి ప్రతిభావంతులను స్వదేశం వైపు బలంగా ఆకర్షిస్తోంది.

మొత్తంగా చూసుకుంటే, అమెరికాలో ఇండియన్ ఐటీ నిపుణులు ఎదుర్కొంటున్న ప్రస్తుత సంక్షోభం అనేది  అమెరికన్ డ్రీమ్ పూర్తిగా ముగిసిపోవడాన్ని సూచించడం లేదు, కానీ దాని స్వరూపం వేగంగా మారిపోతోందని స్పష్టం చేస్తోంది. తీవ్రమవుతున్న రాజకీయ చర్చలు, కఠినమైన వలస నిబంధనలు, ఏఐ ఆధారిత పునర్నిర్మాణాలు,  కార్పొరేట్ సంస్థల మితిమీరిన వ్యయ నియంత్రణల వల్ల కేవలం కష్టపడి పనిచేస్తేనే విదేశాల్లో స్థిరత్వం లభిస్తుందనే నమ్మకం సడలిపోయింది. అదే సమయంలో, ఇండియా కేవలం ప్రతిభను సరఫరా చేసే దేశంగానే కాకుండా, అంతర్జాతీయ ఆవిష్కరణలకు,  ఉన్నత ఉపాధి కల్పనకు ఒక శక్తివంతమైన కేంద్రంగా ఎదిగింది. రాబోయే రోజుల్లో  ఇండియన్ టెక్కీలు తమ గుర్తింపును, సుదీర్ఘ భవిష్యత్తును కాపాడుకోవడానికి అమెరికా అవకాశాలతో పాటు స్వదేశీ మార్కెట్లను కూడా సమతుల్యం చేసుకుంటూ, అంతకంతకూ బహుధ్రువ ప్రపంచంలో తమదైన శైలిలో ముందడుగు వేయాల్సి ఉంటుంది.

 -సీతారాం కంఠంనేని

ఈ విశ్లేషణ మీకు నచ్చినట్లయితే, దయచేసి https://www.teluguone.com పోర్టల్ ను  ఫాలో అవ్వండి. లైక్ చేయండి. షేర్ చేయండి. మీ విలువైన అభిప్రయాలను తెలియజేయండి.   

US IT layoffs, H1B visa issues, Microsoft corporate restructuring, Indian techies anti immigrant backlash