కోలీవుడ్ స్టార్ హీరో అజిత్‌ను తమిళనాడు ముఖ్యమంత్రి జోసెఫ్ విజయ్‌ పరామర్శించారు. ఆయన స్వయంగా చెన్నైలోని అజిత్ నివాసానికి చేరుకున్నారు. అక్కడ మోహిని మణి భౌతికకాయానికి పూలమాల వేసి అంజలి ఘటించారు. అనంతరం అజిత్‌ను ఆత్మీయంగా కౌగిలించుకుని, ఆయనను ఓదారుస్తూ ధైర్యం చెప్పారు. సినిమా రంగంలో సమకాలీన పోటీ ఉన్నప్పటికీ, అజిత్, విజయ్ మధ్య ఉన్న స్నేహబంధం ఈ సందర్భంలో మరోసారి స్పష్టమైంది. ఒక ముఖ్యమంత్రి హోదాలో ఉంటూనే, తన తోటి నటుడి కష్టకాలంలో అండగా నిలబడటానికి విజయ్ చూపిన హుందాతనం అందరినీ ఆకట్టుకుంది.

అజిత్ కుమార్ మాతృమూర్తి మోహిని మణి  నిన్న కన్నుమూశారు. గత కొంతకాలంగా వృద్ధాప్య సమస్యలు, అనారోగ్యంతో బాధపడుతున్న ఆమె చెన్నైలోని ఒక ప్రైవేట్ ఆసుపత్రిలో చికిత్స పొందుతూ తుది శ్వాస విడిచారు. ఈ వార్త తెలియగానే చిత్ర పరిశ్రమ దిగ్భ్రాంతికి గురైంది. 

విజయ్‌తో పాటు కోలీవుడ్ స్టార్ హీరోయిన్ త్రిష కూడా అజిత్ ఇంటికి చేరుకున్నారు. అజిత్ మాతృమూర్తికి నివాళులర్పించి, కుటుంబ సభ్యులను పరామర్శించారు. అజిత్, త్రిష కాంబినేషన్‌లో ఎన్నో సూపర్ హిట్ చిత్రాలు వచ్చాయి. విపత్కర పరిస్థితుల్లో తన కో-స్టార్‌కు మద్దతుగా నిలిచేందుకు ఆమె త్వరగా స్పందించి రావడం గమనార్హం. సీఎం విజయ్, హీరోయిన్ త్రిష ఒకే సమయంలో అజిత్ నివాసానికి వచ్చి పరామర్శించిన దృశ్యాలకు సంబంధించిన వీడియోలు ప్రస్తుతం సోషల్ మీడియాలో విపరీతంగా ట్రెండ్ అవుతున్నాయి.

అజిత్ కుమార్ కుటుంబం ఈ కష్ట సమయంలో ప్రైవేట్‌గా గడపాలని కోరుకుంటోంది. అంత్యక్రియలను కేవలం అత్యంత సన్నిహితులు, కుటుంబ సభ్యుల సమక్షంలోనే నిర్వహించనున్నారు. అభిమానులు ఎవరూ ఇబ్బంది పడకూడదని, అంత్యక్రియల వేడుకను పూర్తిగా వ్యక్తిగతంగా ఉంచాలని కుటుంబం నిర్ణయించింది. ఈ దుఃఖసమయంలో భగవంతుడు అజిత్ కుటుంబానికి మానసిక ధైర్యాన్ని ప్రసాదించాలని ఇటు సినీ లోకం, అటు రాజకీయ వర్గాలు ప్రార్థిస్తున్నాయి.