జయలలిత బొమ్మ చింపిన విజయ్‌కాంత్‌- కోర్టులో సరెండర్‌!

తమిళనాట లొంగుపాట్లు పర్వం సాగుతున్నట్లు ఉంది. బూతు పాటకి సంబంధించి పోలీసుల ముందు తమిళ నటుడు శింబు మొన్నీమధ్యనే అక్కడి పోలీసులకు లొంగిపోయిన విషయం తెలిసిందే! ఈలోగా మరో సీనియర్‌ తమిళ నటుడు, డిఎండీకే పార్టీ అధ్యక్షుడు విజయ్‌కాంత్‌ కూడా నిన్న ఓ కోర్టు ముందు లొంగిపోవలసి వచ్చింది. గత ఏడాది డిసెంబరులో చెలరేగిన ఓ గొడవకి సంబంధించి విజయ్‌కాంత్‌ న్యాయమూర్తి ముందు నిల్చోవలసి వచ్చింది. వివరాల్లోకి వెళ్తే... విజయ్‌కాంత్‌ తన పార్టీ శ్రేణులతో కలిసి డిసెంబరు 28న తంజావూరులో ఏదో ఆందోళన చేస్తున్నారు. ఇంతలో వారికి జయలలిత బొమ్మ ఉన్న ఓ హోర్డింగు కనిపించింది. అంతే తమ ఆవేశాన్నంతా ఆ హోర్డింగ్ మీద చూపించారు. దాన్ని అక్కడికక్కడే ధ్వంసం చేశారు. మరి ఇంత జరుగుతుంటే అమ్మ అభిమానులు ఊరుకుంటారా. సాక్షాత్తూ తంజావూరు ఎమ్మెల్యే రెంగసామి రంగంలోకి దిగి విజయ్‌కాంత్‌ మీద కేసు పెట్టారు. ఆ కేసు విషయమై విజయ్‌కాంత్‌ ఇప్పుడు లొంగిపోయారు. జయలలితా! మజాకా!