అల్లూరి సీతారామరాజు మన్యం జిల్లా ఏజెన్సీ ప్రాంతంలో డ్రోన్ కుప్పకూలిన సంఘటన తీవ్ర కలకలం రేపింది. ఓవైపు పశ్చిమాసియాలో ఉద్రిక్తతలు నెలకొని ఉండటం.. నిత్యం డ్రోన్ దాడులకు సంబంధించి వార్తలు వినవస్తుంటంలో ఆకాసం నుంచి ఓ డ్రోన్ వచ్చి పడటంతో   స్థానికులు తీవ్ర భయందోళనలకు గురయ్యారు.   జి.మాడుగుల మండలం బొయితిలి సమీపంలో ఈ ఉదయం చోటు చేసుకున్న ఈ ఘటన వివరాలిలా ఉన్నాయి.  

ఏజెన్సీ ప్రాంతంలోని మారుమూల గ్రామాలకు అత్యవసరమైన వైద్య సేవలు అందించేందుకు  రెడ్ వింగ్ సంస్థతో కలిసి ప్రభుత్వం  డ్రోన్ల ద్వారా అత్యవసర మందులను వేగంగా తరలించేందుకు సంకల్పించింది. ఇందుకోసం  ఎమర్జెన్సీ మెడికల్ ట్రయల్ రన్ చేపట్టింది.

ఆ ట్రయల్ రన్ లో  ఉన్న డ్రోన్ బొయితిలి గ్రామ పరిసరాల్లో   కూలిపోయింది.  ఈ సంఘటన జరిగిన సమయంలో ఆ పరిసరాల్లో ఎవరూ లేకపోవడంతో ప్రమాదం తప్పింది.  డ్రోన్ల ద్వారా అత్యవసర వైద్య సేవలు అందించేందుకు జరుగుతున్న ట్రయల్ రన్ లో భాగంగా ఈ ఘటన జరిగిందని అధికారులు ధృవీకరించారు. ఎటువంటి ఆందోళనా అవసరం లేదని భరోసా ఇచ్చారు.