బంగారం మరియు వెండి కొనుగోలు చేయాలనుకునే వారికి మార్కెట్ నుండి ఊరటనిచ్చే వార్త ఒకటి వినిపిస్తోంది. అంతర్జాతీయ మార్కెట్లలో పసిడి ధరలు ఒక్కసారిగా కుప్పకూలాయి. గత కొద్ది రోజులుగా వరుసగా నష్టాలను చవిచూస్తున్న బంగారం ధరలు, తాజాగా ఒక కీలకమైన మైలురాయి కంటే దిగువకు పడిపోయాయి. అంతర్జాతీయ మార్కెట్లో స్పాట్ గోల్డ్ ధర ఏకంగా 0.9 శాతం మేర క్షీణించి, అవున్స్(ounce)కు 3,991.49 డాలర్ల వద్దకు చేరుకుంది. 2025 నవంబర్ తర్వాత, అంటే దాదాపు ఎనిమిది నెలల కాలంలో పసిడి ధర ఇలా 4,000 డాలర్ల మార్కు కంటే కిందకు పడిపోవడం ఇదే మొదటిసారి కావడంతో మదుపరులలో తీవ్ర ఆందోళన వ్యక్తమవుతోంది. ఇదే సమయంలో ఆగస్టు డెలివరీకి సంబంధించిన యూఎస్ గోల్డ్ ఫ్యూచర్స్ కూడా 1 శాతం తగ్గి 4,007.30 డాలర్ల వద్ద ట్రేడ్ అవుతోంది. ఈ ఏడాది జనవరి 29న నమోదైన రికార్డు గరిష్ట స్థాయి 5,594.82 డాలర్లతో పోలిస్తే ప్రస్తుతం బంగారం ధర ఏకంగా 29 శాతం మేర పతనమవడం గమనార్హం.

కేవలం బంగారం మాత్రమే కాదు, వెండి ధరలు కూడా భారీగానే క్షీణిస్తున్నాయి. అంతర్జాతీయ మార్కెట్లో స్పాట్ సిల్వర్ ధర 3.2 శాతం పడిపోయి ఔన్స్‌కు 56.01 డాలర్ల వద్ద స్థిరపడింది. దేశీయ మార్కెట్లను గమనిస్తే, ప్రస్తుతం 24 క్యారెట్ల 10 గ్రాముల బంగారం ధర సుమారు 1,41,480 రూపాయలుగా ఉండగా, కిలో వెండి ధర 2,14,000 రూపాయల వద్ద కొనసాగుతోంది. ఈ వరుస పతనాల నేపథ్యంలో మార్కెట్ విశ్లేషకులు కొన్ని కీలక కారణాలను వివరిస్తున్నారు. అమెరికా డాలర్ ఇండెక్స్ మే 2025 తర్వాత అత్యంత బలమైన స్థాయికి చేరుకోవడం, యూఎస్ ఫెడరల్ రిజర్వ్ వడ్డీ రేట్లను సుదీర్ఘకాలం పాటు అధికంగానే ఉంచవచ్చనే సంకేతాలు ఇవ్వడం వల్ల విలువైన లోహాలపై తీవ్ర ఒత్తిడి పెరుగుతోంది. డాలర్ బలపడితే ఇతర కరెన్సీలను ఉపయోగించే అంతర్జాతీయ కొనుగోలుదారులకు బంగారం మరింత ప్రియంగా మారుతుంది. దీనివల్ల మార్కెట్లో ప్రపంచవ్యాప్తంగా పసిడి డిమాండ్ గణనీయంగా తగ్గుతోంది.

దీనికి తోడు అమెరికాలో ద్రవ్యోల్బణం మే నెలలో 4 శాతం దాటడం పెట్టుబడిదారులను కలవరపెడుతోంది. సాధారణంగా ద్రవ్యోల్బణానికి వ్యతిరేకంగా బంగారాన్ని సురక్షితమైన పెట్టుబడిగా భావించినప్పటికీ, వడ్డీ రేట్లు ఎక్కువగా ఉన్న కాలంలో బాండ్లు లేదా ఫిక్స్‌డ్ ఇన్‌కమ్ సాధనాల వైపు మదుపరులు మొగ్గు చూపుతారు. ఎందుకంటే బంగారంపై ఎలాంటి అదనపు వడ్డీ లేదా రాబడి రాదు. మరోవైపు ఏఐ(AI) స్టాక్స్ మార్కెట్లలో చోటుచేసుకున్న భారీ అమ్మకాలు మరియు జపాన్ వడ్డీ రేట్ల పెంపు వల్ల ఎన్ క్యారీ ట్రేడ్ రివర్స్ అవ్వడం కూడా మార్కెట్ ఒడిదుడుకులకు దారితీసింది. నిపుణుల అంచనాల ప్రకారం, ప్రస్తుతానికి బంగారం ధరలకు 3,950 డాలర్ల వద్ద (దాదాపు ₹1,40,000) కీలక మద్దతు ఉంది. ఒకవేళ ఈ స్థాయిని కూడా దాటి కిందకు పడిపోతే అది 3,600 డాలర్ల (దాదాపు ₹1,30,000) వరకు వెళ్ళవచ్చు. అయితే మార్కెట్ ఓవర్ సోల్డ్ పొజిషన్‌లో ఉన్నందున స్వల్పకాలంలో మళ్లీ 4,100 డాలర్ల వరకు పుంజుకునే అవకాశం కూడా లేకపోలేదు. స్వల్పకాలికంగా ఈ ఒడిదుడుకులు ఉన్నప్పటికీ, దీర్ఘకాలంలో బంగారం మరియు వెండి ధరలపై బుల్లిష్ ట్రెండ్ కొనసాగుతుందని, భారతదేశం వంటి భౌతిక డిమాండ్ ఎక్కువగా ఉన్న దేశాలలో ఈ తగ్గుదల మంచి కొనుగోలు అవకాశంగా మారుతుందని మార్కెట్ నిపుణులు భావిస్తున్నారు.