ఫిఫా ప్రపంచకప్ 2026 మహా సంగ్రామం అత్యంత ఉత్కంఠభరితంగా ప్రారంభమైంది. ఫుట్‌బాల్ ప్రపంచంలో అత్యంత పటిష్టమైన జట్లలో ఒకటిగా పేరుగాంచిన జర్మనీ, ఈ మెగా టోర్నమెంట్‌లో తన ప్రయాణాన్ని అత్యంత ఘనంగా, విశ్వరూపంతో చాటిచెప్పింది. జూన్ 14న హ్యూస్టన్ స్టేడియం వేదికగా జరిగిన లీగ్ ఓపెనింగ్ మ్యాచ్‌లో కురాకో జట్టుతో తలపడిన జర్మనీ, ప్రత్యర్థికి ఏమాత్రం అవకాశం ఇవ్వకుండా 7-1 తేడాతో మైదానంలో చెలరేగిపోయింది. మ్యాచ్ ప్రారంభానికి ముందే అందరి అంచనాలు జర్మనీ వైపే ఉన్నాయి. అందుకు తగ్గట్టుగానే జర్మనీ ఆటగాళ్లు మైదానంలోకి అడుగుపెట్టిన మొదటి నిమిషం నుంచే పూర్తి ఆధిపత్యాన్ని ప్రదర్శిస్తూ మ్యాచ్‌ను వన్‌సైడ్ గేమ్‌గా మార్చేశారు.

మ్యాచ్ ప్రారంభమైన కేవలం ఆరు నిమిషాల వ్యవధిలోనే జర్మనీ ఆటగాడు ఫెలిక్స్ న్మెచా అద్భుతమైన గోల్‌తో జట్టుకు తొలి ఆధిక్యాన్ని అందించాడు. ఫ్లోరియన్ విర్ట్జ్ అందించిన చక్కని పాస్‌ను గోల్‌గా మలిచి జర్మనీ శిబిరంలో ఉత్సాహాన్ని నింపాడు. ఆ తర్వాత కూడా జర్మన్ ప్లేయర్లు వరుస దాడులతో కురాకో రక్షణ శ్రేణిపై తీవ్ర ఒత్తిడిని పెంచారు. అయితే మ్యాచ్ 21వ నిమిషంలో మైదానంలో ఒక అనూహ్యమైన మలుపు చోటుచేసుకుంది. తీవ్ర ఒత్తిడిలో ఉన్న కురాకో జట్టు ఒక్కసారిగా పుంజుకుని జర్మనీ డిఫెన్స్‌ను చేధించింది. లివానో కోమెనెన్సియా అద్భుతమైన గోల్ సాధించి స్కోరును 1-1తో సమం చేయడంతో హ్యూస్టన్ స్టేడియంలోని అభిమానులు ఒక్కసారిగా సంబరాల్లో మునిగిపోయారు.

కానీ, కురాకో జట్టు ఆనందం ఎక్కువసేపు నిలవలేదు. స్కోరు సమం కావడంతో మరింత కసిగా ఆడిన జర్మనీ, కురాకోపై ఎదురుదాడిని తీవ్రం చేసింది. మ్యాచ్ 38వ నిమిషంలో కార్నర్ ద్వారా లభించిన అవకాశాన్ని నికో ష్లోటర్‌బెక్ అద్భుతంగా గోల్‌గా మలిచి జర్మనీకి మళ్లీ 2-1 ఆధిక్యాన్ని అందించాడు. మొదటి అర్ధభాగం ముగియడానికి కొన్ని క్షణాల ముందు, జర్మనీకి లభించిన పెనాల్టీ అవకాశాన్ని కై హావెర్ట్జ్ ఎటువంటి తప్పు చేయకుండా గోల్‌గా మార్చాడు. దీంతో మొదటి హాఫ్ ముగిసే సమయానికి జర్మనీ 3-1 ఆధిక్యంతో సురక్షిత స్థానానికి చేరుకుంది.

ఇక రెండో అర్ధభాగంలో జర్మనీ ఆట తీరు పూర్తిగా మారిపోయింది. మ్యాచ్‌పై పట్టు బిగించిన జర్మనీ ఆటగాళ్లు పూర్తిగా గేర్ మార్చి గోల్స్ వరద పారించారు. 53వ నిమిషంలో యువ సంచలనం జమాల్ ముసియాలా, జోషువా కిమ్మిచ్ పాస్‌తో అదిరిపోయే గోల్ సాధించాడు. ఆ తర్వాత 68వ నిమిషంలో నాథనియెల్ బ్రౌన్ మరో గోల్ అందించి జర్మనీ ఆధిక్యాన్ని 5-1కి పెంచాడు. సబ్‌స్టిట్యూట్ ప్లేయర్‌గా మైదానంలోకి వచ్చిన డెనిజ్ ఉండావ్ 78వ నిమిషంలో తన వంతుగా ఒక గోల్ నమోదు చేశాడు. మ్యాచ్ ముగిసే సమయానికి, అంటే 88వ నిమిషంలో కై హావెర్ట్జ్ మరో అద్భుత గోల్‌తో మెరిసి తన వ్యక్తిగత ఖాతాలో రెండో గోల్‌ను వేసుకున్నాడు. దీనితో నిర్ణీత సమయం ముగిసేసరికి జర్మనీ 7-1తో కురాకోకు కోలుకోలేని భంగపాటను మిగిల్చింది. ఈ భారీ విజయంతో ఆత్మవిశ్వాసాన్ని రెట్టింపు చేసుకున్న జర్మనీ జూన్ 21న స్టేడియంలో ఐవరీ కోస్ట్‌తో తన తదుపరి మ్యాచ్ ఆడనుంది.